ކުރިއަށް އޮތް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީތަކުގެ އިންތިހާބުގައި ސަރުކާރު ހިންގާ ޕާޓީ ޕީއެންސީއަށް ދޭ ވޯޓަކީ މާލޭގެ ތަރައްގީއަށް އާނއެކޭ ބުނުމަށް ދެވޭ ވޯޓެއް ކަމަށް ޕީއެންސީގެ މޭޔަރު ކެންޑިޑޭޓް މޫސާ އަލީ ޖަލީލް ވިދާޅުވެއްޖެ އެވެ.
މޫސާ ޢަލީ ޖަލީލް މި މޭރުމުން ވިދާޅުވީ، ކޮންގްރެސް ޕާޓީން އާރޓިފިޝަލް ބީޗު ސަރަޙައްދުގައި ރޭ ކުރިއަށްގެންދިޔަ ހަރުގެ ޖަލްސާގައި ވާހަކަދައްކަވަމުންނެވެ. އޭނާ ވިދާޅުވީ، ފާއިތުވި ދެތިން އަހަރެއްހައި ދުވަހުގެ ތެރޭގައި މާލޭ ސިޓީގެ ތަރައްޤީއަށް ސަރުކާރުން ފަށާފައިވާ އެތައް މަޝްރޫޢަކަށް ސިޓީ ކައުންސިލުން އެއްބާރުލުން ނުދިނުމުގެ ސަބަބުން، އެކަމުގެ ހުރިހާ ދަތިތަކެއް އާންމު ރައްޔިތުންނަށް ކުރިމަތިވެފައިވާ ކަމަށެވެ.
މި ޖަލްސާގައި މޫސާ އަލީ ޖަލީލް ވަނީ ޕީއެންސީގެ ކެންޑިޑޭޓުންނަށް ވޯޓް ދިނުމަށް މާލޭގެ ރައްޔިތުންގެ ކިބައިން އެދިވަޑައިގެންފައެވެ. ޕީއެންސީގެ ކެންޑިޑޭޓުންނަށް ދޭ ކޮންމެ ވޯޓަކީ ހިތްފަސޭހަ މަގުމައްޗެއް އުފައްދައި އިންތިޒާމުކުރުމަށް އާނއެކޭ ބުނުމުގެ ވޯޓެއް ކަމަށް މޫސާ އަލީ ޖަލީލް ވިދާޅުވިއެވެ.
އަދި އެއީ މާލޭ ސިޓީ ކައުންސިލަށް ހަރުދަނާ ޒަމާނީ އިދާރީ ހިންގުމަކަށް އާނއެކޭ ބުނުމުގެ ވޯޓެއް ކަމުގައި ވިދާޅުވި އެވެ.
“ތިޔަ ލޮބުވެތި ރައްޔިތުން އަޅުގަނޑާއި އަޅުގަނޑުގެ ޓީމަށް ދެއްވާ ވޯޓަކީ، މާލެ ސިޓީގެ ތަރައްޤީއަށް އާނއެކޭ ބުނުމުގެ ވޯޓު. އެއީ ބިންވެރި ރައްޔިތެއްކަމުގައިވުމަށް އާނއެކޭ ބުނުމުގެ ވޯޓު. އެއީ ޗާލު މާލެއެއް ދުށުމަށް އާނއެކޭ ބުނުމުގެ ވޯޓު. އެއީ ހިތްފަސޭހަ މަގުމައްޗެއް އުފައްދައި އިންތިޒާމުކުރުމަށް އާނއެކޭ ބުނުމުގެ ވޯޓު. އެއީ ފުދުންތެރި ދިރިއުޅުމަކަށް އާނއެކޭ ބުނުމުގެ ވޯޓު. އެއީ ޑިޖިޓަލް މާލެއެއް ގާއިމުކުރަން އާނއެކޭ ބުނުމުގެ ވޯޓު. އަދި އެއީ މާލޭ ސިޓީ ކައުންސިލަށް ހަރުދަނާ ޒަމާނީ އިދާރީ ހިންގުމަކަށް އާނއެކޭ ބުނުމުގެ ވޯޓު. ހަމަ އެހެންމެ އެއީ ކުޑަކުދީންނާއި ޒުވާނުންނާއި ހަރުމީހުންނާއި އިސްރަށްވެހީންނަށް އަމާންކަމާއި އުފާވެރިކަމާއި ކުރިއެރުން އިޙްސާސްކޮށްދޭނެކަން ކަށަވަރުވާ ވޯޓު,” މޫސަ ވިދާޅުވި އެވެ.
މޫސާ އަލީ ޖަލީލް ވިދާޅުވީ މާލެއާމެދު ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ތަސައްވުރެއް އެބައޮތް ކަމަށާއި އަދި އެ ތަސައްވުރު ހަގީގަތަކަށް ހެދުމުގައި ފުރިހަމަ އެހީތެރިކަން ދޭނެ މޭޔަރަކަށް އެމަނިކުފާނު ވެވަޑައިގަންނަވާނެ ކަމުގައި ވިދާޅުވި އެވެ.
މޫސާ އަލީ ޖަލީލް ވިދާޅުވީ އިރާދަކުރެއްވިޔާ މާލެ ސިޓީގެ ކޮންމެ ރައްޔިތަކަށް ކޮންމެ އާއިލާއަކަށް ކޮންމެ ގޭބީސީއަކަށް ދެން ކުރިއަށް އޮތީ އުފާވެރި ދުވަސްތަކެއް ކަމަށެވެ. އެ ދުވަސް ހޯދުމަށް ހުރިހާ ރައްޔިތުން ޕީއެންސީގެ ކެންޑިޑޭޓުންނަށް ވޯޓް ދިނުމަށް ވަނީ ތަކުރާރުކޮށް އެދިފަ އެވެ.