ހުޅުމާލޭގެ ބިން ވަކިބަޔަކަށް ހިލޭދިނުމަކީ މިވީހާތަނަށް ފާޅުގައި ސަރުކާރަކުން ހިންގާނެ އެންމެ ބޮޑު ޖަރީމާ ކަމަށް ކެނދިކުޅުދޫ ދާއިރާގެ މެންބަރު އަލީ ހުސެއިން ވިދާޅުވެއްޖެއެވެ.
މިދިޔަ ޖޫން މަހު ހުޅުވި ބޯހިޔާވަހި ކަމުގެ މަޝްރޫއުގެ ދަށުން ހުޅުމާލެއިން 1000 ގޯތި ދޫކުރަނީ އެއްވެސް އިރެއްގައި މާލެ ނޫން ތަނެއްގައި ރަޖިސްޓްރީވެފައި ނުވާ މާލޭ މީހުންނަށް ކަމަށް ސަރުކާރުން ވަނީ ހާމަކޮށްފައެވެ.
އަލީ ހުސެއިން ކުރެއްވި ޓުވީޓެއްގައި ވިދާޅުވީ، ދުނިޔޭގެ އެހެންގައުމެއްގައި ކުރާކަމެއްނަމަ އެ ގައުމެއްގެ ރައްޔިތުން މަގުމައްޗަށް ނިކުމެ ސަރުކާރާ ދެކޮޅަށް ވަރުގަދަޔަށް މުޒާހަރާ ކުރީސް ކަމަށެވެ.
އަލީ ހުސެއިން ވިދާޅުވީ، ދިވެހި ފަސްގަނޑުން އޭނާއަށް ލިބިފައި އޮތް އެންމެ އަކަ އިންޗިއެއްވެސް ނޯންނާނެ ކަމަށެވެ.
މާލޭ ރަށްވެހިންނަށް ހިލޭ ގޯތި ދޭ ގޮތަށް ސަރުކާރުން އިއުލާން ކުރުމުން ސޯޝަލް މީޑިއާގައި ރާއްޖެތެރޭ މީހުންނާއި މާލޭ މީހުންގެ ބަހުގެ ހޫނު ބަހުސެއް ދަނީ ހިނގަމުންނެވެ.
