ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގައި، ވޯޓަކާ ނުލައި މިހާރު ވެސް ޕީއެންސީއަށް ހަތް އިންސައްތަ ގޮނޑި ކާމިޔާބު ކުރެވިފައިވާ ކަމަށް އެ ޕާޓީގެ ޕާލިމަންޓްރީ ގްރޫޕްގެ ލީޑަރު އިބްރާހިމް ފަލާހު ވިދާޅުވެއްޖެއެވެ. އައްޑޫ ސިޓީގައި ބޭއްވި ކެމްޕެއިން ޖަލްސާއެއްގައި ވާހަކަދައްކަވަމުން ފަލާހު ވިދާޅުވީ، އިންތިހާބުގެ ކުރިން ލިބުނު މި ކާމިޔާބީން ހާމަވަނީ ރައީސުލްޖުމްހޫރިއްޔާ އާއި ޕީއެންސީއަށް ރައްޔިތުންގެ އޮތް ބޮޑު ތާއީދު ކަމަށެވެ.
ފަލާހު ފާހަގަކުރެއްވި ގޮތުގައި ކެންޑިޑޭޓުން ނަން އަނބުރާ ގެންދިއުމަށް އިލެކްޝަންސް ކޮމިޝަނުން ދީފައިވާ މުއްދަތު އަންނަ ބުރާސްފަތި ދުވަހަށް ހަމަވާއިރު، އިންތިހާބަކާ ނުލައި ޕީއެންސީން ކާމިޔާބުކުރާ ގޮނޑީގެ އަދަދު 10 އިންސައްތައަށް އަރާނެ ކަމަށް ލަފާކުރެވެއެވެ. މީގެ އިތުރުން، އިދިކޮޅު އެމްޑީޕީގެ އެތެރޭގެ ކޯޅުންތަކާއި އަމަލުތައް ހުރި ގޮތުން، އެ ޕާޓީގެ ޓިކެޓުގައި ވާދަކުރާ ކެންޑިޑޭޓުން ވެސް އެމްޑީޕީއާއެކު ކުރިއަށް ދާން ބޭނުންނުވާ ކަމަށް އޭނާ ވިދާޅުވިއެވެ.
އައްޑޫ ސިޓީގެ ތަރައްގީއަށް އަލިއަޅުވާލައްވަމުން ފަލާހު ވިދާޅުވީ، ވޭތުވެދިޔަ 15 އަހަރުގެ ތެރޭގައި އެ ސިޓީއަށް ޕީއެންސީ ފިކުރުގެ މޭޔަރަކު އިންތިހާބު ކުރެވިފައި ނުވާތީ ތަރައްގީގެ ކަންކަމުގައި ވަރަށް ބޮޑަށް އިހުމާލުވެފައިވާ ކަމަށެވެ. އެހެންކަމުން، ސަރުކާރުން ފަށާފައިވާ މަޝްރޫއުތައް ބާރު ސްޕީޑުގައި ކުރިއަށް ގެންދިއުމަށްޓަކައި ހުރިހާ ސިޓީތަކަކާއި ރަށްތަކަކުން ވެސް ޕީއެންސީގެ ކެންޑިޑޭޓުން ހޮވައިދިނުމަށް އޭނާ ވަނީ ރައްޔިތުންގެ ކިބައިން އެދިވަޑައިގެންފައެވެ.
ޖަލްސާ ނިންމަވާލައްވަމުން ފަލާހު ވިދާޅުވީ، ޕީއެންސީން އެދޭ ފަދަ ބޮޑު އަޣުލަބިއްޔަތެއް ކައުންސިލްތަކުން ލިބިއްޖެނަމަ، މި ފަސް އަހަރުގެ ތެރޭގައި ރާއްޖެއިން މީގެ ކުރިން ދުވަހަކު ވެސް ދެކިފައި ނުވާ ފަދަ ބޮޑު ތަރައްގީއެއް ފެނިގެންދާނެ ކަމަށެވެ. ޕީއެންސީގެ އަމާޒަކީ ސަރުކާރުގެ ސިޔާސަތުތައް ތަންފީޒުކުރުމުގައި ކައުންސިލްތަކުގެ ފުރިހަމަ އެއްބާރުލުން ހޯދައި، ރައްޔިތުންނަށް ބޭނުންވާ ހިދުމަތްތައް އަވަސްކުރުން ކަމަށް ވެސް އޭނާ ވިދާޅުވިއެވެ.