އިދިކޮޅުގެ ކޯލިޝަނުގެ ރިޔާސީ ކެންޑިޑޭޓް އަދި ކުރީގެ ރައީސް އަބްދުﷲ ޔާމީންގެ ރިޔާސީ ކެމްޕެއިން ފެށުމަށް ބާއްވާ ރައީސް ޔާމީން 2023 ކޮންފަރެންސް ފެބުރުއަރީ މަހުގެ 2 އިން 4 އަކަށް މާލޭގައި ބޭއްވުމަށް ނިންމައިފިއެވެ.
މި ކޮންފަރެންސްގެ މައުލޫމާތު ދެއްވުމަށް ބޭއްވި ބައްދަލުވުމެއްގައި ޕީޕީއެމްގެ ސްޕޯކްސްޕާސަން ހީނާ ވަލީދު ވިދާޅުވީ، މި ކޮންފަރެންސް ހާއްސަކުރަނީ ދާއިރާތަކުގެ ރައީސުންނާއި ނައިބު ރައީސުންނާއި އަންހެނުންގެ ރައީސުންނާއި ޒުވާނުންގެ ރައީސުންނާއި ސްޓިއަރިންގް ކޮމެޓީގެ ރައީސުންނާއި އެ ކޮމެޓީގެ އިތުރު 2 މެންބަރުންނަށްކަމަށެވެ.
އެގޮތުން އެ މެންބަރުންގެ ތެރެއިން ކޮންމެސް އެއް މެންބަރެއް އަންހެން މެންބަރެއްކަމުގައި ވާން ޖެހޭނެކަމަށް ހީނާ ވިދާޅުވިއެވެ.
ހީނާ އިތުރަށް ވިދާޅުވީ، ކައުންސިލަރުންނާއި، ޑަބްލިއުޑީސީގެ މެންބަރުން ޕާޓީގެ ލީޑަރޝިޕް އަދި ޕާލިމަންޓަރީ ގްރޫޕްގެ އިތުރުން ސެނެޓް މެންބަރުންވެސް އެ ކޮންފަރެންސްގައި ބައިވެރިވެވަޑައިގަންނަވާނެކަމަށެވެ.
ހީނާ ވިދާޅުވީ، މި ކޮންފަރެންސްގައި 1500 އެއްހާ މެންބަރުން ބައިވެރިވެވޭނެ ކަމަށް އަންދާޒާ ކުރެވޭ ކަމަށެވެ. ހީނާ ވިދާޅުވީ ރައީސް ޔާމީން 2023 ކޮންފަރެންސަކީ މިހާތަނަށް ދިވެހިރާއްޖޭގައި ސިޔާސީ ޕާޓީއަކުން ބާއްވާ އެފަދަ އެންމެ ބޮޑު ކޮންފަރެންސަށް ވާނެކަމަށެވެ. އޭނާ ވިދާޅުވީ އެ ހަރަކާތަކީ އިންތިހާބީ ގިނަ މަގާމުތަކުގައި ތިބި މެންބަރުން ބައިވެރިވާ އެފަދަ ސިޔާސީ އެންމެ ބޮޑު ހަރަކާތްކަމަށެވެ.