ދިވެހި ފުލުހުންނަށް ބަންގްލަދޭޝްއިން ޕްރޮފެޝަނަލް ތަމްރީނާއި ހުނަރު ތަރައްގީކުރުމުގެ ފުރުސަތުތައް ފަހިކޮށްދިނުމަށް ދެ ގައުމުގެ ދެމެދުގައި އޮތް އެއްބާރުލުން އިތުރަށް ފުޅާކުރުމާ ގުޅޭގޮތުން މަޝްވަރާކޮށްފިއެވެ.
ރާއްޖެއާއި ބަންގްލަދޭޝްގެ ފުލުހުންގެ މުއައްސަސާތަކުގެ މެދުގައި އޮތް ގުޅުން ހަރުދަނާކުރުމަށާއި، ދިވެހި ފުލުހުންނަށް ޚާއްސަ ތަމްރީނު ހޯދުމުގެ ފުރުސަތުތައް ފަހިކުރުމާ ބެހޭގޮތުން މަޝްވަރާކޮށްފައިވަނީ ދެ ގައުމުގެ އިސް ވެރިންގެ މެދުގައެވެ.
މި މަޝްވަރާތައް ކުރިއަށްދިޔައީ ބަންގްލަދޭޝްއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޑރ. އެމް.ޑީ ނަޒްމުލް އިސްލާމް، ކޮމިޝަނަރ އޮފް ޕޮލިސް އަޙްމަދު މުޙައްމަދުގެ އަރިހަށް ކުރެއްވި އިހުތިރާމުގެ ޒިޔާރަތެއްގައެވެ. މި ބައްދަލުވުން ބާއްވާފައިވަނީ ދިވެހި ފުލުހުންގެ ޚިދުމަތުގެ މައި އިދާރާގައެވެ.
މި ބައްދަލުވުމުގައި ދެ ބޭފުޅުން ވަނީ ދެ ގައުމުގެ ފުލުހުންގެ މުއައްސަސާތަކުގެ ދެމެދުގައިވާ ގުޅުން އިތުރަށް ބަދަހިކުރުމާ ގުޅޭގޮތުން ފުޅާ ދާއިރާއެއްގައި ވާހަކަދައްކަވާފައެވެ. ވަކިން ޚާއްސަކޮށް، ބަންގްލަދޭޝްގައި ތަމްރީނު ހޯދުމުގެ ތެރެއިން ދިވެހި ފުލުހުންގެ ޕްރޮފެޝަނަލް ހުނަރާއި ގާބިލުކަން އިތުރުކުރުމަށް އިތުރު ފުރުސަތުތައް ހޯދައިދިނުމުގެ މައްޗަށް އަލިއަޅުއްވާލެއްވިއެވެ.
މީގެއިތުރުން، ދިވެހިރާއްޖެއާއި ބަންގްލަދޭޝްއާ ދެމެދު ޒަމާނުއްސުރެ އޮންނަ ގާތް ގުޅުމާއި އެއްބާރުލުމުގެ މައްޗަށްވެސް މި ބައްދަލުވުމުގައި ވަނީ އަލިއަޅުއްވާލައްވާފައެވެ.