ޤިޔާމަތް ދުވަހަކީ، ބިރުވެރިކަމުން ފުރިގެންވާ ދުވަހެއް ކަމަށާއި، އެއީ ރަޙިމުގެ ގުޅުމަކުން ނުވަތަ ބައިބޮޑުކަމަކުން މަންފާކުރާ ވަރަށްވުރެ ބިރުވެރިކަން ބޮޑުވެގެންވާ ދުވަހެއް ކަމަށް މިއަދުގެ ހުކުރު ޙުތުބާގައި ބުނެފިއެވެ.
ޤިޔާމަތް ދުވަހުގެ މައްޗަށް އަލިއަޅުއްވާލާ މިއަދު ގެނެސްދިން ހުކުރު ޙުތުބާގައި ވަނީ އެ ދުވަހުން އިންސާނާ އެންމެ ލޯބިވާ މައިންބަފައިންނާއި، އަނބިދަރީންނާއި، އެއްބަނޑު އެއްބަފާ މީހުން، ގޮތް ހުސްވެފައިވާ ޙާލުގައި ފެނުނަސް އެއްވެސް ފަރުވާލެއް ނުބަހައްޓާނެ ކަމަށް ބުނެފައެވެ.
އަދި އެ ދުވަހުގެ ބިރުވެރިކަން ބަޔާންކޮށްދެއްވައި اللهُ سُبْحَانَهُ وَتَعَالَى ވަޙީކުރައްވައިފައިވާ ބަސްފުޅެއްގެ މާނައިގައި ވެއެވެ. “(އެއީ) މީހާ އޭނާގެ އަޚާގެ ކިބައިންނާއި، އޭނާގެ މަންމައާއި، ބައްޕަގެ ކިބައިންނާއި، އޭނާގެ އަނބިމީހާއާއި، ދަރިންގެ ކިބައިން ފިލާންދާ ދުވަހެވެ. އެއުރެންކުރެ ކޮންމެ މީހަކަށް، އެމީހަކު އަވަދިނެތި ކުރާނެކަމެއް އެ ދުވަހުން ވެއެވެ.”[1]
މިއަދު ޙުތުބާގައި ވަނީ ޤިޔާމަތް ދުވަހު އުޑުތަކާއި ބިންގަނޑު ފަޅައިގެންގޮސް އިރުގެ އަލި ނެތިގެން ދާނެ ކަމަށާއި، އެއީ ފަންސާސް ހާސް އަހަރާ އެއްވަރުގެ ދިގު ދުވަހެއްކަމަށް اللهُ سُبْحَانَهُ وَتَعَالَى ގެ ވަޙީބަސްފުޅުތަކުން ސާބިތުވާކަމަށް ބުނެފައެވެ. އަދި އެ ދުވަހުގެ ބިރުވެރިކަމާއި ހޫނުކަން ހާމަކޮށްދީ ޙުތުބާގަިއ ވަނީ މީސްތަކުންގެ ޢަމަލުތައް ހުންނަ ގޮތުން، އެ ދުވަހު މީސްތަކުންގެ ތެރޭގައި އެ މީހުންގެ ގައިން އޮހޮރޭ ދާގެ ތެރޭގައި ތަނބިކަށްޓާ ހަމައަށް، ކަކުލާ ހަމައަށް، އުނަގަނޑާ ހަމައަށް އަނގައާ ހަމައަށް ގެނބިފައި ތިބޭނެކަމަށް ޙުތުބާ ވަނީ ބުނެފައެވެ.
“ނަމަވެސް އެ ދުވަހުގެ ބިރުވެރިކަމާއި، ނާމާންކަމުން ނަޖާކުރައްވައި اللهُ سُبْحَانَهُ وَتَعَالَىގެ ޢަރުޝީގެ ހިޔާވަހިކަން ދެއްވާ މީހުންގެ ތެރޭގައި އެކަލާނގެއަށް އަޅުކަންކުރުމުގައި ހެދިބޮޑުވަމުން އަންނަ ޒުވާނާ ހިމެނެއެވެ.”[1] ޙުތުބާގައި ބުނެފައި ވެއެވެ.
ޙުތުބާގައި ވަނީ ހެޔޮ ޢަމަލެއްކުރުންކަމުގައި ވިޔަސް، ނުވަތަ ހަވާނަފުސު އެދި ގޮވާ ކަމެއް ކުރުންކަމުގައި ވިޔަސް، އެ ކަމެއް އެންމެ ފުރިހަމަ ގޮތުގައި ކުރެވޭނީ ޒުވާން ޢުމުރުގައިކަމަށްވާތީ، ހެޔޮކަންތައް ކުރުމަށް އަވަސްވެގަނެ، އަދި ނުބައި ފާޙިޝް ކަންކަމާ ދުރުހެލިވެ، ހަވާނަފުސުގެ މަގު ދޫކޮށް، މާތް ﷲގެ މަގަށް އަވަސްވެގަތުމަށް ގޮވާލާފައެވެ.
