ސަރުކާރުގެ ބޯހިޔާވަހިކަމުގެ މަޝްރޫއުތަކަށް ކުރިމަތިލާ ފަރާތްތަކުގެ ތެރެއިން، މާލޭގައި މެދުނުކެނޑި 15 އަހަރު ދިރިއުޅުނުކަން ސާބިތުކޮށްދޭން ޖެހޭ މީހުންނަށް، އެފަދަ ރެކޯޑެއް ރަސްމީކޮށް ނުބަލަހައްޓާ ނަމަ ލިޔުން ދޫނުކުރުމަށް ލޯކަލް ގަވަމެންޓް އޮތޯރިޓީ (އެލްޖީއޭ) އިން ކައުންސިލްތަކަށް އަންގައިފިއެވެ. އެލްޖީއޭއިން މިގޮތަށް އެންގީ ސަރުކާރުގެ “އާއިލީ ބޯހިޔާވަހިކަން” ސިޔާސަތުގެ ދަށުން ދޫކުރާ ގޯއްޗާއި ފުލެޓަށް ކުރިމަތިލާ މީހުންނަށް ލިޔުން ދޫކުރުމާ ގުޅޭގޮތުން ކައުންސިލްތަކަށް ފޮނުވި ސިޓީއެއްގައެވެ.
އެލްޖީއޭގެ ސިޓީގައި ބުނެފައިވަނީ، ދައުލަތުގެ އިދާރާއަކުން ރަސްމީކޮށް ބަލަހައްޓާ ލިޔެކިޔުންތަކުން މީހަކު މާލޭގައި ދިރިއުޅޭކަން ސާބިތުވާނަމަ އެ މައުލޫމާތެއްގެ މައްޗަށް ބިނާކޮށް ލިޔުން ދޫކުރެވިދާނެ ކަމަށެވެ. ނަމަވެސް، ކައުންސިލަކުން ބަލަހައްޓަމުން ނުދާ މައުލޫމާތެއްގެ މައްޗަށް ބިނާކޮށް، މީހަކު މާލޭގައި ވަކި މުއްދަތެއްގައި ދިރިއުޅުނު ކަމުގެ ލިޔުން ދޫނުކުރެވޭނެކަން ހައުސިން މިނިސްޓްރީގެ އުސޫލުތަކުން އެނގޭ ކަމަށް އެލްޖީއޭއިން ފާހަގަކޮށްފައިވެއެވެ.
މި މައްސަލައާ ގުޅިގެން ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވީ، މީހަކު މާލޭގައި 15 އަހަރު ދިރިއުޅުނުކަން ބަޔާންކޮށް ކައުންސިލްތަކުގެ ރައީސުންނަށް ލިޔުން ދޫނުކުރެވޭނެ ކަމަށެވެ. އެލްޖީއޭއިން ވެސް ބާރުއަޅާފައިވަނީ ކައުންސިލްގައި އޮންނަ ރަސްމީ ރެކޯޑަކުން އެކަން ސާބިތުކޮށް ނުދެވޭ ނަމަ، އެއްވެސް ފަރާތަކަށް އެފަދަ ލިޔުމެއް ދޫނުކުރުމަށެވެ.
މާލޭގައި ދިރިއުޅުނުކަން ސާބިތުކުރުމަށް ސަރުކާރުން މިހާރު ވަނީ ބޮޑެތި ލުއިތަކެއް ދީފައެވެ. އެގޮތުން ވަޒީފާ އަދާކުރިކަމުގެ ލިޔުންތަކާއި، އާއިލާ މާލޭގައި ބިނާކުރިކަމުގެ ރެކޯޑުތަކުގެ އިތުރުން، ދިރިއުޅުނު ގޭގެ ވެރިފަރާތުން ދޭ ނޯޓަރައިޒްކޮށްފައިވާ ލިޔުންތައް ވެސް ބަލައިގަތުމަށް ވަނީ ނިންމާފައެވެ. .