މާފުށީގައި ހަށިވިއްކާ ކަމުގެ އެއްވެސް ހާދިސާއެއް އަދި ރެކޯރޑް ކުރެވިފައެއް ނެތް: ކައުންސިލް

ކ މާފުށީގައި ހަށިވިއްކުމުގެ އެއްވެސް ހާދިސާއެއް ހިނގައިގެން އެކަން ރެކޯރޑްކުރެވިފައިނުވާއިރު ހަށިވިއްކުމުގެ ވިޔަފާރީގެ މަރުކަޒެއްގެ ގޮތުގައި މާފުށި ސިފަކުރުމަކީ ޒިންމާދާރު ކަމެއް ނޫންކަމަށް މާލެއަތޮޅު މާފުށީ ކައުންސިލުން ބުނެފިއެވެ.
އޮންލައިން ނޫހެއްގައި ޝާއިއު ކޮށްފައިވާ ރިޕޯޓަކާ ގުޅިގެން ކަންބޮޑުވުން ފާޅުކުރައްވާ މާފުށީ ކައުންސިލުން މިރޭ ނެރުނު ބަޔާނެއްގައި ބުނެފައިވަނީ، މާފުށީގައި ދިރިއުޅޭ މީހުންނާއި ރަށަށް އަރާ ފައިބާ ދެ ޖިންސުގެ މީހުނަކީ ހަށި ގަނެ ވިއްކުމުގައި ހަރަކާތްތެރިވާ މީހުންކަމުގައި ދެކޭނަމަ އެއީ އެގޮތަށް ހިތަށް ތަސައްވުރު ކުރެވޭ ބައެއްގެ ހުރި އުނިކަމެއް ކަމަށެވެ.
އަދި މަސްތުވާތަކެއްޗާއި ގުޅުންހުރި މައްސަލަތައް ރާއްޖޭހެ އެކި ރަށްރަށުން އަބަދުވެސް ތަކުރާރުވަމުންދަނީ އެރަށްރަށުގައި ލޯކަލް ޓުއަރިޒަމް ހިނގާތީ ނޫން ކަމަށާއި ޒިޔާރަތް ކުރާ މީހުންގެ އަދަދު އިންތިހާއަށް ގިނަ ރަށަކުން ކުރިމަތިވެދާނެ އިޖުތިމާއީ މައްސަލަތަކަށް އިޖާބަ ދިނުމުގައި ކަމާބެހޭ ހުރިހާ އިދާރާތައް މަސައްކަތް ކުރަންޖެހޭނީ އެމާހައުލަކާ އެކަށޭނަ ގާބިލްކަން ލިބެ ތިބެގެން ކަން ގަބޫލުކުރާ ކަމަށެވެ.
އެބަޔާނުގައި އިތުރަށް ބުނެފައިވަނީ މާފުށީ ރައްޔިތުންވަނީ ރަލާ އޫރުމަހާނުލާވެސް ޓޫރިޒަމަކީ ކުރިއަށް ގެންދެވިދާނެ ވިޔަފާރިއެއްކަން މުޅިދުނިޔެއަށް ސާބިތުކޮށްދީފާ ކަމަށެވެ.
އެހެންކަމުން ކަމުގެ ވަށައިގެން ހުރި ހަގީގަތްތަކަށް ބުރަވެ އޮންނަ ނުރަނގަޅު، ރަނގަޅުކުރުމަށް ވުރެ ބޮޑަށް ސިޔާސީ ނިޔަތުގައި ކަންކަން ނަގައިގެން ސަރުކާރަށް ފާޑުކިޔުމުގެ ރޫހުގައި ތެދުވުމުގެ އާދަ ދޫކޮށް އިޖާބީ ހުށަހެޅުންތަކަށް އެކައުންސިލުން މަރުހަބާ ކިޔާ ކަމަށްވެސް ބަޔާނުގައި ބުނެފައިވެއެވެ.