މޯލްޑިވްސް ވިމެން އިން ޕޮލިސިންގއަށް ތިން އަހަރު ފުރުން ފާހަގަކުރުމަށް “ލޯތްބާއެކު” ގެ ނަމުގައި ހަރަކާތްތަކެއް ފަށައިފިއެވެ.
މި ދުވަސް ފާހަގަކުރުމަށް މިހާތަނަށް ދެ ހަރަކާތެއް ވަނީ ކުރިއަށް ގެންގޮސްފައެވެ.
ފުރަތަމަ ހަރަކާތުގައި، ޓްރެފިކް ޕޮލިސް އެންޑް ރޯޑް މެނޭޖްމެންޓާ ގުޅިގެން، ދިވެހި ފުލުހުންގެ ޚިދުމަތުގެ އަންހެން މުވައްޒަފުން މިއަދު 14:00 އިން 16:00 އަށް މަގުމަތީގައި ހަރަކާތްތެރިވެފައިވާކަމަށް ފުލުހުން ބުނެފައިވެއެވެ. މި ހަރަކާތުގައި ޓްރެފިކް ބެލެހެއްޓުމާއި ރައްޔިތުންނާ ބައްދަލުކުރުން ހިމެނެއެވެ.
މީގެއިތުރުން އަތޮޅުތެރޭގައި ވެސް މި ހަރަކާތް ކުރިއަށް ގެންގޮސް، ގޭގެއަށް ޒިޔާރަތްކުރުމާއި ރަށުގެ އެކި ހިސާބުތަކުން ރައްޔިތުންނާ ބައްދަލުކޮށް ހިޔާލު ބަދަލުކޮށްފައިވާކަމަށް ފުލުހުން ބުނެއެވެ.
މި ހަރަކާތުގައި ޔުނިފޯމު އެޅި އަންހެން ފުލުހުންގެ އިތުރުން ސިވިލް އަންހެން މުވައްޒަފުން ވެސް ބައިވެރިވިއެވެ. “ލޯތްބާއެކު” ހަރަކާތުގެ ތެރެއިން ފުލުހުންގެ ފަރާތުން އާންމުންނަށް ވަނީ “އައިލެންޑް ޕާފިއުމްސް”ގެ ސެންޓުފުޅި ހަދިޔާކޮށްފައެވެ..
މި ދުވަހާ ގުޅުވައިގެން އިތުރު ހަރަކާތްތަކެއް ވެސް ރޭވިފައިވާކަމަށް ފުލުހުން މައުލޫމާތު ދެއެވެ. އެގޮތުން ގާލާ ނައިޓަކާއި މޯލްޑިވްސް ވިމެން އިން ޕޮލިސިންގ ސަމިޓެއްގެ އިތުރުން ރެސިލިއަންސް ބިލްޑިންގ ލީޑަރޝިޕް ހަރަކާތްތަކެއް ކުރިއަށް ގެންދިއުމަށް ހަމަޖެހިފައިވެއެވެ. އަދި އަތޮޅުތެރޭގެ ޕޮލިސް ސްޓޭޝަންތަކާއި ޕޮލިސް ޕޯސްޓުތަކުން ވެސް ހަރަކާތްތަކެއް ކުރިއަށް ގެންދާނެކަމަށް ފުލުހުން ބުނެފައިވެއެވެ.
މޯލްޑިވްސް ވިމެން އިން ޕޮލިސިންގ އުފެއްދީ 2020 ވަނަ އަހަރުގެ ސެޕްޓެންބަރު 1 ވަނަ ދުވަހުއެވެ. މި ކޮމިޓީގެ މައިގަނޑު މަޤްޞަދަކީ ދިވެހި ފުލުހުންގެ ޚިދުމަތުގައި މަސައްކަތްކުރާ އަންހެން ފުލުހުންނާއި، އަންހެން މުވައްޒަފުން ބާރުވެރިކުރުވައި އޮޕަރޭޝަނަލް އަދި ފްރަންޓްލައިންގައި މަސައްކަތްކުރާ އަންހެން ފުލުހުން އިތުރުކުރުމެވެ.
ފުލުހުންގެ ތަފާސް ހިސާބުތަކުން ދައްކާގޮތުން ފުލުހުންގެ މުއައްސަސާގައި މަސައްކަތްކުރާ މުވައްޒަފުންގެތެރެއިން 20 އިންސައްތައަކީ އަންހެން މުވައްޒަފުންނެވެ. މީގެ ތެރެއިން 10 އިންސައްތައަކީ މެނޭޖީރިއަލް ލެވެލްގައި މަސައްކަތްކުރާ އަންހެން މުވައްޒަފުންނެވެ. އަދި 19 އިންސައްތައަކީ ފްރޮންޓްލައިން އޮޕަރޭޝަންތަކުގައި ހަރަކާތްތެރިވާ އަންހެން މުވައްޒަފުންނެވެ.