ލޯންޗަކާއި ޑިންގީއެއް ޖެހި ނުރައްކާތެރި އެކްސިޑެންޓެއް ހިގައިފިއެވެ.
ފުލުހުން ބުނީ މިރޭ ހުޅުމާލެއަށް ވަން ނެރާ ދިމާ ފަޅުތެރޭގައި ލޯންޗަކާއި ޑިންގީއެއް ޖެހި އެކްސިޑެންޓްވެފައިވާ ކަމުގެ މައުލޫމާތު މިރޭ 19:55 ހާއިރު ފުލުހުންނަށް ލިބިފައިވާ ކަމަށެވެ.
އަދި މި އެކްސިޑެންޓްގައި ހަތަރު މީހަކަށް އަނިޔާވެ ފަރުވާ ދިނުމަށް ހޮސްޕިޓަލަށް ވަނީ ގެންގޮސްފައި ކަމަށާއި އެގޮތުން އޭގެތެރެއިން 2 މީހަކަށް ޓްރީޓޮޕް ހޮސްޕިޓަލުގައި އަދި އަނެއް 2 ދެމީހުނަށް ހުޅުމާލެ ހޮސްޕިޓަލުގައި ދަނީ ފަރުވާދެމުން ކަމަށްވެސް ފުލުހުން ހާމަކުރެއެވެ.
ފުލުހުން ބުނީ އަނިޔާވި މީހުންގެ ތެރޭގައި ހިމެނެނީ ދިވެހި 2 ފިރިހެނުންނާއި ބިދޭސީ އަންހެނަކާއި ފިރިހެނެއް ކަމަށެވެ.
އަނިޔާވި ހަތަރު މީހުނަކީވެސް ޑިންގީގައި ތިބި މީހުން ކަމަށާއި އިތުރަށް ބަލަންޖެހޭ ކަންކަން ބަލަމުންދާ ކަމަށް ފުލުހުން ހާމަކުރެއެވެ.