މާލޭގެ މޫނުމަތީގެ މަގުތައް ތަރައްގީކޮށް ބޮޑުތަކުރުފާނު މަގު ފުޅާކުރުމަށް ކުރިއަށްގެންދާ މަޝްރޫއުގެ ދެވަނަ ސެގްމަންޓްގެ މަސައްކަތް ނިންމާލުމަށްފަހު، އެ ސަރަހައްދު އިއްޔެ އާންމުންނަށް ހުޅުވާލައިފިއެވެ. މަސްމާރުކޭޓުން ފެށިގެން ބާޒާރުމަތީ ފިހާރަތަކާ ހަމައަށް އޮންނަ މި ސަރަހައްދު ތާރުއަޅައިގެން ތަރައްގީކޮށް ހުޅުވާލާފައިވަނީ، ކުރިންވެސް ރޭވިފައި އޮތް ގޮތަށް ރަމަޟާން މަހުގެ ކުރިންނެވެ. މަގު ހުޅުވުމުގެ ކުރިން އެ ސަރަހައްދުގައި ގަސް އިންދުމުގެ ހަރަކާތެއްވެސް ވަނީ ކުރިއަށް ގެންގޮސްފައެވެ.
މި މަޝްރޫއާ ގުޅޭގޮތުން ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތަލިބް ވިދާޅުވީ، ކުރިން އެއްކޮޅަށް ދުއްވޭ ގޮތަށް އޮތް މި ސަރަހައްދު މިހާރު ވަނީ ދެކޮޅަށް ދުއްވޭ ގޮތަށް ބަދަލުކޮށްފައި ކަމަށެވެ. މިނިސްޓަރު ވިދާޅުވި ގޮތުގައި، ޗާންދަނީ މަގުން ފެށިގެން ފާލަންދޮށު ހިނގުމާ ހަމައަށް ގެނައި މި ބަދަލުގެ ސަބަބުން، ބާޒާރުމަތީގެ ބާރުބޮޑުވުމުގެ މައްސަލައަށް އެކަށީގެންވާ ހައްލެއް ލިބިގެންދާނެއެވެ.
މާލޭގެ މޫނުމަތި ޒަމާނީ ފެންވަރަށް ތަރައްގީކުރުމުގެ މަސައްކަތް ބަހާލާފައިވަނީ ޖުމްލަ ތިން ސެގްމަންޓަކަށެވެ. މީގެ ތެރެއިން ރަސްމީ ފާލަން ހިމެނޭ ސަރަހައްދުން ފެށިގެން ލޯކަލް މާރުކޭޓާ ހަމައަށް ހިމެނޭ ފުރަތަމަ ސެގްމަންޓްގެ މަސައްކަތް ނިންމައި ބޭނުންކުރަން ފަށާފައިވަނީ މިދިޔަ ޑިސެމްބަރު މަހުގެ ތެރޭގައެވެ. މި މަޝްރޫއަކީ މާލޭގެ ޓްރެފިކް ފްލޯ ރަނގަޅުކުރުމަށް ސަރުކާރުން އިސްކަންދީގެން ކުރިއަށްގެންދާ މުހިންމު މަސައްކަތެކެވެ.
އެމްޓީސީސީއާ ހަވާލުކޮށްގެން ކުރިއަށްގެންދާ މި މަގު ހެދުމުގެ މަޝްރޫއުގެ ދަށުން، ދެވަނަ ސެގްމަންޓްގެ މަސައްކަތް ނިމުމާއެކު ބާޒާރުމަތީގެ ދަތުރުފަތުރަށް ބޮޑު ލުޔެއް ލިބޭނެ ކަމަށް ބެލެވެއެވެ. މި މަޝްރޫއުގެ ތިންވަނަ ސެގްމަންޓްގެ މަސައްކަތްތައްވެސް ކުރިއަށް އޮތް ތަނުގައި ކުރިއަށްދާނެއެވެ.