މޯލްޑިވްސް ނޭޝަނަލް ސަރވިސް އިފްތިތާހުކުރިތާ އެއް އަހަރު ފުރުން ފާހަގަކުރައްވައި، ފުރަތަމަ އަހަރުގެ ތެރޭގައި 1،000 އަށްވުރެ ގިނަ ދިވެހި ޒުވާނުން ތަމްރީނު ފުރިހަމަކޮށްފައިވާކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހާމަކުރައްވައިފިއެވެ.
ރައީސް ޑރ. މުއިއްޒު ވިދާޅުވީ، ސަރުކާރުގެ އަމާޒަކީ ކޮންމެ އަހަރަކު ވެސް ނޭޝަނަލް ސަރވިސް މެދުވެރިކޮށް 1،000 ޒުވާނުން ތަމްރީނުކުރުން ކަމަށެވެ. އެގޮތުން، ވޭތުވެދިޔަ އަހަރުގެ ތެރޭގައި ޖުމްލަ 1،028 ޒުވާނުން ވަނީ ނޭޝަނަލް ސަރވިސްގެ އިނީޝަލް ޓްރެއިނިންގ ޕްރޮގްރާމް ފުރިހަމަކޮށްފައެވެ. މީގެ އިތުރުން މި ޕްރޮގްރާމުގެ ދަށުން އިތުރު 136 ޒުވާނަކު ވަނީ ހުނަރު ތަރައްގީކުރުމުގެ ތަމްރީނު ފުރިހަމަކޮށްފައެވެ.
ތަމްރީނު ފުރިހަމަކުރި ހުރިހާ ޒުވާނުންނަށް ރައީސް މަރުހަބާ ވިދާޅުވި އިރު، މި ޕްރޮގްރާމް ހިންގުމުގައި ބައިވެރިވި އެންމެހައި ފަރާތްތަކަށް ވެސް އެމަނިކުފާނު ވަނީ ޝުކުރު އަދާކުރައްވާފައެވެ.
ރައީސް މުއިއްޒު ވިދާޅުވީ، ކުރިއަށް އޮތް ތަނުގައި ނޭޝަނަލް ސަރވިސްގެ ދަށުން އިތުރު ޕްރޮފެޝަނަލް ދާއިރާތައް ތައާރަފުކުރުމަށް ސަރުކާރުން ރާވާފައިވާ ކަމަށެވެ. މީގެ އިތުރުން މި ޕްރޮގްރާމުގެ ތެރެއަށް އިންޓާންޝިޕް ފުރުސަތުތައް އިތުރުކުރެވިދާނެ ކަމަށްވެސް އެމަނިކުފާނު ފާހަގަކުރެއްވިއެވެ.
ހަމައެއާއެކު، ތަމްރީނު ހޯދާފައިވާ ޒުވާނުންނަށް ވަޒީފާގެ ފުރުސަތުތައް ހޯދައިދިނުމަށްޓަކައި، ނޭޝަނަލް ކެރިއަރ ސަރވިސްގެ ދައުރު އިތުރަށް ފުޅާކުރުމަށް ސަރުކާރުން މަސައްކަތް ކުރަމުންދާ ކަމަށް ވެސް ރައީސް ވިދާޅުވިއެވެ. ރައީސް ވަނީ ވޭތުވެދިޔަ އެއް އަހަރުގެ ތެރޭގައި މި ޕްރޮގްރާމަށް ބޮޑެތި ކުރިއެރުންތަކެއް ލިބިފައިވާކަން ފާހަގަކުރައްވައި، މުސްތަގުބަލުގައި އިތުރު ކުރިއެރުންތައް ލިބޭނެ ކަމުގެ އުންމީދު ފާޅުކުރައްވާފައެވެ.