ރަސްމާލެ ހިއްކުމަށް ކުރިއަށް ގެންދާ ބިޔަ މަޝްރޫޢުގެ މަސައްކަތް އަންނަ އަހަރުގެ މާރިޗު ނުވަތަ އޭޕްރީލް މަހާއި ހަމައަށް ނިމޭނެކަމަށް ރައީސް ޑރ.މުޙައްމަދު މުޢިއްޒު ވިދާޅުވެއްޖެއެވެ.
މާލެ ސަރަޙައްދުގެ ބޯހިޔާވަހިކަމުގެ މައްސަލައަށް ހައްލު ހޯދުމަށް ސަރުކާރުން ކުރިއަށްގެންދާ މަސައްކަތްތަކާ ގުޅޭގޮތުން މައްޗަންގޮޅީގެ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ، މި ބިޔަ މަޝްރޫޢު ނިމުމަކަށް އަންނާނެ ތާރީޚަކީ މާރިޗު ނުވަތަ އޭޕްރީލް ކަމަށެވެ. މިވަގުތުވެސް ރަސްމާލެ ހިއްކުމުގެ މަސައްކަތް 3 ސަރަޙައްދެއްގައި ކުރިއަށްދާކަން އެމަނިކުފާނު ފާހަގަކުރެއްވިއެވެ.
ރަސްމާލެ ހިއްކުމުގެ މަސައްކަތަށް އިތުރު ބާރުދިނުމަށްޓަކައި، އަންނަ މަހުގެ ތެރޭގައި ބޮޑު ޑްރެޖަރެއް ރާއްޖެ ގެނައުމަށް ސަރުކާރުން ނިންމާފައިވާކަމަށް ރައީސް މުޢިއްޒު ވިދާޅުވިއެވެ. މި ޑްރެޖަރަކީ މިހާރު ހުޅުމާލޭގެ މަސައްކަތަށް ބޭނުންކުރާ ޑްރެޖަރުތަކަށްވުރެ ބޮޑު ޑްރެޖަރެކެވެ. ރަސްމާލެއަކީ ހުޅުމާލެއަށްވުރެ ތިންގުނަ ބޮޑު ސަރަޙައްދެއް ކަމަށާއި، މިތަނުން ޖުމްލަ 25,000 ގޯތި ދޫކުރުމަށް ހަމަޖެހިފައިވާކަމަށް އެމަނިކުފާނު ފާހަގަކުރެއްވިއެވެ. ފުރަތަމަ ބުރުގައި 15,000 ގޯތި ދޫކުރުމަށް ވަނީ އިއުލާންކުރެވިފައެވެ.
ރައީސް ވިދާޅުވީ ބިން ހިއްކުމުގެ މަސައްކަތް ނިމިގެންދާއިރު، ރަސްމާލެއިން ގޯތި ލިބޭ ފަރާތްތައް ކަނޑައެޅުމުގެ މަސައްކަތްވެސް ނިމޭނެކަމަށެވެ. މިކަމަށްޓަކައި އުސޫލުތަކުގެ ތެރެއިން މިހާރުވެސް މަސައްކަތްތައް ކުރިއަށްދާކަން އެމަނިކުފާނު ހާމަކުރެއްވިއެވެ. އަދި ރަސްމާލޭގެ މާސްޓަރޕްލޭން ހެދުމުގެ މަސައްކަތް ބޭރުގެ ކޮންސަލްޓަންޓަކާ ހަވާލުކުރުމުގެ މަސައްކަތް ކުރަމުންދާކަމަށާއި، ބިން ހިއްކުން ނިމުމުގެ ކުރިން މާސްޓަރޕްލޭންވެސް އެކުލަވާލެވޭނެކަމުގެ ޔަގީންކަން ރައީސް ދެއްވިއެވެ.
ރައީސް ވަނީ މާލެ ސަރަޙައްދުގައި ކުރިއަށްގެންދާ އެހެން ބޯހިޔާވަހިކަމުގެ މަޝްރޫޢުތަކަށްވެސް އަލިއަޅުއްވާލައްވާފައެވެ. ކުރީގެ ސަރުކާރުން ގޯތި ދޫކޮށްފައިވާ ނަމަވެސް ނުހިއްކާ ހުރި ސަރަޙައްދުތައް ހިއްކުމުގެ މަސައްކަތް މި ސަރުކާރުން ފަށާފައިވާކަމަށް އެމަނިކުފާނު ވިދާޅުވިއެވެ. އެގޮތުން، ހުޅުމާލޭ ފޭސް 3 ހިއްކުމުގެ މަސައްކަތް މާދަމާ ފަށައި، އަންނަ މަހުގެ ނިޔަލަށް ނިންމާލެވޭނެކަމަށް ލަފާކުރެވޭ ކަމަށާއި، ފޭސް 3 ނިމުމާއެކު ގިރާވަރު ފަޅު ހިއްކުމުގެ މަސައްކަތް ފަށައި ދެމަހެއްހާ ދުވަހުގެ ތެރޭގައި އެ މަސައްކަތްވެސް ނިންމާލެވޭނެކަމަށް ރައީސް ވިދާޅުވިއެވެ.
މާލެ ސަރަޙައްދުގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ ބޮޑު މައްސަލައަށް ދާއިމީ ހައްލެއް ގެނައުމަށް ސަރުކާރުން އެންމެ ބޮޑު އިސްކަމެއް ދެނީ ރަސްމާލެ މަޝްރޫޢަށެވެ. މީގެ އިތުރުން، ހުޅުމާލެ ފޭސް 2 ގައި ތަރައްޤީކުރި ފްލެޓްތައް ލިބިފައިވާ ފަރާތްތައް އެތަނަށް ވެއްދުމަށްޓަކައި އެޗްޑީސީން ކުރަންޖެހޭ މަސައްކަތްތައް ކުރިއަށްދާކަމަށްވެސް ރައީސް ޑރ. މުޙައްމަދު މުޢިއްޒު ވަނީ ހާމަކުރައްވާފައެވެ.