ޤަވާޢިދާ ޚިލާފަށް ވޭޕް އެތެރެކޮށް ވިއްކުމުގެ ތުހުމަތުގައި ހުޅުމާލެ ފޭސް ދޭއްގައި ހިންގި އިންޓެލިޖެންސް އޮޕަރޭޝަނެއްގައި ގިނަ އަދަދެއްގެ ވޭޕް ކާޓްރިޖްތަކަކާއި، ނެނޯ ސްޓިކް އަދި ފައިސާ ފުލުހުންގެ ބެލުމުގެ ދަށަށް ގެންގޮސްފިއެވެ.
ފުލުހުން މަޢުލޫމާތު ދިން ގޮތުގައި، މި އޮޕަރޭޝަންގެ ތެރެއިން ދިވެހި ދެ ފިރިހެނުން ހުއްޓުވައި ސުވާލުކޮށް، އެމީހުން ދުއްވި ސައިކަލު ވަނީ ބަލައި ފާސްކޮށްފައެވެ.
މި ދެ މީހުންނާ ގުޅުންހުރި ކަމަށް ތުހުމަތުކުރެވޭ ހުޅުމާލެ ފޭސް ދޭއްގެ އެޕާޓްމަންޓެއް ބަލައި ފާސްކުރިއިރު، 156 ވޭޕް ކާޓްރިޖާއި ނެނޯ ސްޓިކް ފެނިފައިވާ ކަމަށް ފުލުހުން ބުންޏެވެ. މީގެއިތުރުން، ޤަވާޢިދާ ޚިލާފު ވިޔަފާރިން ހޯދާފައިވާ ކަމަށް ބެލެވޭ 6،000 އަށް ވުރެ ގިނަ ދިވެހި ރުފިޔާ ވެސް އެތަނުން ވަނީ އަތުލައިގެންފައެވެ.
މި މައްސަލަ ފުލުހުން އިތުރަށް ތަޙުޤީޤު ކުރަމުންދާއިރު، ތުހުމަތުކުރެވޭ މީހުންނާމެދު އެޅި ފިޔަވަޅުގެ ތަފްޞީލެއް އަދި ހާމައެއް ނުކުރެއެވެ.
ދިވެހިރާއްޖޭގައި ވޭޕް ކުރުން މަނާކޮށްފައިވަނީ 2024 ވަނަ އަހަރުގެ ފަހުކޮޅުގައެވެ. އެގޮތުން ވޭޕްގެ ބާވަތްތައް އެތެރެކުރުން ނޮވެމްބަރު 15 އިން ފެށިގެން މަނާކޮށްފައިވާއިރު، އެތަކެތި ބޭނުންކުރުމާއި، ގެންގުޅުމާއި ވިއްކުން މަނާކޮށްފައިވަނީ ޑިސެމްބަރު 15 އިން ފެށިގެންނެވެ.
މި މަނާކުރުމާ އެކުވެސް، ޤާނޫނު ތަންފީޒުކުރުމަށް ހިންގާ އޮޕަރޭޝަންތަކުގައި ކަމާބެހޭ ފަރާތްތަކުން ދަނީ ވޭޕްގެ ބާވަތްތައް އަތުލައިގަންނަމުންނެވެ. އެގޮތުން ޖޫން މަހު 15،000 އަށް ވުރެ ގިނަ ކާޓްރިޖް އަތުލައިގެންފައިވާއިރު، އޮގަސްޓް މަހު ކަސްޓަމްސުން ވަނީ 800 ކާޓްރިޖް އަދި މި މަހުގެ ކުރީކޮޅު މަސްތުވާތަކެއްޗާ ގުޅުންހުރި ކަމަށް ޝައްކުކުރެވޭ 230 ކާޓްރިޖް ހިފަހައްޓާފައެވެ. ޤަވާޢިދު ބުނާގޮތުން، އަތުލައިގަނެވޭ ވޭޕްގެ ބާވަތްތައް ކަމާބެހޭ އިދާރާތަކުން ނައްތާލަންޖެހެއެވެ.