“ޤިޔާމަތް ދުވަސް ދިގުލައިގެން ދިޔުމުގެ ސަބަބުން މީސްތަކުންގެ ޙާލު ބޮޑުވެ، ކަރުހިއްކުން އިންތިހާއަށް އިތުރުވެފައި ވަނިކޮށް اللهُ سُبْحَانَهُ وَتَعَالَىގެ ރަޙުމަތުން އެކަލާނގެ ނަބިއްޔާ zއަށް ޙައުޟުކޮޅު ދެއްވާނެއެވެ. އޭގެ ފެން ކިރަށް ވުރެ ހުދުވާނެއެވެ. އަދި މާމުޔަށް ވުރެ ފޮނިވާނެއެވެ.[1] އެއިން ފެންބުއިމުގެ ނަސީބު ލިބިގެންދާނީ اللهُ سُبْحَانَهُ وَتَعَالَىއަށް ފުރިހަމަ ގޮތުގައި އީމާންވެ، އެކަލާނގެއަށް އިޚްލާޞްތެރިކަމާ އެކު އަޅުކަންކޮށް، ނަބިއްޔާ zއަށް ތަބާވާ މީހުންނަށެވެ. ނަމަވެސް ހިތާމައަކީ، މަދުން ނަމަވެސް މި ލޮބުވެތި މުޖުތަމަޢުގައި zއަށް ފުރައްސާރަކޮށް، އެކަލޭގެފާނު ދެއްކެވި މަގުން ހިނގާ މީހުންނަށް މަލާމާތްކުރާ މީހުން ތިބިކަމެވެ. އެ ފަދަ މީހުން ވަގުތު ފާއިތުވުމުގެ ކުރީން اللهُ سُبْحَانَهُ وَتَعَالَىއަށް ތައުބާވެ، އެކަލާނގެ މަގަށް ރުޖޫޢަވުމަށް ގޮވައިލަމެވެ!” ޙުތުބާ ގައި ބުނެފައި ވެއެވެ.
މިއަދު އަހަރެމެންގެ މުޖުތަމަޢުގެ ހާލަތުގެ މައްޗަށްވެސް ޙުތުބާގައި ވަނީ އަލިއަޅުވާލާފައެވެ. އެގޮތުން އަހަރެމެންގެ މުޖުތަމައުގައި މިއަދު އެކަކު އަނެކަކަށް އިޙްތިރާމުކުރުމާއި، އަޅައިލުމާއި އޯގާތެރިވުންފަދަ ކަންކަން ހިތާމަކުރަންޖެހޭ މިންވަރަށް ދަށްވެފައިވާކަން ޙުތުބާގައި ފާހަގަކޮށްފައި ވެއެވެ. ހަމައެހެންމެ މިއަދު ފެންނަނީ، އިސްލާމްދީން، އަހަރެމެންނަށް ދަސްކޮށްދީފައިވާ ގޮތާ ޚިލާފަށް އެކަކު، އަނެކަކުގެ މައްޗަށް ދޮގުތައް ހަދައި ޣީބަބުނެ، ފުރައްސާރަކޮށް، އޭނާގެ އަބުރު ކަތިލާ މަންޒަރު ކަމަށާއި، މީސްމީޑިޔާއާއި، ޚަބަރު ފަތުރާ ވަސީލަތްތައް ބޭނުންކޮށްގެން، اللهُ سُبْحَانَهُ وَتَعَالَى ޙަރާމްކުރެއްވި މި ފަދަ ބޮޑެތި ފާފަތަކަށް އަރައިގަތުމުގައި ބަޔަކު އަވަދިނެތި އުޅޭ އިރު، އެމީހުންނަށް މިކުރެވެނީ ކިހާވަރެއްގެ ނުބައިކަމެއްކަން ހީވެސްނުވާކަމަށް ޙުތުބާގައި ބުނެފައި ވެއެވެ.
އަދި ޤިޔާމަތް ދުވަހު ހިސާބު ބައްލަވާ، ޢަމަލުތައް ވަޒަން ކުރެވޭނެކަމަށާއި، ރެވިއޮށްޓަރެއްގެ މިންވަރުގެ ހެޔޮ ކަމެއް ވިޔަސް އަދި ނުބައި ކަމެއް ވިޔަސް އެ ދުވަހުން ގެނެވޭނެ ކަމަށް ޙުތުބާގައި ވަނީ ބުނެފައެވެ.
“އަދި އެއްވެސް މީހަކަށް އެއްވެސް ކަމަކުން اللهُ سُبْحَانَهُ وَتَعَالَى ބޭއިންސާފެއް ނުކުރައްވާނެއެވެ. އެ ދުވަހުން ކަނާތަށް ފަތް ލިބޭނީ ހެޔޮ ޢަމަލުކޮށް އުޅުނު މީހުންނަށެވެ. އަދި އުރެދުނު މީހުންނަށް ފަތް ލިބޭނީ އެމީހެއްގެ ވާތަށެވެ. ބުއްދިވެރި މީހަކީ ތިމާގެ ނަފުސު ހިސާބުކޮށް އަމަލުތައް ވަޒަންކޮށް އަންނަން އޮތް ދުވަހަށް ތައްޔާރުވާ މީހާއެވެ. އަދި ނުކުޅެދުންތެރިއަކީ، ހަވާނަފުސަށް ތަބާވެ، اللهُ سُبْحَانَهُ وَتَعَالَىގެ ޙަޟްރަތުން ފޮނި އުންމީދުކުރާ މީހާއެވެ.” ޙުތުބާގައި ބުނެފައިވެއެވެ.