ޑިމޮކްރަސީގެ ސިފަތައް ގެއްލި ޑިކްޓޭޓަރ ޝިޕްގެ ގިނަ ސިފަތައް ރާއްޖެއިން ދަނީ ފެންނަމުން ކަމަށް މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ވިދާޅުވެއްޖެއެވެ.
ކުށްކުރާ މީހުންނަށް ގާނޫނުން އަދަބު ނުދެވޭތީ އާދަމް ޝަރީފު ހުށަހެޅި މައްސަލަ މަޖިލީހުން ވަނީ ބުދަ ދުވަހު ބޭރުކޮށްލާފައެވެ. މިކަމާ ގުޅިގެން ކުރެއްވި ޓުވީޓެއްގައި މެންބަރު ވިދާޅުވީ، މަޖިލިސް ކޮންޓްރޯލް ސަރުކާރަށް ނަގާފައި ރައްޔިތުންގެ ކަންބޮޑުވުންތައް އަޑުއަހާނެ ވެރިއެއް ދައްކާނެ މަޖިލިސް މެންބަރެއް ސަރުކާރު ފަޅީގައި މަދު ކަމަށެވެ.
ނަމަވެސް ސަރުކާރު ޖަވާބު ދާރީ ކުރުވުމުގެ މަސައްކަތް ނުހުއްޓާނެ ކަމަށް އާދަމް ޝަރީފް ވިދާޅުވިއެވެ.
އިދިކޮޅުގެ ޕީޖީ ލީޑަރު އަދި މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ހުށަހެޅުއްވި އެ މައްސަލައިގައި ބުނެފައިވަނީ ރާއްޖޭގައި ގޮތްނޭނގޭ މަރުތަކާއި މަސްތުވާތަކެތީގެ ވިޔަފާރިއާއި މާރާމާރީތައް އަދި ޖިންސީ ގޯނާކުރުމާއި، އެކަމާ ގުޅިގެން އުފެދޭ މައްސަލަތައް ވަރަށް ބޮޑަށް އިތުރުވެފައިވާ ކަމަށެވެ.
އެ މައްސަލައަށް މަޖިލީހުގައި ބަހުސް ކުރުމާ ގުޅޭގޮތުން ނެގި ވޯޓުގައި ބައިވެރިވީ 32 މެންބަރުންގެ ތެރެއިން 25 މެންބަރުން ވޯޓު ދިނީ މައްސަލަ ބަލައިގަންނަން ނުފެންނަ ކަމަށެވެ. މައްސަލައަށް ބަހުސް ކުރަން ފެންނަ ކަމަށް ވޯޓު ދިނީ އެންމެ ހަތް މެންބަރުންނެވެ.
