ރަސްމީ ވާޖިބު އަދާކުރުމުގައި އުޅެނިކޮށް ނިޔާވާ ފުލުހުންގެ އާއިލާތަކަށް ފުލުހުންގެ ފަރާތުން ފޯރުކޮށްދޭ ބޭސްފަރުވާގެ ހިދުމަތް ލިބޭގޮތަށް ފުލުހުންގެ ޚިދުމަތުގެ ގަވާއިދު އިސްލާހުކޮށްފިއެވެ.
މި ގެނެވުނު އިސްލާހުގެ ދަށުން، ރަސްމީ ވާޖިބު އަދާކުރުމުގެ ތެރޭގައި ނިޔާވާ ފުލުހުންގެ އާއިލާތަކަށް ފުލުހުންގެ ޚިދުމަތް މެދުވެރިކޮށް ބޭސްފަރުވާގެ ފުރުސަތު ލިބިގެންދާނެއެވެ.
މީގެ އިތުރުން، ވާޖިބު އަދާކުރުމުގައި ނިޔާވާ ފުލުހުންގެ ޖަނާޒާގެ ކަންކަން ރަސްމީ އިއްޒަތުގައި ބޭއްވުމުގެ ހުއްދަ، އެގްޒެކެޓިވް މެނޭޖްމަންޓް ބޯޑުގެ ނިންމުމަކާއެކު ދެވޭނެ އިންތިޒާމުވެސް ގަވާއިދަށް ވަނީ އިތުރުކޮށްފައެވެ. މި ބަދަލުތައް އިއުލާނުކުރެއްވީ ފުލުހުންގެ 93 ވަނަ އަހަރީ ދުވަހުގެ މުނާސަބަތުގައި ބޭއްވި ރަސްމިއްޔާތުގައި ކޮމިޝަނަރ އޮފް ޕޮލިސް އަހުމަދު މުހައްމަދެވެ.
ކޮމިޝަނަރު އިތުރަށް ވިދާޅުވީ ޝަރަފުވެރިކަމާއެކު ރިޓަޔަރ ކުރާ އޮފިސަރުންގެ އިނާޔަތްތައް ހިސާބުކުރުމުގައި ބަލާ މިންގަނޑުތައް ވެސް މުރާޖައާ ކުރެވޭނެ ކަމަށެވެ. އަދި އެ އިނާޔަތްތައް ކަނޑައަޅާނީ އެ އޮފިސަރަކު ހިދުމަތްކުރި މުއްދަތަށް ބަލައިގެން ކަމަށްވެސް ވިދާޅުވިއެވެ.
ހަމައެއާއެކު، 25 އަހަރު ހިދުމަތް ކުރުމަށްފަހު ރިޓަޔަރ ކުރާ އޮފިސަރުންނަށް، ހިދުމަތުގައި ދެމިތިބޭ އޮފިސަރުންނެކޭ އެއްފަދަ އުސޫލަކުން ބޭސްފަރުވާގެ އިނާޔަތްތައް ފޯރުކޮށްދިނުމަށްވެސް ފުލުހުންގެ ހިދުމަތުން ވަނީ ނިންމާފައެވެ.