ރާއްޖޭގެ ފަތުރުވެރިކަމަށް އައިސްފައިވާ ދަށްވުމާއި އިމްޕޯޓް ޚަރަދުތައް ބޮޑުވުމުގެ ސަބަބުން އިގުތިސާދަށް ކުރިމަތިވެފައިވާ ޕްރެޝަރާ ގުޅިގެން، ދައުލަތުގެ ޚަރަދުތައް ކުޑަކޮށް އާމްދަނީ އިތުރުކުރުމަށް ފިޔަވަޅުތަކެއް އަޅަން ނިންމާފައިވާ ކަމަށް ފިނޭންސް މިނިސްޓަރު ހަސަން ޒަރީރު ވިދާޅުވެއްޖެއެވެ.
ރައީސް އޮފީހުގައި ބޭއްވި މީޑިއާ ބްރީފިންއެއްގައި ވާހަކަދައްކަވަމުން މިނިސްޓަރު ޒަރީރު ވިދާޅުވީ، މެދުއިރުމަތީގެ ހަމަނުޖެހުންތަކާ ގުޅިގެން ރާއްޖެއަށް ފަތުރުވެރިން އަންނަ މިންވަރު ގާތްގަނޑަކަށް 30 އިންސައްތަ ދަށްވެފައިވާ ކަމަށެވެ. އަދި އެއާއެކު ތެލާއި ކާބޯތަކެތީގެ މުހިންމު ބާވަތްތައް އިމްޕޯޓް ކުރުމުގެ ޚަރަދު ވެސް އިންތިހާއަށް އުފުލިފައިވާ ކަމަށް އޭނާ ފާހަގަކުރެއްވިއެވެ.
މިނިސްޓަރު އިތުރަށް ވިދާޅުވީ، ކޮންމެހެން ކުރަން ނުޖެހޭ ޚަރަދުތައް ކުޑަކުރުމުގެ މަސައްކަތް ސަރުކާރުން ކުރަމުންދާ އިރު، ދައުލަތަށް ލިބޭ އާމްދަނީއާއި ބޭރު ފައިސާ އިތުރުކުރެވޭނެ އައު ގޮތްތައް ވެސް ދަނީ ހޯދަމުންނެވެ.
އާމްދަނީ އިތުރުކުރުމުގެ ފިޔަވަޅުތަކުގެ ތެރެއިން ‘ޑެސްޓިނޭޝަން ޕްރިންސިޕަލް’ ތައާރަފުކުރުމަށް މަސައްކަތް ކުރަމުންދާކަން މިނިސްޓަރު ފާހަގަކުރެއްވިއެވެ. މި އުސޫލުގެ ދަށުން ރާއްޖެއިން ބޭރުގައި ވިއްކާ ނަމަވެސް، ރާއްޖޭގައި ދޭ ޚިދުމަތްތަކުން ޓެކްސް ނެގުމުގެ ފުރުސަތު ލިބިގެންދާނެއެވެ.
ޒަރީރު ވިދާޅުވީ، ބައެއް ރިސޯޓުތަކުން ކޮޓަރިތައް 100 އާއި 200 ޑޮލަރާ ދެމެދުގެ އަގުތަކުގައި އިޝްތިހާރު ކުރި ނަމަވެސް، ބޭރުގެ ބުކިން ޕްލެޓްފޯމުތަކުން އެ ކޮޓަރިތައް 1،000 ޑޮލަރާ ހަމައަށް ވިއްކަމުންދާ ކަމަށެވެ. އަދި އައު ނިޒާމުގެ ދަށުން ޓެކްސް ނަގާނީ އެ ޚިދުމަތެއް އަސްލު ވިއްކާ އަގުގެ މައްޗަށް ބިނާކޮށް ކަމަށް ވިދާޅުވިއެވެ.
މީގެއިތުރުން، ސަރުކާރުގެ އާމްދަނީ އިތުރުކޮށް، ގައުމުގެ މާލީ ހާލަތު ރަނގަޅު ކުރުމަށްޓަކައި ގާނޫނީ އިތުރު ބަދަލުތައް ގެނައުމަށް ވެސް ވިސްނަމުންދާ ކަމަށް ފިނޭންސް މިނިސްޓަރު ވަނީ ވިދާޅުވެފައެވެ.