ރާއްޖޭގެ ވިޔަފާރިއާއި އިޤްތިޞާދީ ތަރައްޤީއާ އެންމެ ބޮޑަށް ގުޅިފައިވާ އެއް މަޝްރޫޢަކީ މާލޭ ވިޔަފާރި ބަނދަރުގެ ޙާލަތު ބަދަލުކޮށް، ޒަމާނީކޮށް، އަދުގެ އިޤްތިޞާދީ ޙަޤީޤަތްތަކާ ފައިހަމަކުރުން ކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ވަޒީރު ސަޢީދު ސޯޝަލް މީޑިއާގައި ކުރެއްވި ޕޯސްޓެއްގައި ފާހަގަކުރެއްވި ގޮތުގައި، ވިޔަފާރި ބަނދަރު ޒަމާނީކޮށް ކާރުބާރު ހަލުވިކުރުމުގެ ޚިޔާލު މީގެ އެތައް އަހަރުތަކެއް ކުރިން ކަމާބެހޭ އިދާރާތަކުން ކުރަމުން ދިޔަ ނަމަވެސް، އެތައް ޒަމާނެއް ވެގެން ދިޔައިރުވެސް ރާއްޖޭގެ މައި ވިޔަފާރި ބަނދަރު އޮތީ އެންމެ ފުރަތަމަ މާލޭގައި ޤާއިމުކުރި މިންވަރުގައެވެ. އަދި އެތަނަށް ގެނެވިފައި ހުރީ ވަރަށް ކުދިކުދި ތަރައްޤީ ކަމަށް ވެސް ވިދާޅުވިއެވެ.
މި ޙާލަތު ބަދަލުކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިސްނަންގަވައި، އެކަމުގެ ޢަމަލީ މަސައްކަތްޕުޅު ފައްޓަވާފައިވާ ކަމަށް މިނިސްޓަރު ވިދާޅުވިއެވެ. އަދި ޤައުމުގައި ހުރި މިފަދަ އެތައް ބޮޑެތި މައްސަލަތަކެއް ޙައްލުކުރެއްވުމުގައި ރައީސް ގެންދަވަނީ ޙިކުމަތްތެރިކަމާއެކު މަސައްކަތްޕުޅު ކުރައްވަމުން ކަމަށް ވެސް ފާހަގަކުރެއްވިއެވެ.
ދުނިޔޭގެ މަސްރަޙަށް އަންނަ ބަދަލުތަކާއި އިޤްތިޞާދީ ގޮންޖެހުންތަކުގެ ތެރޭގައި ޤައުމު ނިކަމެތިވާން ދޫކޮށްނުލައްވާނެކަން ރައީސް ސާބިތުކޮށްދެއްވަމުން ގެންދަވާ ކަމަށާއި، ވެރިއެއްގެ ޒިންމާއަކީ ހުރަސްތަކާ ކުރިމަތިލައްވައި އިޚްލާޞްތެރިކަމާއެކު ޤައުމު އެ ޙާލަތުން މިންޖުކޮށްދެއްވުންކަން އެމަނިކުފާނު ކަށަވަރުކޮށްދެއްވަމުން ގެންދަވާ ކަމަށް މިނިސްޓަރު ސަޢީދު ވިދާޅުވިއެވެ.
މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫޢުގެ ދަށުން ތިލަފުށީގައި އިންޓަނޭޝަނަލް އަދި ޑޮމެސްޓިކް ބަނދަރު ތަރައްޤީ ކުރުމަށް ޗައިނާ ހާބަރ އިންޖިނިއަރިން ކުންފުންޏާއި ޙަވާލުކުރީ މިއަހަރުގެ ޖުލައި މަހުގެ ތެރޭގައެވެ.
މި އެއްބަސްވުމުގެ ދަށުން ބައިނަލްއަޤްވާމީ މުދާ އުފުލާ ކޮންޓޭނަރ ބޯޓުފަހަރަށް ޚާއްސަ 14.6 މީޓަރު ފުންމިނުގެ އަދި 375 މީޓަރު ދިގު މަގަތުފާލަމެއް ތަރައްޤީ ކުރާނެއެވެ. މީގެ އިތުރުން އެތެރޭގެ ދަތުރުފަތުރުތަކުގައި ބޭނުންކުރާ މުދާ އުފުލާ އުޅަނދުފަހަރަށް ޚާއްސަ 5 މީޓަރުގެ ފުން، 820 މީޓަރުގެ ދިގު ޑޮމެސްޓިކް ކީ ވޯލްއެއް ނުވަތަ މަގަތު ފާލަމެއް ތަރައްޤީ ކުރާނެއެވެ.
މި މަޝްރޫޢުގެ ބައެއް މަސައްކަތްތައް ޖޫން މަހުގެ 1 ވަނަ ދުވަހު އެމްޓީސީސީއާވެސް ވަނީ ޙަވާލުކޮށްފަވެއެވެ. އެކުންފުންޏާއި ހަވާލުކޮށްފައިވަނީ، 100 މީޓަރުގެ ޑޮމެސްޓިކް ކީވޯލްއާއި، 3 ހެކްޓަރުގެ ސަރަހައްދެއް ޕޭވް ކުރުމުގެ މަސައްކަތެވެ.
މި މަޝްރޫޢު އެއްކޮށް ނިމޭއިރު ތިލަފުށީ ބަނދަރުގައި 1،000 މީޓަރަށްވުރެ ދިގު ބައިނަލްއަޤްވާމީ މަގަތުފާލަމެއްގެ އިތުރުން މާލޭގެ ނޯތު ހާބަރާއި ސައުތު ވެސްޓް ހާބަރު ބޭނުންކުރާ އުޅަނދުފަހަރަށް ޚާއްސަ ކޮށްގެން 2،000 މީޓަރަށްވުރެ ދިގު މަގަތު ފާލަމެއް ހިމެނޭގޮތަށް ޑޮމެސްޓިކް ޓާމިނަލްއެއް ތަރައްޤީ ކުރެވޭނެއެވެ. މިމަޝްރޫޢު ނިންމުމަށް ސަރުކާރުން އަމާޒު ހިފާފައިވަނީ، އަންނަ އަހަރު ނޮވެމްބަރ މަހުގެ 11 އަށެވެ.