އެއްޖިންސުން ގުޅުން ހިންގި މައްސަލަތަކެއްގައި އަނެއްކާވެސް ތިން މީހަކު ހައްޔަރުކޮށްފިއެވެ.
ފުލުހުން ބުނީ އެއް ޖިންސުން ގުޅުން ހިންގި މައްސަލަތަކަކާ ގުޅިގެން މިމަހުގެ 8 ވީ ބުރާސްފަތި ދުވަހު އިތުރު ތިން މީހުން ކޯޓު އަމުރެއްގެ ދަށުން ހައްޔަރުކޮށްފައިވާ ކަމަށެވެ.
އަދި ހައްޔަރުކޮށްފައިވާ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން ވަނީ މި ތިން މީހުންގެ ބަންދަށް 10 ދުވަސް ޖަހާފައެވެ.
ހައްޔަރު ކޮށްފައިވަނީ އުމުރުން 47 އަހަރުގެ މީހަކާއި 44 އަހަރުގެ މީހެއްގެ އިތުރުން 50 އަހަރުގެ މީހެކެވެ.
ފުލުހުން ވަނީ އެއްޖިންސުން ގުޅުން ހިންގި މައްސަލަތަކާއި ގުޅިގެން ތިން މީހަކު ކޯޓު އަމުރެއްގެ ދަށުން މިމަހުގެ ހަ ވަނަ ދުވަހު ވެސް ހައްޔަރުކޮށްފައެވެ.
އެދުވަހު ހައްޔަރުކުރި މީހުންގެ ބަންދަށް ގޮތެއް ނިންމުމަށް ކޯޓަށް ހާޒިރު ކުރުމުން 45 އަހަރުގެ މީހާގެ ބަންދަށް 5 ދުވަސް، 47 އަހަރުގެ މީހާގެ ބަންދަށް 14 ދުވަސް އަދި 49 އަހަރުގެ މީހާގެ ބަންދަށް 14 ދުވަސް ވަނީ ކޯޓުންދީފައި ކަމަށް ފުލުހުން ހާމަކުރެއެވެ.