ސަރުކާރުގެ ސައްތައިންސައްތަ ހިއްސާވާ ކުންފުންޏެއް ކަމަށްވާ ގްރޭޓަ މާލެ ފައިނޭންޝަލް ޑިސްޓްރިކްޓް ލިމިޓެޑްގެ ނަން “މޯލްޑިވްސް އިކޮނޮމިކް ގޭޓްވޭ ޑިވެލޮޕްމަންޓް ލިމިޓެޑް” ގެ ނަމަށް ބަދަލުކޮށްފިއެވެ. މި ބަދަލަކީ ރާއްޖޭގެ އިގްތިސާދު ފުޅާކޮށް، ބައިނަލްއަގުވާމީ މާލީ މަރުކަޒަކަށް ރާއްޖެ ހެދުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން ގެނައި ބަދަލެކެވެ.
ރައީސް އޮފީހުން ހާމަކޮށްފައިވާ ގޮތުގައި، ކުންފުނީގެ ނަމާއި މަގުސަދުތަކަށް ބަދަލު ގެނައުމަށް ނިންމީ އެ ކުންފުނީގެ ބޯޑުން އެގޮތަށް ނިންމެވުމާ ގުޅިގެންނެވެ. މި ކުންފުންޏަކީ ރާއްޖޭގެ އުފެއްދުންތެރިކަން އިތުރުކުރުމަށާއި، ޑިޖިޓަލް ފައިނޭންޝަލް ޚިދުމަތްތަކާއި، ޑިޖިޓަލް ބޭންކިންގގެ އިތުރުން ރިއަލް އެސްޓޭޓާއި ފައިނޭންޝަލް ޓޫރިޒަމް ފަދަ ދާއިރާތައް ތަރައްގީކުރުމަށް މިދިޔަ އަހަރު އުފެއްދި ކުންފުންޏެކެވެ.
ކުންފުނީގެ ނަން ބަދަލުކުރުމާ ގުޅޭގޮތުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނެރުއްވި ގަރާރުގައިވާ ގޮތުން، މި ބަދަލަކީ ރާއްޖޭގެ ސަރަހައްދުގެ އިސްތިރާޖީ މަންފާ އެންމެ އެދެވޭ ގޮތެއްގައި ހާސިލުކުރުމަށް މުހިންމު ބަދަލެކެވެ. ވަކިން ހާއްސަކޮށް “ތިލަދުންމަތީ އުތުރުބުރީ އިހަވަންދިއްޕޮޅު” ތަރައްގީކުރުމުގެ ބޮޑު މަޝްރޫއު ވިލަރެސްކޮށް، ދެމެހެއްޓެނިވި ގޮތެއްގައި އެ މަސައްކަތްތައް ކުރިއަށް ގެންދިއުމަކީ މި ކުންފުނީގެ މައިގަނޑު އެއް އަމާޒެވެ.
މީގެ އިތުރުން، ރާއްޖޭގައި މާލީ ޚިދުމަތްތަކުގެ ސިނާއަތް ކުރިއަރުވައި، ބައިނަލްއަގުވާމީ ފެންވަރުގެ މާލީ މަރުކަޒަކަށް ރާއްޖެ ބަދަލުކުރުމުގެ ތަސައްވުރު ހާސިލުކުރުމަށް މި ކުންފުނި ހާއްސަވެގެން މަސައްކަތް ކުރާނެއެވެ. މިކަމުގެ ސަބަބުން ރާއްޖޭގެ އިގްތިސާދީ ދާއިރާއަށް އާ އިންވެސްޓްމަންޓްތަކާއި ފުރުސަތުތައް ފަހިވެގެންދާނެ ކަމަށް ސަރުކާރުން އުންމީދު ކުރެއެވެ.