ފަޅުރަށްރަށާއި ފަޅުތައް ކުއްޔަށް ދިނުމާ ގުޅޭގޮތުން އަލަށް ތަސްދީގުކުރި ގާނޫނުގެ ސަބަބުން ދަނޑުވެރިކަމާއި މެރިކަލްޗަރގެ ދާއިރާއިން ބޮޑެތި އިންވެސްޓްމަންޓްތައް ހޯދުމުގެ ފުރުސަތު ފަހިވެ، ކާބޯތަކެތީގެ ރައްކާތެރިކަން އިތުރަށް ހަރުދަނާވެގެންދާނެ ކަމަށް ވަޒީރު އަޙްމަދު ޝިޔާމް ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަސްދީގުކުރެއްވި އައު ގާނޫނާ ގުޅޭގޮތުން ވާހަކަދައްކަވަމުން ފިޝަރީޒް އެންޑް އޯޝަން ރިސޯސަސް މިނިސްޓަރު އަޙްމަދު ޝިޔާމް “އަހާ” ފޯރަމުގައި ވިދާޅުވީ، މީހުން ދިރިއުޅޭ ރަށްރަށުން ބިން ލިބޭނެ އިންތިޒާމު ހަމަޖައްސައިގެން ދަނޑުވެރިކަމުގެ އުފެއްދުންތައް އިތުރުކުރުމަށް ސަރުކާރުން މަސައްކަތް ކުރަމުންދާ ކަމަށެވެ. އެގޮތުން، ދަނޑުވެރިކަމަށް އެކަށީގެންވާ 2 އާއި 4 ހެކްޓަރާ ދެމެދުގެ ބިން ހުރި 10 ރަށަކާއެކު މިނިސްޓްރީން މިހާރުވެސް މަސައްކަތް ކުރަމުންދާ ކަމަށް އެމަނިކުފާނު ވިދާޅުވިއެވެ.
ރާއްޖެއިން ބޭރުން ކާބޯތަކެތި އެތެރެކުރުމަށް ބަރޯސާވާ މިންވަރު ކުޑަކުރުމަށްޓަކައި އިންވެސްޓްމަންޓްތައް ނުހަނު މުހިންމުކަން ފާހަގަކުރައްވަމުން މިނިސްޓަރު ވިދާޅުވީ، އިތުރު އިންވެސްޓްމަންޓް ފުރުސަތުތައް ފަހިވުމުން ވަޒީފާގެ ފުރުސަތުތައް އިތުރުވެ، ރާއްޖެއިން ބޭރުވާ ބޭރު ފައިސާ ގައުމުގައި ހިފެހެއްޓުމަށް މަގުފަހިވާނެ ކަމަށެވެ.
މެރިކަލްޗަރގެ ދާއިރާއަކީ ރާއްޖެއަށް ބޮޑު އާމްދަނީއެއް ހޯދުމުގެ ފުރުސަތު އޮތް ދާއިރާއެއްކަން ފާހަގަކުރައްވައި ޝިޔާމް ވިދާޅުވީ، އެ ސިނާއަތް ތަރައްގީކުރުމަށް ކެބިނެޓުން 13 ސަރަހައްދެއް ކަނޑައަޅާފައިވާ ކަމަށެވެ. އަދި މި ދާއިރާ ފުޅާ ދާއިރާއެއްގައި ތަރައްގީކުރުމަށް ސަރުކާރުން މަސައްކަތް ކުރަމުންދާއިރު، މިހާރުވެސް 10 މިލިއަނާއި 15 މިލިއަން އެމެރިކާ ޑޮލަރާ ދެމެދުގެ އިންވެސްޓްމަންޓްތައް މި ސިނާއަތުން ފެންނަމުންދާ ކަމަށް ވިދާޅުވިއެވެ.
މިނިސްޓަރު ޝިޔާމް ވިދާޅުވީ، އައު ގާނޫނަށް އަމަލުކުރަން ފަށާނީ ތަސްދީގުކުރާތާ އެއް މަސްދުވަސް ފަހުން ކަމަށެވެ. މި ގާނޫނުގެ ދަށުން ހަދަންޖެހޭ ގަވާއިދުތައް ތިން މަސްދުވަހުގެ ތެރޭގައި ނިންމުމަށް ކަނޑައެޅިފައިވާ ކަމަށާއި، އަދި ކަމާބެހޭ ޓީމުތަކުން މި ގަވާއިދުތައް އެކުލަވާލުމުގެ މަސައްކަތް ކުރަމުންދާ ކަމަށްވެސް އެމަނިކުފާނު ފާހަގަކުރެއްވިއެވެ.