މައްޗަންގޮޅީގައި ހުންނަ އަރަބިއްޔާގެ ކުރީގެ އިމާރާތް ތަޅައިލުމަށްފަހު އެތަނުގައި ޕާކިންއާ އެކު ކޮމިއުނިޓީ ޕާކެއް ތަރައްގީކުރައްވަން ސަރުކާރުން ވިސްނަވާ ކަމަށް ރައީސް ޑރ. މުޙައްމަދު މުޢިއްޒު ރޭ ވިދާޅުވެއްޖެއެވެ. ރައީސް މިކަން ހާމަކުރެއްވީ މާލޭގެ ތަރައްގީއާ ގުޅޭގޮތުން މާލޭގެ އަވަށްތަކުގެ ރައްޔިތުންނާ ބައްދަލުކުރެއްވުމަށް ކުރިއަށްގެންދަވާ ސިލްސިލާ ބައްދަލުވުމުގެ ތެރެއިން މައްޗަންގޮޅި ރައްޔިތުންނާއެކު ބޭއްވެވި ބައްދަލުވުމުގައެވެ.
މި ބައްދަލުވުމުގައި ރައީސް ވަނީ މައްޗަންގޮޅި އަވަށުގެ ރައްޔިތުންނަށް ކުރިމަތިވެފައިވާ ތޮއްޖެހުމުގެ މައްސަލައާއި، މަގުތައް ވީރާނާވެފައި ހުރުން ފަދަ ގިނަ މައްސަލަތަކެއް ހައްލުކުރުމަށް ސަރުކާރުގެ ވުޒާރާތަކުން މަސައްކަތްކުރާނެ ކަމުގެ ޔަގީންކަން ދެއްވާފައެވެ.
އަރަބިއްޔާ ސުކޫލުގެ ކުރީގެ އިމާރާތް ތަޅައިލުމުގެ މަސައްކަތް ފެށުމަށް ޕަބްލިކް ވޯކްސްއިން މިހާރު ތައްޔާރުވެފައިވާކަން ފާހަގަކުރައްވައި، ރައީސް ވަނީ އެތަނާމެދު އަމަލުކުރަންވީ ގޮތެއް ކަނޑައެޅުމުގައި ރައްޔިތުންގެ ޚިޔާލު އެމަނިކުފާނާ ހިއްސާކުރުމަށް އެދިވަޑައިގެންފައެވެ. މިވަގުތަށް ސަރުކާރުގެ ވިސްނުން ހުރި ގޮތް ވިދާޅުވެދެއްވަމުން ރައީސް ފާހަގަކުރެއްވީ، 11،000 އަކަފޫޓުގެ އެ ގޯތީގެ ބޮޑު ސަރަހައްދެއް ޕާކިންއަށް ބޭނުންކުރެވޭ ގޮތަށް ތައްޔާރުކުރުމާއެކު، ރޭޒް ލެވެލްއެއްގައި ފެހި ޖާގައެއްގެ ގޮތުގައި ކޮމިއުނިޓީ ޕާކެއް ތަރައްގީކުރަން ސަރުކާރުން ވިސްނާ ކަމަށެވެ.
“ދެބޭނުމަކަށް އެބިމުގެ ބޭނުންކުރަން ވިސްނަނީމި. އަޅުގަނޑުގެ ވިސްނުމަކީ އެތަނުގައި ބޮޑު ސަރަޙައްދެއްގައި ޕާކިންއެއް ތަރައްޤީކޮށް، ގްރީން ސްޕޭސްއަކާއެކު ކޮމިއުނިޓީ ޕާކަކާއެކު ތަރައްޤީކުރުން. މިކަމުގައި ތިބޭފުޅުންގެ ޚިޔާލުދެއްވުން އެދެން.” ރައީސް ވިދާޅުވިއެވެ.
ރައީސް ވިދާޅުވީ އެ މަސައްކަތް ހަލުއިކޮށް ކުރިއަށްގެންދަވައި ރަމަޟާން މަހުގެ ކުރިން ނިންމަވައިލެއްވުމަށް ބޭނުންފުޅުވާ ކަމަށެވެ. ނަމަވެސް، ސަރުކާރުގެ މިހާރުގެ ވިސްނުމަށްވުރެ ބޮޑުކޮށް މަޝްރޫއު ހިންގާނަމަ އެއަށްވުރެ ގިނަ ވަގުތު އެ މަޝްރޫއު ހިންގުމަށް ނަގާނެކަމަށް އެމަނިކުފާނު ފާހަގަކުރެއްވިއެވެ.
ރައީސް ވަނީ މައްޗަންގޮޅި އަދި މާލޭގެ ރައްޔިތުންނަށް ބޭނުންވާ ކަންކަން ކުރުމަށް ސަރުކާރުން ސަމާލުކަންދެއްވާނެކަމުގެ ޔަޤީންކަން ދެއްވާފައެވެ. އެގޮތުން ގެދޮރުވެރިކަމުގެ މައްސަލަ ހައްލުކުރުމަށްވެސް ގިނަ މަޝްރޫޢުތަކެއްގެ މަސައްކަތް ކުރިއަށްދާކަން އެމަނިކުފާނު ފާހަގަކުރެއްވިއެވެ. އަދި މާލޭގެ ތޮއްޖެހުމުގެ މައްސަލަ ހައްލުކުރުމާއި، މަގުތައް ޒަމާނީ ފެންވަރަށް ތަރައްޤީކުރުމަކީވެސް މުހިއްމު މަސައްކަތެއްކަމަށް ވިދާޅުވިއެވެ.



