ސަރުކާރުން ކުރިއަށްގެންދާ މަގު މަރާމާތުކުރުމުގެ މަޝްރޫއުގެ ދަށުން، އަމީނީ މަގުން މަސައްކަތް ނިމިފައިވާ ބައި އަންނަ އާދީއްތަ ދުވަހު އާންމު ދަތުރުފަތުރަށް އަލުން ހުޅުވާލާނެ ކަމަށް މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗާއިން އިއުލާނުކޮށްފިއެވެ.
އަމީނީ މަގު މަރާމާތުކުރުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލުކޮށްފައިވަނީ މިއަހަރުގެ ޖޫން މަހުގެ 15 ވަނަ ދުވަހުއެވެ. މި މަސައްކަތް ކުރިއަށް ގެންދަނީ މަގުގެ ހަލާކުވެފައިވާ ބައިތައް ރަނގަޅުކުރުމަށްޓަކައި އެކި ފިޔަވަހިތަކަކަށް ބަހާލައިގެންނެވެ.
އެގޮތުން، ދިވެހިރާއްޖޭގެ ގައުމީ ޔުނިވަރސިޓީ ހިމެނޭ ސަރަހައްދުން ފެށިގެން ދަރުމަވަންތަ ސްކޫލާ ހަމައަށް ވާ ފުރަތަމަ ސެކްޝަންގެ މަސައްކަތް މިހާރު ވަނީ އެއްކޮށް ނިންމާލާފައެވެ. އަދި ގައުމީ ޔުނިވަރސިޓީ ކައިރީގައިވާ ދެވަނަ ސެކްޝަންގައި ތާރުއެޅުމުގެ މަސައްކަތްވެސް މިހާރު ވަނީ ނިމިފައެވެ. އައު ތާރު އެޅުމުގެ ކުރިން ކުރީގެ ތާރުތައް ނަގައި، ބިމުގެ އަޑީގައިވާ ޔުޓިލިޓީ ވިއުގަތަކުގެ މަސައްކަތްތައް އަލުން ވަނީ ތަރުތީބުކޮށްފައެވެ. މިހާރު ކުރިއަށްދަނީ މަގުމަތީގެ ނިޝާންތައް ކުރެހުމާއި އެންމެ ފަހުގެ މަސައްކަތްތަކެވެ.
އެމްޓީސީސީން މިހާރު ތައްޔާރުވަމުންދަނީ އިއްޒުއްދީން މަގުން ފެށިގެން ކޮރުކެނޑި ހިނގުމާ ދެމެދު އޮތް ތިންވަނަ ސެކްޝަންގެ މަސައްކަތް ފެށުމަށެވެ.
އަމީނީ މަގުގެ 1.79 ކިލޯމީޓަރުގެ ސަރަހައްދެއް ތަރައްގީކުރުމަށް ނިމިދިޔަ ސަރުކާރުން 84.4 މިލިއަން ރުފިޔާ ހަރަދުކުރިއެވެ. އެ މަޝްރޫއު ޖެނުއަރީ 2024 ގައި ނިންމާލި ނަމަވެސް، މަގަށް ދިމާވި މައްސަލަތައް ހައްލުކުރުމަށް ސަރުކާރުން ވަނީ އިތުރު މަރާމާތުގެ މަސައްކަތްތަކެއް ފަށާފައެވެ.
އެމްޓީސީސީން ހާމަކޮށްފައިވާ ގޮތުގައި މިހާރު ކުރިއަށްދާ މަޝްރޫއުގެ ހުރިހާ މަސައްކަތްތަކެއް ނޮވެމްބަރު މަހުގެ ނިޔަލަށް ނިމޭނެއެވެ.