ބޭންކް އޮފް މޯލްޑިވްސް (ބީއެމްއެލް) އިން ދޫކޮށްފައިވާ ކްރެޑިޓް ކާޑުތަކުން ރާއްޖޭން ބޭރުގެ މުއާމަލާތްތައް ކުރެވޭ ލިމިޓް އިތުރުކުރުމަށް އެ ބޭންކުން ނިންމައިފިއެވެ. އަންނަ ފެބުރުއަރީ މަހުގެ 1 ވަނަ ދުވަހުން ފެށިގެން އަމަލުކުރަން ފަށާ މި ބަދަލަކީ ކޮންމެ މީލާދީ މަހަކަށް ކަނޑައަޅާފައިވާ ލިމިޓެކެވެ. މި ބަދަލާއެކު ބޭންކުން ދޫކުރާ ތިން ބާވަތެއްގެ ކްރެޑިޓް ކާޑަކުން ރާއްޖޭން ބޭރުން ގަންނަ މުދަލާއި ޚިދުމަތްތަކަށް ފައިސާ ދެއްކުމުގައި ކަސްޓަމަރުންނަށް ބޮޑު ލުޔެއް ލިބިގެންދާނެއެވެ.
ބޭންކުން ހާމަކޮށްފައިވާ ތަފްސީލުތަކަށް ބަލާއިރު، ކްލެސިކް ކްރެޑިޓް ކާޑުގެ ލިމިޓް 750 ޑޮލަރުން 1,400 ޑޮލަރަށް ވަނީ އިތުރުކޮށްފައެވެ. އަދި ގޯލްޑް ކްރެޑިޓް ކާޑުގެ ލިމިޓް 750 ޑޮލަރުން 1,500 ޑޮލަރަށް ބޮޑުކޮށްފައިވާއިރު، ޕްލެޓިނަމް ކްރެޑިޓް ކާޑުގެ ލިމިޓް ވަނީ 1,500 ޑޮލަރުން 3,000 ޑޮލަރަށް އިތުރުކޮށްފައެވެ. ބީއެމްއެލްއިން ވިދާޅުވީ މިއީ ކޮންމެ ކަސްޓަމަރަކަށް ޑެބިޓް ކާޑުން ބޭނުންކުރެވޭ ލިމިޓުގެ އިތުރަށް، އެ ކަސްޓަމަރެއްގެ ކްރެޑިޓް ކާޑަށް ވަކިން ހަމަޖައްސާފައިވާ ލިމިޓެއް ކަމަށެވެ.
މި ބަދަލަކީ މިދިޔަ ނޮވެމްބަރު މަހު ޑެބިޓް ކާޑުތަކުގެ ލިމިޓަށް ގެނައި ބަދަލުތަކަށްފަހު ގެނެވުނު އިތުރު ކުރިއެރުމެކެވެ. މީގެ ކުރިން ޑެބިޓް ކާޑުތަކުން ރާއްޖޭން ބޭރުގެ ޕީއޯއެސް ޓާމިނަލްތަކުން ފައިސާ ދެއްކޭ އަދަދު 1,000 ޑޮލަރަށް ވަނީ އިތުރުކޮށްފައެވެ. އަދި އެއާލައިން ޓިކެޓާއި، ހޮޓާ އަދި ބޭސްފަރުވާގެ ޚަރަދުތަކަށް ޑެބިޓް ކާޑުން 3,000 ޑޮލަރާ ހަމައަށް ޚަރަދުކުރެވޭނެ އިންތިޒާމު ވެސް ބޭންކުން ވަނީ މީގެ ކުރިން ހަމަޖައްސާފައެވެ.
ބޭންކް އޮފް މޯލްޑިވްސްއިން ޑޮލަރު ލިމިޓުތަކަށް މި ބަދަލުތައް ގެނެސްފައިވަނީ ބޭރުފައިސާގެ މައްސަލަ ހައްލުކުރުމަށް ސަރުކާރުން ގެންގުޅުއްވާ ސިޔާސަތުތަކުގެ ދަށުންނެވެ. ޚާއްޞަކޮށް ފަތުރުވެރިކަމުގެ ސިނާޢަތުން ލިބޭ ޑޮލަރު ބޭންކުތަކަށް މާރުކުރަންޖެހޭ ގޮތަށް ޤާނޫނަށް ގެނައި ބަދަލާއެކު، ބޭންކުތަކަށް ޑޮލަރު ލިބުމުގައި ހުރި ދަތިތަކަށް ހައްލު ލިބެމުންދާކަން ބޭންކުން ފާހަގަކުރެއެވެ.