ދިވެހިރާއްޖޭގައި ފުރަތަމަ ފަހަރަށް ކަކުނި ފަލަކުރުމުގެ (މަޑް ކްރެބް ފެޓަނިންގ) ޕައިލެޓް މަޝްރޫއެއް ގދ. ފިޔޯރީގައި ކުރިއަށްގެންދިއުމަށް މިނިސްޓްރީ އޮފް ފިޝަރީޒް އެންޑް އެގްރިކަލްޗާއިން ހުއްދަ ދީފިއެވެ.
މި މަޝްރޫއު ގދ. ފިޔޯރީގައި ކުރިއަށް ގެންދިއުމަށް ހަމަޖެހިފައިވަނީ މެރިޓޯލް ޕްރައިވެޓް ލިމިޓެޑުންނެވެ.
މިނިސްޓްރީން ހާމަކުރި ގޮތުގައި މި މަޝްރޫއުގެ މައިގަނޑު ބޭނުމަކީ އެ ރަށުގެ ކުޅި ވާހަކަންޑެ ސަރަހައްދުން ކުދި ކަކުނި ނަގައިގެން، އެ ތަކެތި ހާއްސަކޮށް ތައްޔާރުކުރެވިފައިވާ ކޮށިތަކެއްގައި ބޮޑުކުރުމެވެ.
މިގޮތަށް ކޮށީގައި ގެންގުޅެ، ވިޔަފާރި މާކެޓަށް ނެރެވޭ ފަދަ އެކަށީގެންވާ ސައިޒަކަށް ކަކުނިތައް ފަލަކޮށް ބޮޑުކުރުމަށްފަހު، ވިޔަފާރި އުފެއްދުމެއްގެ ގޮތުގައި މާކެޓަށް ނެރެ ވިއްކުމަށް ވަނީ ހަމަޖެހިފައެވެ.