ވެރިކަންކުރާ މައި ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ދަފްތަރުގައި ހިމެނޭ މެންބަރުންގެ އަދަދު 100,000 އަށް ވުރެ މައްޗަށް އަރައި، ރާއްޖޭގެ ސިޔާސީ ޕާޓީއެއްގެ ދަފްތަރު އެ އަދަދަށް އެރި ފުރަތަމަ ފަހަރުގެ ގޮތުގައި ތާރީޚުގައި ހިމެނިއްޖެއެވެ.
އިލެކްޝަންސް ކޮމިޝަން (އީސީ) ގެ ސިޔާސީ ޕާޓީތަކުގެ ދަފްތަރުން ދައްކާ ގޮތުގައި، 19 ނޮވެމްބަރު 2026 ގެ ނިޔަލަށް ޕީއެންސީގައި 100,083 މެންބަރުން ރަޖިސްޓްރީވެފައިވެއެވެ. ޖެނުއަރީ 31، 2019 ގައި އުފެދުނު މި ޕާޓީ ވެފައިވަނީ ރާއްޖޭގެ ސިޔާސީ ތާރީޚުގައި މިހާތަނަށް އެއް ލައްކަ މެންބަރުން ހަމަކުރި ފުރަތަމަ އަދި ހަމައެކަނި ޕާޓީއަށެވެ.
ޕީއެންސީގެ މެންބަރުންގެ އަދަދު ރެކޯޑު މިންވަރަކަށް އިތުރުވެފައިވާއިރު، އެ ޕާޓީގެ ރައީސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެވަނަ ދައުރަކަށް ކުރިމަތިލެއްވުމަށް ބޭނުންވާ ޕާޓީގެ ރިޔާސީ ޓިކެޓް ވަނީ މިދިޔަ ސެޕްޓެމްބަރު މަހު އެމަނިކުފާނަށް ރަސްމީކޮށް އަރުވާފައެވެ.
ރާއްޖޭގައި މިވަގުތު ހަރަކާތްތެރިވާ 7 ސިޔާސީ ޕާޓީގައި ޖުމްލަ 178,205 މެންބަރުން ތިބިއިރު، އޭގެ ދެބައިކުޅަ އެއްބަޔަށްވުރެ ބޮޑު އަޣުލަބިއްޔަތެއް ހިއްސާކުރަނީ ޕީއެންސީންނެވެ. ދެވަނައަށް އެންމެ މެންބަރުން ގިނަ އިދިކޮޅު އެމްޑީޕީގެ ދަފްތަރުގައި ތިބީ 53,747 މެންބަރުންނެވެ.
ދަފްތަރުގައި ދެން ހިމެނޭ ޕާޓީތަކުގެ ތެރެއިން ޖުމްހޫރީ ޕާޓީގައި 7,751 މެންބަރުން، އެމްޑީއޭގައި 5,749 މެންބަރުން، އަދާލަތު ޕާޓީގައި 5,530 މެންބަރުން، އެމްއެންޕީގައި 2,809 މެންބަރުން އަދި ޕީއެންއެފްގައި ރަޖިސްޓްރީވެފައިވަނީ 2,536 މެންބަރުންނެވެ.



