އިންސާނާގެ ދިރިއުޅުމުގައި އަމާޒެއް ކަނޑައެޅުމާއި، އެ އަމާޒަށް ވާސިލުވުމަށް މަސައްކަތްކުރުމަކީ ވަރަށް މުހިންމު ކަމެކެވެ. މިފަދަ ރިވެތި ނަމޫނާއެއް އަޅުގަނޑުމެންނަށް ފެންނަނީ ޝަހުމާ މުހައްމަދު (ޝަހޫ)ގެ ކިބައިންނެވެ. ޝަހޫގެ ހިތުގެ އެންމެ އަޑިން އޮތް އެދުމަކީ ޢުމްރާއަށް ދިއުމެވެ. މި މަތިވެރި މަޤްޞަދު ހާސިލުކުރުމަށްޓަކައި އޭނާ ފެށި މަސައްކަތަކީ މިއަދު އެތައް ބަޔަކަށް ނަމޫނާއެކެވެ..
“އަލް ޤަލްބިއާ ދުޢާ ކާޑްސް” ނަމުގައި މި މަސައްކަތް ފެށި ނަމަވެސް ހަގީގަތަކީ މިއީ އެތައް ރެއެއް ވަންދެން ޝަހޫކުރި ދުޢާ ކަމެކެވެ. މީހުންނަށް މަންފާވާ އަދި އޭގެން އާމްދަނީ ލިބޭނެ މަސައްކަތެއް ލިބޭތޯ ޝަހޫ ވަނީ އެތައް ރެއަކު ދަމު ނަމާދަށްފަހު ދުޢާކޮށްފައެވެ. ޝަހޫ ބުނިގޮތުން މި މަސައްކަތް ފެށުނީ އޭނާގެ ދަރިފުޅަށް ދުޢާ ކިޔަން ދަސްކޮށްދިނުމަށް ދުޢާ ކާޑެއް ތައްޔާރުކުރި ހިސާބުންނެވެ. އަދި އޭގެ ފަހުން، އެތައް މައިންނަކަށް މިފަދަ ދުޢާ ކާޑުތަކުގެ ބޭނުން ޖެހިދާނެކަމަށް ވިސްނި، މި މަސައްކަތް ފުޅާކުރަން ނިންމިއެވެ.
“މާތް ﷲ އަޅުގަނޑުގެ ހުވަފެންތައް މެދުވެރިކޮށް އަޅުގަނޑު ދުޢާ އިޖާބަކުރެއްވިއްޔޭ ހިތަށް އެރި” ޝަހޫ ބުނެފައިވެއެވެ.
އޭގެ ފަހުން “އަލް ޤަލްބިއާ ދުޢާ ކާޑްސް” ޕޭޖް ވުޖޫދަށް އައެެވެ. ޝަހޫ ބުނިގޮތުގައި “”އަލް ޤަލްބިއާ” ގެ މާނައަކީ ހިތުގެ ފުންމިނުންނެވެ. އަދި މިއީ ޝަހޫ ހިތުގެ ފުންމިނުން އިހްްލާސްތެރި މަޤްސަދެއްގައި ފަށާފައިވާ މަސައްކަތެކެވެ.
ޝަހޫގެ މި މަސައްކަތުގެ ތެރޭގައި ހިމެނެނީ ހަމައެކަނި ދުޢާ ކާޑުތައް ނޫނެވެ. އޭނާ ވަނީ އިސްލާމީ މަޢުލޫމާތު ލިބޭގޮތަށް ހަދާފައިވާ މެމޮރީ ގޭމްތަކެއްވެސް ތައްޔާރުކޮށްފައެވެ. މިހާރު ޝަހޫ ވަނީ 26 ވައްތަރުގެ ދުޢާ ކާޑު ތައްޔާރުކޮށްފައެވެ. މީގެ ތެރޭގައި ނަމާދުކުރާ ދުޢާ ކާޑް، ނަމާދުކޮށް ނިމިގެން ކިޔާ ދުޢާ ކާޑް، ހެނދުއާި ހަވީރުގެ ޒިކުރު ކާާޑާއި އަދި ބޮޑެތި މީހުންނަށް ޙާއްސަކޮށް ޙައްޖާއި ޢުމްރާގެ ދުޢާ ކާޑުވެސް ހިމެނެއެވެ.
ހަމައެހެންމެ ކަސްޓަމައިޒްކޮށް ބޭނުންވާ ޑިޒައިނަކަށް، ކުދިންގެ ނަން ލިޔެގެން ވެސް ޝަހޫ ކާޑުތައް ތައްޔާރުކޮށްދެއެވެ. އަދި ކުރިއަށް އޮތްތަނުގައި އިތުރު ކާޑުތައް ނެރޭނެކަމުގެ އުފާވެރި ޙަބަރު ޝަހޫވަނީ ދީފައެވެ.
https://www.instagram.com/alqalbia_dua_cards?igsh=MW9wcDZ6ZjdycXI1dg==
ޝަހޫ ބުނިގޮތުގައި މި މަސައްކަތުގެ އަސްލު މަޤްޞަދަކީ ކުޑައިރުއްސުރެ ކުދިންނަށް ދުޢާތައް ކިޔައިދީ ރަނގަޅު އުއްމަތެއް ބިނާކުރުމެވެ. މިމަސައްކަތުގައި ޝަހޫގެ ފަހަތުގައި އޮތް ޓީމަކީ އޭނާގެ ދެގޮތެއް ނުވާ އާއިލާއެވެ. ފިރިމީހާ އާއި ދަރިފުޅެވެ. ޝަހޫގެ އެންމެ ލޯބިވާ ދައްތަތަކާއި އެ ދައްތަތަކުގެ ދަރިންނެވެ.
“ވަރަށް ހާއްސަ ޝުކުރު ލޯބިވާ ފިރިމީހާ އަށާ އަންހެން ދަރި ފުޅަށް އަދި އަޅުގަނޑުގެ ދައްތައަށާއި ނީސަސް އަށް. ދެން މާޝާން ދައްތަ އަށާ އަދި ޝޭހް އަލީ ޒާހިރު ބޭބެއަށް ވަރަށް ޝުކުރު ވެރިވަން އެހާ ބިޒީކޮން އުޅެމުން ވެސް ދުޢާ ކާޑްސް ޗެކްކޮށްދެވާތީވެ.” ޝަހޫ ބުނެފައިވެއެވެ.
“އަލް ޤަލްބިއާ ދުޢާ ކާޑްސް” ޕޭޖަށް އޭޕްރިލް މަހު އަހަރެއްވާއިރު، ޝަހޫގެ އާއިލާ މިހާރު ތައްޔާރުވަމުން އެދަނީ ހަމަ އެމަހުގައި ޢުމްރާގެ އަޅުކަމަށް ފުރުމަށެވެ. ޝަހޫ ދެކޭގޮތުގައި އެތައް ދުވަހެއް ވަންދެން “ހިތުގެ އަޑިން” އޭނާ ކުރަމުންދިޔަ ދުޢާ މާތްﷲ މިވަނީ އިޖާބަކުރައްވާފައެވެ.