މިއަހަރު ބާއްވާ ރިޔާސީ އިންތިހާބުގައި އިދިކޮޅު އެންމެ ބޮޑު ޕާޓީގެ ރިޔާސީ ކެންޑިޑޭޓު ރައީސް ޔާމީނަށް ވާދަނުކުރެވޭނެކަން ކަށަވަރުވި ހިސާބުން މުޅި ސިޔާސީ މައިދާން މިވަނީ ހަލަބޮލިވެފައެވެ.
ޕްރޮގްރެސިވް ޕާޓީއަކީ މިވަގުތު ރާއްޖޭގައި ދެވަނައަށް އަށް އެންމެ މެންބަރުން ގިނަ ޕާޓީއެވެ. އަދި ނިމިގެންދިޔަ 2018 ވަނަ އަހަރުގެ ރިޔާސީ އިންތިހާބަށް ބަލާއިރު ޕީޕީއެމްއަށް ވަނީ 96،052 ވޯޓު ލިބިފައެވެ. މިއީ އެއް ޕާޓީ އެކަނި ރިޔާސީ އިންތިހާބަށް ނިކުމެ އެންމެ ގިނަ ވޯޓު މިހާތަނަށް ލިބުނު ފަހަރުވެސްމެއެވެ.
އެހެންކަމުން ޕީޕީއެމަށް ރިޔާސީ އިންތިހާބުގައި ވާދަކުރުމުގެ ދޮރުތައް ބަންދުކޮށްލިއިރު މި 96 ހާހަށްވުރެ ގިނަ ރައްޔިތުންގެ ހައްގު ކޮބާތޯއެވެ. ޕީޕީއެމްގެ ކެންޑިޑޭޓަކު ނެތި ރައީސަކު ހޮވަން ބާއްވާ ރިޔާސީ އިންތިހާބު ބާއްވާނަމަ މި އިންތިހާބުގެ ސައްހަކަމާމެދު ސުވާކު އުފެދެއެވެ. މިއީ ކިހާ މިނިވަން އިންސާފުވެރި އިންތިހާބަކަށް ވާނެތޯ އެތައް ރައްޔިތުންނެއް މިއަދު ދަނީ ސުވާލުކުރަމުންނެވެ.
