ކުރިއަށް އޮތް ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގައި ވާދަކުރުމަށް އެދި ފޯމު ހުށަހެޅުމަށް ކަނޑައަޅާފައިވާ ވަގުތު އިލެކްޝަންސް ކޮމިޝަން (އީސީ) އިން އިތުރުކޮށްފިއެވެ. މި ބަދަލާއެކު އޮންލައިންކޮށް ފޯމު ހުށަހަޅާ ފަރާތްތަކަށް އިތުރު ދެ ގަޑިއިރުގެ ފުރުސަތު ލިބިގެންދާނެ ކަމަށް އެ ކޮމިޝަނުން މައުލޫމާތު ދެއެވެ.
އިލެކްޝަންސް ކޮމިޝަނުން މިއަދު އާންމުކުރި އުސޫލުގައިވާ ގޮތުން، މިއަދުން ފެށިގެން ފެބުރުވަރީ މަހުގެ 1 ވަނަ ދުވަހުގެ ނިޔަލަށް ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:30 އިން ހަވީރު 5:30 އާ ހަމައަށް ފޯމު ހުށަހެޅޭނެއެވެ. އަދި ހުކުރު ދުވަސްތަކުގައި މެންދުރުފަހު 3:30 އިން ފެށިގެން ރޭގަނޑު 8:00 އާ ހަމައަށް ފޯމު ބަލައިގަތުމުގެ މަސައްކަތް ކުރިއަށްދާނެ ކަމަށް އެ ކޮމިޝަނުން ބުނެފައިވެއެވެ.
މީގެ ކުރިން އީސީން ނިންމާފައި އޮތީ ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:30 އިން މެންދުރުފަހު 3:30 އަށް، އަދި ހުކުރު ދުވަހު މެންދުރުފަހު 3:30 އިން ހަވީރު 6:00 އަށް ފޯމު ބަލައިގަތުމަށެވެ. ނަމަވެސް، އިންތިހާބަށް ކުރިމަތިލުމުގެ ފުރުސަތު މި މަހުގެ 17 އިން ފެށިގެން ހުޅުވާލާފައިވާއިރު، ގިނަ ބަޔަކަށް ފުރުސަތު ދިނުމުގެ ގޮތުން މިހާރު ވަނީ ވަގުތު އިތުރުކޮށްފައެވެ.
ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބަށް ކުރިމަތިލުމަށް މިހާތަނަށް ޖުމްލަ 2,591 ފޯމު ހުށަހަޅާފައިވާ ކަމަށް އީސީގެ ތަފާސްހިސާބުތަކުން ދައްކައެވެ. މި އިންތިހާބުގައި ވާދަކުރުމުގެ އެންމެ ފަހު ސުންގަޑިއަކީ އަންނަ ފެބުރުވަރީ މަހުގެ ފުރަތަމަ ދުވަހުގެ މެންދުރުފަހު 3:30 އެވެ.
އީސީން ހާމަކުރި ގޮތުގައި މި ދެ އިންތިހާބަށް މިހާތަނަށް 2،591 ފޯމު ވަނީ ލިބިފައެވެ.