ޑަބަލް ޑިޖިޓް ފެނުނީ ގޭގެއަށް ބެހި ބޮނޑިބޮނޑިން ކަމަށާއި ރައީސް ސާލިހުގެ ފަހަތަށް ނަޝީދު އަރަންޖެހޭ ސަބަބެއް ނެތް ކަމަށް މަހިބަދޫ ދާއިރާގެ މެންބަރު އަހްމަދު ތޯރިގް (ޓޮމް) ވިދާޅުވެއްޖެ އެވެ.
އެމްޑީޕީގެ ރިޔާސީ ކެންޑިޑޭޓު ހޮވުމަށް ބޭއްވި ރިޔާސީ ޕްރައިމަރީ ރައީސް ސާލިހު ކާމިޔާބު ކުރެއްވުމާ ގުޅިގެން ކުރެއްވި ޓުވީޓެއްގައި ޓޮމް ވިދާޅުވީ، ނާއިންސާފުން ކާމިޔާބު ކުރި އިންތިހާބަކަށްފަހު، ރައީސް ސާަލިހުގެ ފަހަތަށް، އެ ޕާޓީގެ ރައީސް މުހައްމަދު ނަޝީދު އަރަންޖެހޭ ސަބަބެއް ނެތްކަމަށެވެ.
އެމްޑީޕީގެ ރިޔާސީ ޕްރައިމަރީގެ ވަގުތީ ނަތީޖާ ދައްކާ ގޮތުން ރައީސް ސާލިހަށް ލިބުނީ 24،572 ވޯޓެވެ. އަދި ރައީސް ނަޝީދަށް ލިބުނީ 15،631 ވޯޓެވެ.
ޓޮމް ވިދާޅުވީ ނާއިންސާފާއި ކުޑަކާފާއި ދެކޮޅަށް ހުއްޓާނުލާ ވަކާލާތު ކުރަމުންދާ ޕާޓީގެ ޕްރައިމަރީން ފެނުނީ ހުތުރު މަންޒަރެއް ކަމަށެވެ.
