ކ. ތިލަފުށީގެ ވޯކް ސައިޓެއްގައި މަސައްކަތް ކުރަމުންދިޔަ ބަންގްލަދޭޝްގެ ރައްޔިތެއް ކަމަށްވާ އުމުރުން 24 އަހަރުގެ އަމީން މިއާ މަރުވި މައްސަލާގައި، އެކްސްކަވޭޓަރު އޮޕަރޭޓް ކުރަން އިން ސްރީ ލަންކާގެ މީހާގެ މައްޗަށް ގަސްދަކާނުލައި މީހަކު މެރުމުގެ ކުށުގެ ތުހުމަތު ފުލުހުން ކޮށްފިއެވެ. މިދިޔަ މަހުގެ 26 ވަނަ ދުވަހު ގެއްލިގެން ހޯދަމުންދަނިކޮށް އަމީން މިއާގެ ހަށިގަނޑު ފެނިފައިވަނީ މިދިޔަ މަހުގެ 28 ވަނަ ދުވަހު ކުނިތަކެއްގެ ތެރޭގައި މަރުވެފައި އޮއްވައެވެ.
މި މައްސަލާގައި ހައްޔަރުކޮށްފައިވަނީ އުމުރުން 32 އަހަރުގެ ހެޝަން މަދުރަންގަ ޑިސަނަޔަކަ މެނިކަ ނަމަކަށް ކިޔާ ލަންކާ މީހެކެވެ. އޭނާގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، ކޯޓުން ވަނީ އޭނާ ބަންދުގައި ބެހެއްޓުމަށް 7 ދުވަހުގެ މުއްދަތެއް ދީފައެވެ. ކޯޓު އަމުރުގައިވާ ގޮތުން އޭނާގެ މައްޗަށް ތުހުމަތު ކުރެވޭ މިންވަރަށް ފުލުހުން ވަނީ ހާދިސާގެ ރިޕޯޓާއި ސީސީޓީވީ ސްނެޕްޝޮޓްތައް ހިމެނޭހެން ހެކި ހުށަހަޅާފައެވެ.
ފުލުހުންގެ ތަހުގީގަށް މިހާތަނަށް އެނގިފައިވާ ގޮތުގައި، އަމީން މިއާ މަރުވީ ލަންކާ މީހާ ދުއްވަން އިން އެކްސްކަވޭޓަރުގެ ދަތްގަނޑުން ޖެހި ވެއްޓުމުގެ ސަބަބުންނެވެ. އެކްސްކަވޭޓަރުން ޖެހި އޭނާ ވެއްޓުމުން، ކުނިތަކާ އެކު އޭނާގެ ހަށިގަނޑު އެހެން ދިމާލަކަށް ބަދަލުވެ، ގައިމައްޗަށް ކުނި އެޅުނީ ކަމަށް ފުލުހުން ބުނެއެވެ. ނަމަވެސް، މިއީ އެކްސްކަވޭޓަރު ދުއްވަން އިން މީހާއަށް އެނގިގެން ހިނގި ކަމެއްކަން ނުވަތަ ނޫންކަން އަދި ކަށަވަރެއް ނުވެއެވެ.
ސީސީޓީވީ ފުޓޭޖްތަކުން ފެންނަ ގޮތުގައި، އެކްސްކަވޭޓަރުގެ ދަތްގަނޑުން އަމީން މިއާގެ ގައިގައި ޖެހުނު ނަމަވެސް، ޑްރައިވަރު ވަނީ މެދުކެނޑުމެއް ނެތި މަސައްކަތް ކުރިއަށް ގެންގޮސްފައެވެ. އައިއޯ ކޯޓުގައި ވިދާޅުވި ގޮތުގައި، ލަންކާ މީހާ އެކްސްކަވޭޓަރު އޮޕަރޭޓްކޮށްފައި ވަނީ ބަލަންޖެހޭ މިންވަރަށް ސަމާލުކަން ނުދީ ފަރުވާކުޑަ ގޮތަކަށެވެ. ފުލުހުން ދަނީ މި ހާދިސާ އިތުރަށް ތަހުގީގު ކުރަމުންނެވެ.