ނޫމަރާއަށް ވެފައިވާ ވަޢުދުތަކާއި ރަށުގެ ތަރައްޤީއަށް ބޭނުންވާ އެހެނިހެން ކަންކަމުގައިވެސް ޙަޤީޤީ ކުލަ ޖައްސަވައިދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މިލަދުންމަޑުލު އުތުރުބުރީގެ ރަށްތަކަށް ރައީސް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، އެ އަތޮޅު ނޫމަރާއަށް ވަޑައިގެން ރައްޔިތުންނާއި ބައްދަލުކުރައްވާ ރައީސް ވިދާޅުވީ ނޫމަރާގައި މިހާރު ފަށާފައިވާ މަސައްކަތްތަކަކީ ރަށުގެ ތަރައްޤީއަށް މުހިންމު މަސައްކަތްތަކެއް ކަމަށާއި، އެ މަސައްކަތްތައް ބާރު ދުވެއްޔެއްގައި ކުރިއަށް ގެންދަވާނެ ކަމަށެވެ. އަދި މިހާރު ހުއްޓިފައިވާ މަސައްކަތްތަކުގެ ތެރެއިން ބަނދަރު ހެދުމުގެ މަސައްކަތް ކުރިއަށް ގެންދާނީ ރައްޔިތުން ބޭނުންވާ ގޮތަށް، ދޯނި އެހެލާނެ ސަރަޙައްދަކާއި މޫދަށް އެރޭނެ ސަރަޙައްދަކާއެކު ކަމަށް ވިދާޅުވިއެވެ. މީގެއިތުރުން، ހުއްޓިފައިވާ ފެނާއި ނަރުދަމާގެ މަސައްކަތްވެސް އެމްޑަބްލިއުއެސްސީއާ ހަވާލުކޮށް، އެ މަސައްކަތަށް ޚާއްޞަ އިސްކަމެއް ދެއްވައިގެން ކުރިއަށް ގެންދަވާ ކަމަށްވެސް ވިދާޅުވިއެވެ.
ކުޅިވަރުގެ ދާއިރާއާއި ތަޢުލީމީ ދާއިރާއަށް އަމާޒުކޮށް މުހިންމު މަޝްރޫޢުތަކެއް ކުރިއަށް ގެންދިއުމަށް މިއަންނަ އަހަރުގެ ބަޖެޓުގައި ހިމަނުއްވާނެ ކަމަށް ރައީސް ވިދާޅުވެފައިވެއެވެ.
“ކުޅިވަރުގެ ދާއިރާއިން އިތުރު މަޝްރޫޢުތައް ކުރިއަށް ގެންދާނަން. މިއަންނަ އަހަރުގެ ބަޖެޓުގައި ޒަމާނީ ފެންވަރުގެ އައު ފުޓްބޯޅަ ދަނޑަކާއި ވޮލީ ކޯޓެއް ހިމަނައިދޭނަން. ސްކޫލަށް މަލްޓިޕާޕަސް ހޯލްވެސް ބަޖެޓުގައި ހިމަނާނެ” ރައީސް ވިދާޅުވިއެވެ.
މީގެއިތުރުން، ސިއްޙީ ދާއިރާއަށް ޚާއްޞަ އިސްކަމެއް ދެއްވާނެ ކަމަށާއި، ރަށުގައި ތިބެގެން އާންމުކޮށް ހަދަންޖެހޭ ޓެސްޓުތައް ހެދުމަށް ލެބޯޓަރީގެ ޚިދުމަތްވެސް ހަމަޖައްސަވައިދެއްވާނެ ކަމަށް ރައީސް ވިދާޅުވެފައިވެއެވެ. އަދި ރަށުގެ އިންޖީނުގެ އެހެން ސަރަޙައްދަކަށް ބަދަލުކުރުމުގެ މަސައްކަތް ރޯދަމަސް ނިމުމުގެ ކުރިން ނިންމަވައިދެއްވާނެ ކަމަށްވެސް ވަނީ ވިދާޅުވެފައެވެ.