މަސްތުވާތަކެއްޗާ ދެކޮޅަށް ސަރުކާރުން ކުރަމުންދާ މަސައްކަތްތަކުގެ ތެރެއިން، ފާއިތުވި ދޮޅު މަސް ދުވަހުގެ ތެރޭގައި 72.2 މިލިއަން ރުފިޔާގެ މަސްތުވާތަކެތި އަތުލައިގެންފައިވާ ކަމަށް ހޯމް މިނިސްޓަރު އަލީ އިހުސާން ހާމަކުރައްވައިފިއެވެ. ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ވިދާޅުވީ، ރާއްޖޭގައި މަސްތުވާތަކެތީގެ ސަޕްލައި މަދުކުރުމަށް ކުރަމުންދާ މަސައްކަތުގެ ދަށުން މި މުއްދަތުގެ ތެރޭގައި ޖުމްލަ 83،450 ކިލޯގެ މަސްތުވާތަކެތި އަތުލައިގަނެފައިވާ ކަމަށެވެ.
މިނިސްޓަރު އިހުސާން ވިދާޅުވި ގޮތުގައި، މި ސަރުކާރުގެ އެންމެ އިސް އެއް އަމާޒަކީ ރާއްޖޭގައި އޮތް މަސްތުވާތަކެތީގެ މައްސަލައަށް ދާއިމީ ހައްލެއް ހޯދައިދިނުމެވެ.
“އަޅުގަނޑުމެން މި ދައުރު ފަށަމުން ވެސް ދެންނެވިން، މި ސަރުކާރުގެ އެންމެ އިސް އެއް އަމާޒަކީ ރާއްޖޭގަ މިއޮތް މަސްތުވާތަކެތީގެ މައްސަލައަށް ދާއިމީ ހައްލެއް ގެނައުން ކަމަށް،” މިނިސްޓަރު ވިދާޅުވިއެވެ.
މިގޮތުން ސަޕްލައި ރިޑަކްޝަންގެ މަސައްކަތުން ފާއިތުވި ކުރު މުއްދަތުގެ ތެރޭގައި ބޮޑެތި ކުރިއެރުންތަކެއް ލިބިފައިވާކަން އޭނާ ފާހަގަކުރެއްވިއެވެ.
މަސްތުވާތަކެތި އަތުލައިގަތުމުގެ މި އޮޕަރޭޝަންތައް ކާމިޔާބުކަމާއެކު ކުރިއަށް ގެންދެވިފައިވަނީ ކަސްޓަމްސް އިން ބޯޑަރު ބެލެހެއްޓުމުގައި ގެންގުޅޭ އުސޫލުތަކަށް ގެނައި ބަދަލުތަކާއި، ފުލުހުންގެ އިންޓެލިޖެންސަށް ލިބޭ މައުލޫމާތުތަކުގެ އެހީގައެވެ. މިނިސްޓަރު ވިދާޅުވީ މިފަދަ ބޮޑު އަދަދެއްގެ މަސްތުވާތަކެތި އަތުލައިގަނެވުމަކީ މަސްތުވާތަކެތީގެ ވިޔަފާރިކުރާ ފަރާތްތަކަށް ލިބުނު ބޮޑު ނާކާމިޔާބީއެއް ކަމަށެވެ.
މަސްތުވާތަކެތީގެ ވަބާއިން ގައުމު ސަލާމަތްކުރުމަށްޓަކައި ފުލުހުން މިހާރު ވަނީ “އަލިމަގު” ނަމުގައި މުޅި ރާއްޖެއަށް އަމާޒުކޮށްގެން ހާއްސަ އޮޕަރޭޝަނެއް ފަށާފައެވެ..