ރާއްޖޭގެ ސިޔާސީ މަސްރަހުގައި މަދުން ނޫނީ ނުފެންނަ ފަދަ ބޮޑު ޖަލްސާއެއް، ވެރިކަން ކުރާ ޕާޓީ، ޕީއެންސީން ރޭ މިވަނީ ބާއްވާފައެވެ. މާލޭގެ އާޓިފިޝަލް ބީޗު ސަރަހައްދުގައި ބޭއްވި މި ޖަލްސާއަކީ، ރައީސް ޑރ. މުޙައްމަދު މުޢިއްޒުގެ ވެރިކަމަށް ދެ އަހަރު ފުރުން ފާހަގަކުރުމުގެ ގޮތުން ބޭއްވި ބައްދަލުވުމެކެވެ. މި ޖަލްސާގެ ބޮޑުކަމާއި، ބައިވެރިވި މީހުންގެ އަދަދު ބަލާއިރު، މިއީ ރާއްޖޭގެ ސިޔާސީ ތާރީޚުގައި މިހާތަނަށް ބޭއްވުނު އެންމެ ބޮޑު އެއް ޖަލްސާ ކަމަށް ޕީއެންސީން ބުނެއެވެ.
މި ޖަލްސާގެ އެންމެ ފާހަގަކޮށްލެވޭ އެއް ކަމަކީ ބައިވެރިވި ރައްޔިތުންގެ އަދަދެވެ. އެގޮތުން ރައީސް ޑރ. މުހައްމަދު މުޢިއްޒު ރޭގައި ވިދާޅުވި ގޮތުގައި، މި ޖަލްސާގައި 13،000 އަށް ވުރެ ގިނަ ރައްޔިތުން ބައިވެރިވިއެވެ. އެގޮތުން ޖަލްސާ ބޭއްވި ސަރަހައްދު ފުރި، ބޮޑުތަކުރުފާނު މަގުން އޮކްސިޖަން ކެފޭ އިން ފެށިގެން ސަލްމާން މިސްކިތާ ހަމައަށް އަދި އާޓިފިޝަލް ބީޗުން ފެށިގެން މަޖީދީ މަގުން ހެންވޭރު ދަނޑާ ހަމައަށް މީހުން ހަރަކާތްތެރިވިތަން ރޭގައި ފެނިގެން ގޮސްފައިވެއެވެ. ރައީސް ވިދާޅުވީ މިއީ ރާއްޖޭގެ ސިޔާސީ ހަޔާތުގައި އެންމެ ގިނަ މީހުން ބައިވެރިވި ބައްދަލުވުން ކަމަށާއި، މިކަމުން ސަރުކާރަށް ރައްޔިތުންގެ ތާއީދު އޮތް މިންވަރު ހާމަވެގެންދާ ކަމަށެވެ.
މި ބިޔަ ޖަލްސާ އަށް މީހުން ޖަމާކުރުމަށް ޕީއެންސީން ވަނީ ގިނަ ހަރަކާތްތަކެއް ކުރިއަށް ގެންގޮސްފައެވެ. ޖަލްސާގައި ބައިވެރިވުމަށްޓަކައި މާލެ އާއި ރާއްޖޭގެ އެކި ކަންކޮޅުތަކުން މީހުން މާލެ އައިސްފައިވާާއިރު، ރާއްޖޭގެ ހުރިހާ ރަށަކުން ކަހަލަ ގޮތަކަށް މީހުން މި ޖަލްސާގައި ބައިވެރިވުމަކީ، ޕީއެންސީއަށް ރާއްޖޭގެ އެކި ހިސާބުތަކުން ލިބެމުންދާ ތާއީދު ހާމަކޮށްދޭ ކަމެކެވެ.
ރައީސް ޑރ. މުޢިއްޒު ވަނީ މި ބައްދަލުވުމަށް މާލެ އާއި ރާއްޖޭގެ އެކިކަންކޮޅުތަކުން އައި ހުރިހާ ރައްޔިތުންނަށް ޝުކުރު އަދާކުރައްވައިފައެވެ.
ޕީއެންސީގެ މި ބިޔަ ޖަލްސާގެ މައިގަނޑު ބޭނުމަކީ، ރައީސް މުޢިއްޒުގެ ސަރުކާރަށް އޮތް ތާއީދު ހާމަކުރުމުގެ އިތުރުން، ފާއިތުވި ދެ އަހަރުގެ ތެރޭގައި ސަރުކާރުން ހާސިލުކޮށްފައިވާ ކާމިޔާބީތަކުގެ މައްޗަށް އަލިއަޅުވާލުމެވެ. ޖަލްސާގައި ވާހަކަފުޅު ދައްކަވަމުން ރައީސް މުޢިއްޒު ވަނީ މިދިޔަ ދެ އަހަރުގެ ތެރޭގައި ސަރުކާރުން ކުރި މުހިންމު މަސައްކަތްތަކާއި، ރައްޔިތުންނަށް ލިބުނު ފައިދާތަކާ ގުޅޭ ގޮތުން ތަފްސީލީ މައުލޫމާތު ދެއްވާފައެވެ. މިގޮތުން، ތަރައްޤީގެ މަޝްރޫޢުތަކާއި، އިޤްތިޞާދީ ކުރިއެރުންތަކުގެ މައްޗަށް އަލިއަޅުވައިލެއްވިއެވެ.