މި މަހުގެ 14 ވަނަ ދުވަހު ވެރިކަންކުރާ ޕީޕަލްސް ނޭޝަނަލް ކޮންގުރެސް (ޕީއެންސީ)އިން މާލޭގެ އާޓިފިޝަލް ބީޗުގައި ބާއްވާ ބޮޑު ޖަލްސާއަށް ރާއްޖޭގެ އެކި ކަންކޮޅުތަކުން މީހުން އެއްވާނީ ރައީސް ޑރ. މުޙައްމަދު މުއިއްޒާއާއެކު ދިވެހި ރައްޔިތުން ތިބިކަން ސާބިތުކޮށްދިނުމަށް ކަމުގައި ރައްޔިތުންގެ މަޖިލީހުގެ ރައީސް އަދި ކޮންގުރެސް ޕާޓީގެ ޗެއާޕާސަން އަބްދުއްރަހީމް އަބްދުﷲ ވިދާޅުވެއްޖެއެވެ.
މި ޖަލްސާއަށް ތައްޔާރުވުމުގެ ގޮތުން މިއަދު މާލޭ ސަރަހައްދާއި މާލެ ކައިރި ރަށްރަށުގައި ހިންގާ ބޮޑު ހަރަކާތް ފެށުމަށް ކޮންގްރެސް ޕާޓީގެ ހަރުގޭގައި މިއަދު ހެނދުނު ބޭއްވި ބައްދަލުވުމަށްފަހު ނޫސްވެރިންނާ ބައްދަލުކުރައްވަައި ދެއްކެވި ވާހަކަފުޅުގައި އަބްދުއްރަހީމް ވިދާޅުވީ، ރައީސް މިހާތަނަށް ކޮށްދެއްވި ހިދުމަތްތައް ރައްޔިތުން ގަބޫލުކޮށް، އެކަންކަން ބަލައިގަންނާތީ މި ޖަލްސާއަށް ރައްޔިތުން އަންނާނެ ކަމަށެވެ. އަދި މި ޖަލްސާގެ ތެރެއިން ވެސް އުންމީދު އައުވާނެ އިތުރު އެތައް ކަމެއް އިއުލާނުކުރެވިގެންދާނެ ކަމުގެ އިޝާރާތެއް އޭނާ ދެއްވިއެވެ.
އަބްދުއްރަހީމް ވިދާޅުވީ އަންނަ ހުކުރު ދުވަސް ބާއްވަން ހަމަޖެހިފައިވާ މި ޖަލްސާގެ މަގްސަދަކީ ރައީސް މުއިއްޒާގެ ސަރުކާރަށް ރައްޔިތުންގެ ފުރިހަމަ ތާއީދު އޮތްކަން ދައްކުވައިދިނު ކަމަށެވެ.
އަބްދުއްރަހީމް އިތުރަށް ފާހަގަކުރެއްވި ގޮތުގައި ޕީއެންސީގެ ރައީސްގެ ހައިސިއްޔަތުން ރައީސް ޑރ. މުއިއްޒު މި ޖަލްސާގައި ދައްކަވާ ވާހަކަފުޅުގެ ތެރެއިން ރައްޔިތުންނަށް އުންމީދު ލިބިގެންދާނެ އެތައް ކަމެއް އިއުލާނުކުރެވިގެންދާނެއެވެ. އޭނާ ވިދާޅުވީ، ރައީސް މުއިއްޒު ރާއްޖޭގެ ހުރިހާ ރަށަކަށް ކުރެއްވި ދަތުރުފުޅުތައް ނިންމަވައިލެއްވިއިރު، ރާއްޖޭގެ ހުރިހާ ރަށެއްގައި ތަރައްގީގެ ގިނަ އަދަދެއްގެ މަޝްރޫއުތައް ފެށިފައިވާ ކަމަށެވެ. އަދި ފާއިތުވި ބުރާސްފަތި ދުވަހަކީ އެއް ފަހަރާ އެންމެ ގިނަ މަޝްރޫއު ދިވެހި އަމިއްލަ ކުންފުނިތަކާ ހަވާލުކުރެވުނު ދުވަސްކަން ވެސް އޭނާ ފާހަގަކުރެއްވިއެވެ.
އަބްދުއްރަހީމް ވިދާޅުވީ، 14 ވަނަ ދުވަހު އާޓިފިޝަލް ބީޗަށް ދިވެހި ރައްޔިތުން ޖަމާވަނީ ވާދަވެރި ފިކުރުގެ މީހުން ދައްކާ ވާހަކަތައް ރައްޔިތުން ގަބޫލުނުކުރާތީ ކަމަށެވެ. އަދި އެ އެއްވުމުން ރާއްޖެ އޮތީ ކިހިނެއްކަން އަދި ރައްޔިތުން ތިބީ ކިހިނެއްކަން ސާފުކޮށް ފެނިގެންދާނެ ކަމުގެ ޔަގީންކަން އޭނާ ދެއްވިއެވެ.