ކޮންމެ އޮކްޓޯބަރު މަހަކީވެސް އުރަމަތީގެ ކެންސަރަށް ހޭލުންތެރިކުރުވުމަށް ހާއްސަ މަހެކެވެ. ފިޔާތޮށި އޮކްޓޫބަރުގެ ނަމުން ނަން ދީފައިވާ މިމަހުގައި އުރަމަތީގެ ކެންސަރާ ބެހޭ ގޮތުން ގިނަ މައުލޫމާތުތަކެއް ފެނެއެވެ. އުރަމަތީގެ ކެންސަރާ ބެހޭ ގޮތުން ހޭލުންތެރިކަން އިތުރުވުމަކީ ވަރަށް މުހިންމު ކަމެއް ކަމެކެވެ. ސަބަބަކީ ގިނަ ފަހަރަށް ސްކްރީން ކޮށްގެން އަވަހަށް ދެނެގަނެވޭ އަދި އަވަހަށް ފަރުވާދީފިނަމަ ރަނގަޅުކުރެވޭ ބައްޔެކެވެ.
އެމެރިކަން ކެންސަރ ސޮސައިޓީ (އޭސީއެސް) އިން ހާމަކޮށްފައިވާ ގޮތުގައި އުރަމަތީގެ ކެންސަރަކީ ހަމުގެ ކެންސަރު ފިޔަވައި އެމެރިކާގެ އަންހެނުންނަށް އެންމެ ގިނައިން ޖެހޭ ކެންސަރެވެ.
އުރަމަތީގެ ކެންސަރުގެ ބައެއް ނިޝާންތަކާއި އަލާމާތްތަކަކީ ކޮބާ؟
ކޮންމެ އަންހެނަކަށްވެސް އޭނާގެ އުރަމަތި އާދަޔާ ޚިލާފަށް ފެންނަ ގޮތާއި އިހުސާސް ކުރެވޭ ގޮތް އެނގެން ޖެހެއެވެ. އެގޮތުން ދިމާވެދާނެ ކޮންމެ ބަދަލެއް ދެނެގަނެވޭނެ އެވެ. އަދި ގަވާއިދުން މެމޯގްރާމާއި ކްލިނިކަލް ބްރެސްޓް އެގްޒެމިނޭޝަން ހަދަން ޖެހެއެވެ. މި ޓެސްޓުތަކުގެ ސަބަބުން އުރަމަތީގެ ކެންސަރުގެ އަލާމާތްތައް ފެނުމުގެ ކުރިން ވެސް އުރަމަތީގެ ކެންސަރު ދެނެގަނެވޭނެއެވެ.
އުރަމަތީގެ ކެންސަރު ޖެހުމުގެ އަލާމާތްތަކުގެ ތެރޭގައި:
އުރަމަތީގައި ނުވަތަ ކިހިލިފަތުގައި ގައި ނިޝާނެއް ހުރުން
އުރަމަތީ އަދި ކިހިލިފަތުގައި ރިއްސާ ގަނޑުލުން
އުރަމަތީގެ ހަންގަނޑު ޑިމްޕަލްކޮށް ހުރުން
ދެމެހެއްޓެނިވި ގޮތަކަށް އުރަމަތީގައި ރިއްސުން
ވަށްގަނޑު ނުވަތަ އުރަމަތީގެ ހަންގަނޑު ރަތްވުން، ކަޅުވުން ނުވަތަ ތުނިވުން
ނިޕަލް ޑިސްޗާޖް (އުރަމަތީގެ ކިރު ފިޔަވައި)
އުރަމަތީގެ ސައިޒަށް ނުވަތަ ސިފައަށް އެއްވެސް ބަދަލެއް އިއުން
އުރަމަތީގެ ކެންސަރު ދެނެގަންނާނީ ކިހިނެތް؟
އަމިއްލައަށް އުރަމަތި ޗެކުކުރުން
އުމުރުން 45 އަހަރުން މަތީގެ ކޮންމެ މީހަކު އަހަރަކު އެއްފަހަރު މެމޮގްރާމް ހެދުން
އުމުރުން 20 އަހަރުން ފެށިގެން ކޮންމެ 3 އަހަރުން އެއްފަހަރު ޑޮކްޓަރަށް ގޮސް އުރަމަތީގެ ޗެކަޕެއް ހެދުން، އަދި އުމުރުން 40 އަހަރުވުމުން ކޮންމެ އަހަރަކު އެއްފަހަރު އުރަމަތީގެ ޗެކަޕެއް ހެދުން
އުރަމަތީގެ ކެންސަރަކީ ކެންސަރުގެ ވަރަށް އާންމު ވައްތަރެކެވެ. އަންހެނުންގެ އުމުރުން ދުވަސްވުމަކީ އުރަމަތީގެ ކެންސަރު ޖެހުމުގެ ފުރުޞަތު ބޮޑުވާ ކަމެކެވެ. އަދި ހަމައެފަދައިން އުމުރުން 30 އަހަރުނުވާ އަންހެނުންނަށް އުރަމަތީގެ ކެންސަރު ޖެހުމުގެ ފުރުޞަތު ކުޑައެވެ. އުރަމައްޗަށް އަންނަ ބަދަލުތަކަށް ހޭލުންތެރިވެ، އަމިއްލައަށް އުރަމަތި ބަލާ ފާސްކުރާނެގޮތް ދަސްކޮށް، އަމިއްލައަށް ބަލާ ފާސްކުރުމަކީ އަވަހަށް ބަލިދެނެގަތުމަށް ކުރެވޭނެ ކަމެކެވެ.
ތަފާސް ހިސާބުތަކުން ދައްކާގޮތުގައި ކެންސަރު ބަލީގެ ކުރީކޮޅު ބަލި ފާހަގަކުރެވިއްޖެނަމަ %90 މީހުންގެ ފުރާނަ ސަލާމަތް ކުރެވޭނެ އެވެ.