ރައްޔިތުންގެ މަޖިލީހުގެ މެންބަރުންނަށް ގާނޫނީ ވާޖިބަށް ރަނގަޅަށް ފަރުވާ ނުބެހެއްޓޭ ކަމަށް ވިދާޅުވެ މަޖިލީހުގެ ރައީސް މުހައްމަދު ނަޝީދު ކަންބޮޑުވުން ފާޅުކުރައްވައިފިއެވެ.
މަޖިލީހުގައި 87 މެންބަރުން ތިއްބަވާއިރު މިއަދުގެ ޖަލްސާއަށް ހާޒިރުވީ 24 މެންބަރުންނެވެ.
ޖަލްސާ ފައްޓަވަމުން ނަޝީދު ވިދާޅުވީ، 6 މެންބަރުން މިއަދު ސަލާމުގައި އެބަތިއްބެވި ކަމަށާއި ރަސްމީ ދަތުރެއްގައި 3 މެންބަރަކު ތިއްބެވި ކަމަށެވެ.
ނަޝީދު ވިދާޅުވީ 87 މެންބަރުންގެ މަޖިލީހެއްގައި އަދި ގަވާއިދުން މުސާރަ ލިބޭ މަޖިލީހެއްގައި ހެނދުނުގެ ޖަލްސާ ފެށޭއިރު 24 މެންބަރުން ތިއްބެވުމަކީ ގާނޫނީ ވާޖިބަށް ފަރުވާތެރިކަން ނުބެހެއްޓެވޭ ކަމުގެ ހެއްކެއް ކަމަށް ގަބޫލު ކުރައްވާ ކަމަށެވެ.
މަޖިލީހުގެ މިދައުރުގެ ޖަލްސާތައް ފަށާފައިވަނީ ދާދި ފަހުން ނަމަވެސް ޖަލްސާތައް ފަށާއިރު ތިއްބަވަނީ މަދު މެންބަރެއްކަން ފާހަގަކުރެވެއެވެ.
ނަޝީދު ވަނީ ކޮމިޓީގެ ގިނަ މަސައްކަތްތަކެއް ހުރި ކަމަށް ވިދާޅުވެ އެ މަސައްކަތްތައް އަވަސް ކޮށްދިނުމަށް އެދިވަޑައިގެންފައެވެ.