ރާއްޖޭގެ ގުދުރަތީ ވެއްޓާއި ޚާއްސަ މެހެމާންދާރީ ހިމާޔަތްކުރަމުން، ޑިޖިޓަލް ޓެކްނޮލޮޖީއާއި ހުނަރު ތަރައްގީކުރުމުގެ ތެރެއިން ފަތުރުވެރިކަމުގެ ދާއިރާ ޒަމާނީ ކުރުމަށް ސަރުކާރުން ކުރަމުންދާ މަސައްކަތްތަކުގެ އަޒުމް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަކުރާރުކުރައްވައިފިއެވެ.
ރައީސް މުޢިއްޒު މިހެން ވިދާޅުވީ “ޑިޖިޓަލް އެޖެންޑާ އެންޑް އާޓިފިޝަލް އިންޓެލިޖެންސް ޓު ރީޑިޒައިން ޓޫރިޒަމް” މި ޝިއާރުގެ ދަށުން ފާހަގަކުރާ 2026 ވަނަ އަހަރުގެ ދުނިޔޭގެ ފަތުރުވެރިކަމުގެ ދުވަހުގެ މުނާސަބަތުގައި ދެއްވި ޚާއްސަ މެސެޖެއްގައެވެ.
ރައީސްގެ މެސެޖުގައި، އާޓިފިޝަލް އިންޓެލިޖެންސް (އޭއައި) އަދި އެހެނިހެން ޑިޖިޓަލް ޓެކްނޮލޮޖީތަކުގެ ސަބަބުން ފަތުރުވެރިން މަންޒިލްތައް ހޯދުމަށާއި، ދަތުރުތައް ރޭވުމަށާއި، ޗުއްޓީ ހޭދަކުރުމުގެ ތަޖުރިބާތަކަށް ބަދަލުތަކެއް އަންނަމުންދާކަން ފާހަގަކުރެއްވިއެވެ. މީގެ ސަބަބުން ފަތުރުވެރިކަމުގެ ވިޔަފާރިތަކުން ޚިދުމަތްތައް ރަނގަޅުކުރުމަށާއި ފަތުރުވެރިންނަށް ވާސިލުވުމަށް އައު ފުރުސަތުތަކެއް ފަހިވަމުންދާ ކަމަށް ވިދާޅުވިއެވެ. އަދި ދުނިޔޭގެ ފަތުރުވެރިކަމުގެ ސިނާއަތަށް އަންނަ ބަދަލުތަކާއެކު ވާދަވެރިކަން ދެމެހެއްޓުމަށްޓަކައި ޑިޖިޓަލް ގާބިލުކަމާއި މަސައްކަތްތެރިންގެ ހުނަރު އިތުރުކުރުމަށް އިންވެސްޓްކުރަންޖެހޭ ކަމަށް އެމަނިކުފާނު ވިދާޅުވިއެވެ.
އައު އީޖާދުތަކަށް ބާރުއަޅުއްވަމުން ރައީސް ވިދާޅުވީ، ރާއްޖެއަކީ ފަތުރުވެރިކަމުގެ މަންޒިލެއްގެ ގޮތުގައި ފާހަގަކޮށްދޭ މައިގަނޑު އަސާސް ކަމަށްވާ އަމިއްލަވަންތަ ޚިދުމަތާއި މެހެމާންދާރީ ބަދަލުކުރުމުގެ ބަދަލުގައި، ޓެކްނޮލޮޖީ ވާންވާނީ އެކަންކަމަށް އެހީތެރިވެދޭ ވަސީލަތަކަށް ކަމަށެވެ.
މީގެއިތުރުން ފަތުރުވެރިކަމުގެ ދާއިރާ ތަރައްގީކުރުމުގައި އެ ދާއިރާގެ މަސައްކަތްތެރިންނާއި ހިއްސާދާރުން ވެދެއްވާ އެއްބާރުލުމަށް އެމަނިކުފާނު ޝުކުރު އަދާކުރެއްވިއެވެ. އަދި ގައުމީ ތަރައްގީއަށާއި މުޅި ރާއްޖޭގެ މުޖުތަމައުތަކަށް މި ދާއިރާގެ މުހިންމުކަން ފާހަގަކުރެއްވިއެވެ.
ރައީސް މުޢިއްޒު ވަނީ އެކްސްގައިވެސް ދުނިޔޭގެ ފަތުރުވެރިކަމުގެ ދުވަހުގެ މެސެޖެއް ހިއްސާކުރައްވާފައެވެ. އެ މެސެޖުގައި އެމަނިކުފާނު ވަނީ ވިލުންވެރި، ދެމެހެއްޓެނިވި އަދި މުސްތަގުބަލަށް ތައްޔާރުވެފައިވާ ފަތުރުވެރިކަމުގެ ސިނާއަތެއް ބިނާކުރުމަށް ޑިޖިޓަލް ފުރުސަތުތަކުގެ ބޭނުން ހިފުމަށް ރާއްޖެއިން ގެންގުޅޭ އަމާޒު އަލުން ތަކުރާރުކުރައްވާފައެވެ.