“ރާޔާ މާލެ” ގެ ނަމުގައި ސޯޝަލް މީޑިއާގައި ހިންގަމުން އަންނަ ޕޭޖަކުން އޮޅުވާލައިގެން މީހުންގެ އަތުން ފައިސާ ހޯދަމުންދާތީ، އެކަމަށް ސަމާލުވުމަށް ފުލުހުން އިލްތިމާސްކޮށްފިއެވެ. މި ޕޭޖަކީ ދިވެހި ޖުވެލަރީ ބްރޭންޑެއް ކަމަށް ދައްކައިގެން، ފިރިމީހާ ނިޔާވުމާ ގުޅިގެން ވިޔަފާރި ހުއްޓާލަނީ ކަމަށް ބުނެ ދޮގު ވާހަކަތަކެއް ފަތުރައި، 80 އިންސައްތައާ ހަމައަށް ބޮޑެތި ޑިސްކައުންޓްތަކެއް ދޭ ކަމަށް ބުނެ މީހުން މަޅީގައި ޖައްސަމުންދާ ޕޭޖެކެވެ.
ފުލުހުންގެ އެންޓި ސްކޭމް ސެންޓަރުން ބުނި ގޮތުގައި، މި ސްކޭމް ހިންގުމަށްޓަކައި ވަކި ވެބްސައިޓަކާއި އީމެއިލް އެޑްރެހެއް ބޭނުންކުރެއެވެ. މި ވެބްސައިޓް މެދުވެރިކޮށް މީހުންގެ ބޭންކް ކާޑުގެ މައުލޫމާތާއި ޒާތީ މައުލޫމާތު ހޯދައި، އެކައުންޓުތަކަށް ވަދެ ފައިސާ ނަގަމުންދާ ކަމަށް ފުލުހުން ވަނީ ހާމަކޮށްފައެވެ. ވަކިން ހާއްސަކޮށް، ޕޭމަންޓް ހަދާ ވަގުތު ބޭންކުގެ ފޭކް ލޮގިން ޕޭޖެއް ދައްކައިގެން ޔޫސާނޭމާއި ޕާސްވޯޑް ވަގަށް ނަގާކަން ފާހަގަކުރެވިފައިވެއެވެ.
މިކަމާ ގުޅިގެން ފުލުހުން ވަނީ އެއްވެސް ވެބްސައިޓަކުން ދޭ ލިންކެއް މެދުވެރިކޮށް އިންޓަނެޓް ބޭންކިންއަށް ނުވަނުމަށާއި، އޯޓީޕީ ފަދަ ސިއްރު މައުލޫމާތު އެއްވެސް ފަރާތަކާ ހިއްސާ ނުކުރުމަށް އަންގާފައެވެ. އަދި މިހާތަނަށް އެ ވެބްސައިޓުގައި އެއްވެސް މައުލޫމާތެއް ޖެހިފައިވާ ނަމަ، ލަސްނުކޮށް ބޭންކަށް ގުޅައި ކާޑާއި އެކައުންޓް ބްލޮކް ކުރުމަށް ވެސް ފުލުހުން އިލްތިމާސް ކުރެއެވެ.
މީގެ އިތުރުން، “ދީނުގެ މަގުގައި” ފަދަ ނަންނަމުގައި ހިންގާ ޕޭޖުތަކުން ބަލި މީހުންނަށް އެހީ ހޯދުމުގެ ނަމުގައި ވެސް ސްކޭމްތައް ހިންގަމުންދާކަން ފުލުހުން ވަނީ ފާހަގަކޮށްފައެވެ.