ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އަންހެނުންގެ ގޮފީގެއާއި ޒުވާނުންގެ ގޮފީގެ ހިންގާ ކޮމިޓީއަށް މެންބަރުން އިންތިހާބުކޮށް، އެ ކޮމިޓީތައް އެކުލަވާލައިފިއެވެ. ޕާޓީގެ ފަރާތުން މިއަދު ވަނީ އިންތިހާބުވި ހުރިހާ މެންބަރުންނަށް ހޫނު މަރުހަބާއެއް ކިޔާފައެވެ.
ކޮންގްރެސް ޕާޓީގެ އަންހެނުންގެ ގޮފީގެ ރައީސާއަކީ ރައީސުލްޖުމްހޫރިއްޔާގެ އޮފީހުގެ ތަރުޖަމާން އަދި އެންސްޕާގެ މެނޭޖިން ޑިރެކްޓަރު ހީނާ ވަލީދު އެވެ. އަންހެނުންގެ ގޮފީގެ ހިންގާ ކޮމިޓީގައި ޖުމްލަ 15 މެންބަރުން ހިމެނެއެވެ.
މި ކޮމިޓީގައި ހިމެނޭ ފާހަގަކޮށްލެވޭ ބޭފުޅުންގެ ތެރޭގައި ރައްޔިތުންގެ މަޖިލީހުގެ ދެ މެންބަރުން ކަމަށްވާ ނިލަންދޫ ދާއިރާގެ މެންބަރު ފާތިމަތު ސައުދާ އާއި ހުރާ ދާއިރާގެ މެންބަރު ޑރ. އަނާރާ ނައީމް ހިމެނިވަޑައިގަންނަވައެވެ.
ޕީއެންސީގެ ޒުވާނުންގެ ގޮފި ނުވަތަ ޔޫތު ވިންގުގެ ރައީސަކަށް އިންތިހާބުކޮށްފައިވަނީ ހަނާން މުހައްމަދު ރަޝީދު އެވެ. ޒުވާނުންގެ ގޮފީގެ ހިންގާ ކޮމިޓީގައިވެސް ޖުމްލަ 15 މެންބަރުން ތިއްބަވާއިރު، އޭގެ ތެރޭގައި ހަތަރު އަންހެން މެންބަރުން ހިމެނެއެވެ.