ދިވެހި އަދަބިއްޔާތާއި ތާރީޚުގެ ދާއިރާއިން ފާހަގަކޮށްލެވޭ ފަދަ ބޮޑެތި ޚިދުމަތްތަކެއް ކުރައްވާފައިވާ އަލްއުސްތާޛު ކަޝީމާ އަޙްމަދު ޝާކިރަށް، ދައުލަތުން ދޭ އެންމެ މަތީ ޝަރަފުތަކުގެ ތެރޭގައި ހިމެނޭ “ނިޝާން ދިޔަމިގިލީ ބަންޑާރައިންގެ ޢިއްޒަތް” ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު އަރުވައިފިއެވެ. މި ޢިއްޒަތް އެރުވީ މިއަހަރުގެ ޤައުމީ ދުވަހުގެ މުނާސަބަތުގައި ހއ. އުތީމުގައި ބޭއްވި ރަސްމީ ޖަލްސާގައެވެ.
ކަޝީމާ އަޙްމަދު ޝާކިރަކީ 1969 ވަނަ އަހަރުން ފެށިގެން 41 އަހަރަށްވުރެ ދިގު މުއްދަތަކަށް ދައުލަތަށް ޚިދުމަތް ކުރައްވާފައިވާ ބޭފުޅެކެވެ. އެމަނިކުފާނު ވަނީ މިނިސްޓްރީ އޮފް ޓްރާންސްޕޯޓްގެ ލީގަލް ކައުންސެލް އަދި ޝިޕިންގ މާސްޓަރުގެ މަޤާމުގެ އިތުރުން، ދިވެހިބަހާއި ތާރީޚަށް ޚިދުމަތްކުރާ ޤައުމީ މަރުކަޒުގެ ޑިރެކްޓަރ ޖެނެރަލް އަދި އެގްޒެކެޓިވް ޑިރެކްޓަރުގެ މަޤާމު ފަދަ އިސް މަޤާމުތައް ފުރުއްވާފައެވެ.
ދައުލަތުގެ ވަޒީފާއިން ރިޓަޔަރ ކުރެއްވުމަށްފަހުވެސް ޝާކިރު ވަނީ ތަޢުލީމީ ދާއިރާގައި މުހިންމު މަސައްކަތްތަކެއް ކުރައްވާފައެވެ. އެގޮތުން ވިލާ ކޮލެޖުގައި 12 އަހަރަށްވުރެ ގިނަ ދުވަހު ކިޔަވައިދެއްވައި، ސީނިއަރ ކަރިކިއުލަމް ޑިވެލޮޕަރެއްގެ ގޮތުގައި މަސައްކަތް ކުރައްވާފައިވެއެވެ. މީގެއިތުރުން، އެމަނިކުފާނަކީ ރައްޔިތުންގެ މަޖިލީހާއި ރައްޔިތުންގެ ޚާއްޞަ މަޖިލީހުގައި މާލެ އަތޮޅުގެ މެންބަރުކަންވެސް ކުރައްވާފައިވާ ބޭފުޅެކެވެ.
އަދަބިއްޔާތާއި ފަންނުގެ ދާއިރާއިން ބަލާއިރު، ޝާކިރަކީ “ޣާޒީ ބަންޑާރައިން” އަދި “ދޮންހިޔަލަ އާއި އަލިފުޅު” ފަދަ މަޝްހޫރު ފިލްމުތަކުގެ ސްކްރީންޕްލޭ ލިޔުއްވި ކާމިޔާބު ލިޔުންތެރިއެކެވެ. ތާރީޚީ ދާއިރާއިން އެމަނިކުފާނު ކުރެއްވި އެންމެ ފާހަގަކޮށްލެވޭ މަސައްކަތަކީ ހަ މުޖައްލަދުގެ މައްޗަށް އެކުލެވޭ “ވިހިވަނަ ޤަރުނުގެ ތެރޭގައި ދިވެހިރާއްޖެ” މި ފޮތެވެ. އަދި އިސްލާމްދީނާއި، ޝަރުޢީ ދާއިރާ އަދި ދިވެހި ފައިސާއާ ގުޅޭގޮތުންވެސް ގިނަ ދިރާސާތަކެއް ކުރައްވާފައިވެއެވެ.
ޢުމުރުން 69 އަހަރުގައި މާސްޓަރ އޮފް ޝަރީޢާ ޙާޞިލްކުރައްވާފައިވާ ޝާކިރަށް މީގެކުރިން ވަނީ ފަންނުވެރިކަމާއި، ވާހަކަދެއްކުންތެރިކަމާއި، ތާރީޚީ ލިޔުންތެރިކަމުގެ ދާއިރާއިން ޝަރަފުވެރިކަމުގެ ޤައުމީ އިނާމުވެސް ލިބިވަޑައިގެންފައެވެ. މިއަދު އެރުވުނު ޢިއްޒަތަކީ އެމަނިކުފާނު ޤައުމަށް ކޮށްދެއްވި އަގުނުކުރެވޭފަދަ ޚިދުމަތްތަކުގެ އަގު ވަޒަންކުރުމުގެ ގޮތުން އެރުވުނު މަތިވެރި ޝަރަފެކެވެ.