ރޭ އަނިޔާވެރި ގޮތަކަށް އަންހެން މީހާ މަރާލާފައިވާ ސީން އިން، ހެކީގެ ގޮތުގައި ގިނަ ހަތިޔާރުތަކެއް ލިބިފައިވާ ކަމަށް ފުލުހުން ބުނެފިއެވެ.
ފުލުހުންގެ މޭޖަރ ކްރައިމް އިންވެސްޓިގޭޝަންގެ ހެޑް ޗީފް ސްޕްރިންޓެންޑެންޓް އޮފް ޕޮލިސް ހަސަން ޝިފާއު ނޫސްވެރިންނަށް މައުލޫމާތު ދެއްވަމުން ވިދާޅުވީ، ހައްޔަރުކޮށްފައިވާ މީހާ ހުރީ މަސްތުގެ ހާލަތުގައި ކަމަށާއި މި މަރާ ގުޅިގެން ހައްޔަރުކޮށްފައިވާ ސާހިލްގެ ކުށުގެ އެއްވެސް ރިކޯޑެއް ނެތް ކަމަށެވެ.
ޝިފާއު ވިދާޅުވީ، އަންހެން މީހާ މަރާލި މިމައްސަލަ ރިޕޯޓް ލިބިފައިވަނީ ރޭ 23:28 ގައި އާންމު ފަރާތަކުން ކަމަށެވެ.
މައުލޫމާތު ލިބުމާއިއެކު ފުލުހުން ވަނީ އެސަރަހައްދަށްގޮސް، ހަރަކާތްތެރިވާން ފަށާފައި ކަމަށާއި އަންހެން މީހާ އަށް ދީފައިވާ އަނިޔާގެ ތަފްސީލު ހިއްސާނުކުރަން އާއިލާއިން އެދިފައިވާތީ އެ ތަފްސީލް ދެވެން ނެތް ކަމަށެވެ.