އިސްލާމް ދީނަށާއި ދިވެހި ޤައުމަށް ލޯބިކުރާ ހަރުދަނާ ޙަރަކާތްތެރި ދަރިން ތަރުބިއްޔަތު ކުރުމުގައި، ތަޢުލީމާއި ތަޢުލީމާއި ތަރުބިއްޔަތަށް އަހައްމިއްޔަތުކަން ދީގެންކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
މިއަދު ފެށުނު ދިރާސީ އާ އަހަރާއި ގުޅުވައިގެން ރައީސް އެކްސްގައި ކުރެއްވި ޕޯސްޓުގައި ވަނީ ތަޢުލީމަކީ މުސްތަޤްބަލުގެ ޖީލެއް ބިނާކުރުމުގެ ބިންގަލެއްކަން ފާހަގަކުރައްވާފައެވެ.
ރައީސް ވަނީ ތަޢުލީމު އުނގެނުމާއި އުނގަންނައިދިނުމަކީވެސް ވަރަށް ބޮޑު ދީނީ އަދި ޤައުމީ ޒިންމާއެއްކަން ފާހަގަކުރައްވާ، އުނގެނުމާއި، އުނގަންނައިދިނުމަކީ، ހަމައެކަނި ތަޢުލީމީ މަސްއޫލިއްޔަތެއް ނޫން ކަމަށާއި، އެއީ ދީނީ އަދި ޤައުމީ މަސްއޫލިއްޔަތެއްކަން ހަނދާންކޮށްދެއްވާފައެވެ. އަދި ދިވެހީން އެދޭ ފާގަތި ކުރިމަގު މި ޤައުމަށް ހޯދައިދެވޭނީ މި ޒިންމާ އަދާކުރުމުގައި އެންމެން އެއްބާރުލައި އިޚްލާޞްތެރިވީ މިންވަރަކުން ކަމަށްވެސް ރައީސް ވިދާޅުވެފައިވެއެވެ.
“މި އަހަރަށް ސްކޫލްތަކުގެ ކިޔެވުން މިއަދު ފަށާއިރު، ތަޢުލީމީ ދާއިރާގެ އެންމެހާ ހިންގުންތެރީންނަށާއި ޓީޗަރުންނަށް، ބެލެނިވެރީންނަށާއި ލޮބުވެތި ދަރިވަރުންނަށްވެސް އަޅުގަނޑު އެދެނީ ކާމިޔާބީ. ތަޢުލީމު އުނގެނުމާއި އުނގަންނައިދިނުމަކީވެސް ވަރަށް ބޮޑު ދީނީ އަދި ޤައުމީ ޒިންމާއެއް. ދިވެހީން އެދޭ ފާގަތި ކުރިމަގު މި ޤައުމަށް ހޯދައިދެވޭނީ މި ޒިންމާ އަދާކުރުމުގައި އަޅުގަނޑުމެން އެންމެން އެއްބާރުލައި އިޚްލާޞްތެރިވީ މިންވަރަކުން.” ރައީސްގެ ޕޯސްޓުގައި ވިދާޅުވެފައިވެއެވެ.
މީގެއިތުރުން ރައީސް ވަނީ މިއަދު ފެށި ދިރާސީ އައު އަހަރާއި ގުޅުވައިގެން ތަޢުލީމީ ދާއިރާގެ އެންމެހާ ހިންގުންތެރީންނަށާއި ޓީޗަރުންނަށް، ބެލެނިވެރީންނަށާއި ދަރިވަރުންނަށް ކާމިޔާބީއަށް އެދިފައެވެ.