ޒަކާތު ފަންޑުގެ އެހީގައި ސަރުކާރުން ކުރިއަށްގެންދާ ޕްރޮގްރާމެއްގެ ދަށުން، ތެލެސީމިއާ ހުންނަ 28 ކުއްޖަކު ބޯންމެރޯ ޓްރާންސްޕްލާންޓް ހެދުމަށް ރާއްޖެއިން ބޭރަށް ފޮނުވާފައިވާ ކަމަށް ހެލްތު މިނިސްޓަރު ގީލާ އަލީ ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ހާމަކުރެއްވި ގޮތުގައި، މި ޕްރޮގްރާމަކީ ހެލްތު މިނިސްޓްރީ އާއި އިސްލާމިކް މިނިސްޓްރީއާ ދެމެދު ވެވުނު އެއްބަސްވުމެއްގެ ދަށުން ކުރިއަށްގެންދާ ޕްރޮގްރާމެކެވެ.
މި އެއްބަސްވުމުގެ ދަށުން އަހަރަކު 10 ކުދިންގެ ފަރުވާއަށް 10 މިލިއަން ރުފިޔާ ކަނޑައަޅާފައިވާއިރު، ކޮންމެ ކުއްޖެއްގެ ފަރުވާއަށް 1 މިލިއަން ރުފިޔާއާ ހަމައަށް އެހީތެރިކަން ފޯރުކޮށްދެއެވެ. ތެލެސީމިއާ ހުންނަ ކުދިންނަށް ދިގު މުއްދަތުގެ ފަރުވާ ހޯދައިދިނުމުގެ މަޤްޞަދުގައި ހިންގާ މި ޕްރޮގްރާމުގެ ދަށުން މިހާތަނަށް 28 ކުއްޖަކު ވަނީ ފަރުވާއަށް ރާއްޖެއިން ބޭރަށް ފޮނުވާފައެވެ.
މީގެއިތުރުން، ތެލެސީމިއާ ހުންނަ ކުދިންނަށް ސަރުކާރުން މަހުން މަހަށް ދޭ މާލީ އެހީތެރިކަން ވަނީ 2،000 ރުފިޔާއަށް ބޮޑުކޮށްފައެވެ.
މިހާރު ވެސް 500 އަށް ވުރެ ގިނަ ކުދިންނަށް މި އެލަވަންސް ދެމުން އަންނަ ކަމަށް ކަމާބެހޭ ވުޒާރާއިން މަޢުލޫމާތު ދެއްވައެވެ.