ސަރުކާރުގެ ބޯހިޔާވަހިކަމުގެ ސްކީމަކުން ކުރިން 1 ކޮޓަރީގެ ފްލެޓް ލިބިފައިވާ ފަރާތަކަށްވެސް މީގެފަހުން ހައުސިންގ ސްކީމްތަކަށް ކުރިމަތިލެވޭގޮތަށް ހަމަޖައްސާފައިވާކަމަށް ރައީސް ޑރ.މުޙައްމަދު މުޢިއްޒު ވިދާޅުވެއްޖެއެވެ. ގަލޮޅުގެ ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުން ރައީސް ވިދާޅުވީ، މީގެކުރީގެ ހައުސިންގ ސްކީމަކުން އެއް ކޮޓަރީގެ އެޕާޓަމަންޓް ލިބިފައިވާ ފަރާތްތަކަށް މިހާރު އޮންނަ އުސޫލުން އިތުރު ސްކީމަކަށް ކުރިމަތި ނުލެވޭކަމަށާއި، މިއީ ވަރަށް ގިނަ ބައެއްގެ ކަންބޮޑުވުމަކަށްވުމުން އެކަން ސަރުކާރުން މިހާރު ބަދަލުކުރައްވާފައިވާކަމަށެވެ.
ރައީސް މުޢިއްޒު ވިދާޅުވީ، ރައްޔިތުންގެ ހުށަހެޅުންތަކަށް ރިއާޔަތްކޮށް، ކުރިން އެއް ކޮޓަރީގެ ފްލެޓު ލިބިފައިވާ ފަރާތްތަކަށްވެސް 3 ކޮޓަރީގެ ފްލެޓަށް ކުރިމަތިލެވޭގޮތަށް އުސޫލަށް އިސްލާހު ގެނެސްފައިވާކަމަށެވެ. އަދި ކުރިމަތިލައި ހޮވިއްޖެނަމަ، ކުރިން ލިބިފައިވާ ތަން ދޫކޮށްލާފައި، އަލަށް ލިބޭ ތަނަށް ދެވޭގޮތަށް އުސޫލު ހަމަޖެހިފައިވާކަމަށް ރައީސް ވިދާޅުވިއެވެ.
“3 ކޮޓަރި ފްލެޓަށް ދެވޭގޮތަށް އެ އުސޫލު އެވަނީ މިގޮތަށް ބޭއްވުނު ބައްދަލުވުން ތަކުގެ ތެރެއިން ރައްޔިތުން ހުށަހެޅި ޚިޔާލު ބަލައިގަނެވި އެބަދަލު ގެނެސްދީފައި، އެއްކޮޓަރީގެ ފްލެޓު ލިބިގެން ތަންކޮޅެއް ކުރީ ޒަމާނެއްގައި ފްލެޓު ލިބިފައިވާ ފަރާތްތަކަށްވެސް ކުރިމަތިލެވޭނެ.” ރައީސް ވިދާޅުވިއެވެ.
ސަރުކާރުގެ “ބޯހިޔާވަހިކަން އެންމެންނަށް” މި ސިޔާސަތުގެ ދަށުން، މާލެ ސަރަޙައްދުން ފްލެޓާއި ގޯއްޗަށް ކުރިމަތިލުމަށް މިހާރު ވަނީ ހުޅުވާލާފައެވެ. މި ސްކީމްގައި ހިމަނައިގެން 15000 ގޯއްޗާއި 7500 ފްލެޓް ދޫކުރުމަށް ވަނީ ނިންމާފައެވެ.