ހދ. ކުޅުދުއްފުށި ސިޓީގެ އެކި ފިހާރަތަކަށް އޮޅުވާލައިގެން ސައްހަނޫން ޕޭމަންޓް ސްލިޕް ފޮނުވައިގެން ވިޔަފާރިކުރި މައްސަލައެއްގައި މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ. ކޯޓު އަމުރެއްގެ ދަށުން މިދިޔަ ޖަނަވަރީ މަހުގެ 29 ވަނަ ދުވަހު ހައްޔަރުކޮށްފައިވަނީ ހދ. ކުޅުދުއްފުށި، ފައިންސް، އުމުރުން 33 އަހަރުގެ ޙަސަން މޫސާ އެވެ.
ފުލުހުންގެ ތަހުގީގުން މިހާތަނަށް ހާމަވެފައިވާ ގޮތުގައި، ޙަސަން މޫސާ ވަނީ ކުޅުދުއްފުށީގެ އެކި ފިހާރަތަކަށް ސައްހަ ނޫން ޓްރާންސްފާ ސްލިޕްތައް ދައްކައިގެން 3،000 އަށް ވުރެ ގިނަ ރުފިޔާގެ މުދާ ހޯދާފައެވެ. މިއީ ވިޔަފާރިވެރިންގެ އިތުބާރު ނަގާލައި، މަކަރާއި ހީލަތުން މަންފާ ހޯދުމަށް ހިންގާފައިވާ އަމަލެއްގެ ގޮތުގައި ފުލުހުން ވަނީ ސިފަކޮށްފައެވެ.
މި މައްސަލައާ ގުޅިގެން ހައްޔަރުކުރި ޙަސަން މޫސާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، އޭނާ ބަންދުގައި ބެހެއްޓުމަށް ހަތް ދުވަހުގެ މުއްދަތެއް ކޯޓުން ވަނީ ދީފައެވެ. ފުލުހުންގެ އިދާރާއިން މިހާރު ގެންދަނީ މި މައްސަލައާ ގުޅިގެން ބަލަންޖެހޭ އިތުރު ކަންކަން ތަހުގީގު ކުރަމުންނެވެ.
މީގެ އިތުރުން، އެހެން އެއްވެސް ފިހާރައަކުން ޙަސަން މޫސާ މިފަދަ ގޮތަކަށް މަކަރާއި ހީލަތުން ވިޔަފާރިކޮށްފައިވާނަމަ، އެކަން ލަސްނުކޮށް ކުޅުދުއްފުށި ސިޓީ ޕޮލިހަށް ރިޕޯޓުކުރުމަށް ފުލުހުން ވަނީ އިލްތިމާސްކޮށްފައެވެ.