ކުރިއަށް އޮތް ލޯކަލް ކައުންސިލް އިންތިހާބުގައި ތ. ވިލުފުށީގެ ދިހަ ގޮނޑީގެ ތެރެއިން އަށް ގޮނޑި، ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އަށް ވޯޓަކާ ނުލައި ކާމިޔާބުވެއްޖެއެވެ. މި އިންތިހާބުގައި ވިލުފުށިން ހޮވަންޖެހެނީ ކައުންސިލްގެ ރައީސާއި ހަތަރު މެންބަރުންގެ އިތުރުން، އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ރައީސާއާއި އެ ކޮމިޓީގެ ހަތަރު މެންބަރުންނެވެ. ނަމަވެސް ކައުންސިލްގެ ހަތަރު މެންބަރުންގެ ގޮނޑިއާއި އަންހެނުންގެ ކޮމިޓީގެ ހަތަރު މެންބަރުންގެ ގޮނޑިއަށް ކޮންގްރެސް ޕާޓީގެ ކެންޑިޑޭޓުން ފިޔަވައި އިތުރު ބަޔަކު ކުރިމަތިލާފައި ނުވާތީ، އެ އަށް ގޮނޑި ވަނީ އެ ޕާޓީއަށް ކަށަވަރުވެފައެވެ.
މި އިންތިހާބުގައި ވޯޓުލުން ކުރިއަށްދާނީ ހަމައެކަނި ކައުންސިލްގެ ރައީސްގެ މަގާމާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ރައީސާގެ މަގާމަށެވެ. އެ ދެ މަގާމަށް ކޮންގްރެސް ޕާޓީގެ ކެންޑިޑޭޓުންގެ އިތުރުން މިނިވަން ކެންޑިޑޭޓުން ވާދަކުރައްވާތީ، އެ މަގާމުތަކަށް ބޭފުޅުން އިންތިހާބުކުރާނީ ރައްޔިތުންގެ މެދުގައި ނަގާ ސިއްރު ވޯޓަކުންނެވެ. މިއީ އެ ރަށުގެ ސިޔާސީ ތާރީޚުގައި ވެސް ފާހަގަކޮށްލެވޭ ފަދަ ބޮޑު ކާމިޔާބީއެއް ކަމަށް ސަރުކާރު ކޯލިޝަނުން ދެކެއެވެ.
މި ކާމިޔާބީއާ ގުޅޭގޮތުން ވިލުފުށީ ދާއިރާގެ މަޖިލިސް މެންބަރު ހަސަން ވަހީދު ވިދާޅުވީ، ވިލުފުއްޓަކީ މީގެ ކުރިން އިދިކޮޅު އެމްޑީޕީގެ ބޮޑު ތާއީދެއް އޮތް ރަށެއް ނަމަވެސް، މިފަހަރު އެ ޕާޓީން ކެންޑިޑޭޓުން ނުނެރެން ނިންމީ ރަށުގެ ތަރައްގީއަށް ހުރަސްއަޅަން ރައްޔިތުން ބޭނުން ނުވާތީ ކަމަށެވެ. އަދި މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ ރަށުގެ ތަރައްގީއަށް ކުރައްވަމުން ގެންދަވާ މަސައްކަތްޕުޅުތަކަށް ރައްޔިތުން ދިން ވަރަށް ބޮޑު ހަދިޔާއެއްގެ ގޮތުގައި އޭނާ ސިފަކުރެއްވިއެވެ.
ރައީސް ޑރ. މުޢިއްޒުގެ ސަރުކާރުން ވިލުފުށީގައި އެއާޕޯޓް އެޅުމުގެ ބޮޑު މަޝްރޫއުގެ އިތުރުން، އުމްރާނީ ތަރައްގީގެ ގިނަ މަސައްކަތްތަކެއް މިހާރުވެސް ދަނީ ހިންގަމުންނެވެ. މެންބަރު ހަސަން ވަހީދު އިތުރަށް ވިދާޅުވީ، ރަށުގެ ރައްޔިތުން ތިބީ ސަރުކާރާއެކު ތަރައްގީގެ މަގުގައި ކުރިއަށްދާން ތައްޔާރަށް ކަމަށާއި، އިންތިހާބުގެ ނަތީޖާއިން އެކަން ވަރަށް ސާފުކޮށް ހާމަވެގެން ހިނގައްޖެ ކަމަށެވެ.