ޤައުމުގެ ވެރިންނާއި ބައްދަލުކޮށް ކަންކަމާއި މަޝްވަރާކުރުމަކީ ޒަމާނުއްސުރެ ދިވެހިން ސަގާފަތާއި އާދަކާދައިގެ ތެރޭގައި ހިމެނޭކަމެއް ނޫނެވެ. ބޮޑުކަމެއް ދިމާވާ ހާލަތުގައި ވިޔަފާރިވެރިއަކަށް ދާއިރާގެ މެމްބަރާއި ހަމަޔަށް ވެސް ވާސިލްވުމަކީ މާވަހަރެއް ފެނުން ފަދަ ކަމެކެވެ. ވެރިކަމެއް ނިމިގެންދާއިރު ކެބިނެޓްގައި ހިމެނޭ މިނިސްޓަރުންވެސް ގިނަ ފަހަރަށް ފެންނަނީ ޓީވީ ނުވަތަ ހަބަރަކުންނެވެ. ދެން އޮތީ ޤައުމުގެ ވަލިއްޔުލް އަމްރު ނުވަރަ ރައީސުލްޖުމްހޫރިއްޔާގެ ވާހަކައެވެ. ފާއިތުވި ހުރިހާ ދައުރެއްގައިވެސް ރައީސެއް ލޮލަށް ފެންނަނީ ކޮންމެ އަހަރަކުވެސް ދެ އީދު ދެ ދުވަހުގައެވެ. އެވެސް އެތައް ގަޑިއިރެއްވަންދެން ދިގު ސަފެއްގައި ކޮޅަށްތިބެ އެތައް ތަކްލީފެއް އުފުލުމަށްފަހުގައެވެ.
އެހެންނަމަވެސް، ދިވެހިރާއްޖޭގެ މިހާރުގެ ރައީސުލްޖުމްހޫރިއްޔާ ވެރިކަމަށް ވަޑައިގަތުމާއެކު މި އާދަ އެއްކޮށް ބަދަލުވެއްޖެއެވެ. މިއަދު ރައީސް ލޮލަށް ނުފެންނަ ދިވެހިރައްޔިތެއް މަދެވެ. ރައީސް ޑރ. މުހައްމަދު މުއިއްޒު ވެގެންދިޔަ ހުދު އެމަނިކުފާނު އަމިއްލަފުޅަށް ދިވެހި ރައްޔިތުންގެ ގާތަށް ވަޑައިގެން ރައްޔިތުންގެ އަޑު އައްސަވާ ރައީސަކަށެވެ. އާންމު ރައްޔިތު މީހާއަށް ދިމާވެފައިވާ ތަކްލީފުން ފެށިގެން ވިޔަފާރިވެރިންގެ ކަންބޮޑުވުންތައްވެސް އެ މަނިކުފާނު އަޑުއައްސަވަމުން ގެންދަވަނީ ކެތްތެރިކަމާއެކުގައެވެ.
ރައީސް ޑރ. މުއިއްޒުގެ ސަރުކާރަށް ދެ އަހަރު ވީއިރު އެމަނިކުފާނު ވަނީ ރާއްޖޭގެ ރައްޔިތުން ދިރިއުޅުއްވާ ހުރިހާ ރަށަކަށް ވަޑައިގެން ރައްޔިތުންގެ ޝަކުވާތައް އަޑު އައްސަވާފައވެެ. މިއީ ރާއްޖޭގެ ތާރީހުގައިވެސް ވެރިއަކު ކުރެއްވި މަސައްކަތެއް ނޫނެވެ. ބައެއް ރަށްރަށަށް އެ މަނިކުފާނު ވަޑައިގެންނެވުމުން އެއީ އެ ރަށްރަށަށް ރިޔާސީ އިންތިހާބަކަށް ނޫން ގޮތަކަށް ރާއްޖޭގެ ރައީސެއް ވަޑައިގެން ފުރަތަމަ ފަހަރުކަން ރައްޔިތުންގެ ވާހަކަތަކުން އެނގިގެން ދިޔައެވެ.
މި ބައްދަލުވުންތަކަށްފަހު ރައްޔިތުންގެ ހުރި ކަންބޮޑުވުންތައް އަޑުއައްސަވާ ވަގުތުން ވަގުތަށް ކުރެވެން ހުރި ހުރިހާ މަސައްކަތެއް ރައީސް ގެންދަވަނީ ކުރައްވަމުންނެވެ. އެގޮތުން ބޯހިޔާވަހިކަމާއި، ވިޔަފާރީގެ ގޮތުން ހުރި ދަތިތަކާއި، ތައުލީމީގޮތުން ހުރި މައްސަލަތަކިގެ އިތުރުން ބިދޭސީންގެ އެކި ކަންކަމުގައިވެސް ރައީސް ވަނީ އަވަސް ފިޔަވަޅު އަޅުއްވާ ހައްލު ހޯއްދަވައިދެއްވާފައެވެ.
އެގޮތުން އެފްޑީސީން ހުޅުމާލޭގައި ތަރައްގީކޮށްފައިވާ 4000 ހައުސިންގ ޔުނިޓު ލިބުނު ފަރާތްތަކުން ޑިޕޮޒިޓާއި ކުލީގެ ގޮތުގައި ބޮޑު އަދަދެއް ދައްކަން ޖެހޭތީ އެކަމުގެ ކަންބޮޑުވުން ރައްޔިތުން ވަނީ ރައީސާ ހިއްސާ ކުރައްވާފައެވެ. އެ ކަންބޮޑުވުންތަކާއެކު އަގުތަކަށް ބަދަލު ގެންނަވާނެ ކަމަށް ރައީސް ވަނީ ވިދާޅުވެފަ އެވެ. އަދި ރައީސްގެ މި ވަޢުދުފުޅާ އެއްގޮތަށް މިހާރު އެ ފްލެޓުތަކުގެ އަގުތަކަށް ބަދަލު ގެނެސްފައިވާކަން އިމާރާތް ކުރުމާއި ގެދޮރުވެރިކަމާއި ބިނާރާބެހޭ ވަޒީރު ޑރ. ޢަބްދުﷲ މުއްތަލިބު އިއްޔެ ވަނީ ހާމަކުރައްވާފައެވެ. އެގޮތުން، ރައީސް ވިދާޅުވިގޮތަށް 3 ކޮޓަރީގެ އެޕާޓްމަންޓުތަކަށް މަހު ކުލީގެ ގޮތުގައި 8،500 ރުފިޔާ އަދި މެއިންޓަނަންސް ފީގެ ގޮތުގައި 1،500 ރުފިޔާ ހިމެނޭހެން ޖުމްލަ 10،000 ރުފިޔާ ދައްކަން ޖެހޭގޮތަށް ބަދަލު ކުރައްވާފައިވާ ކަމަށް ވަޒީރު ވިދާޅުވިއެވެ.
ހަމައެހެންމެ ހުސްވި ހަފްތާގެ ބުދަ ދުވަހުގެ ރޭ ކުދި އަދި މެދު ފަންތީގެ ވިޔަފާރިވެރިންނާއެކު ބޭއްވި ބައްދަލުވުމުގައި މި ވިޔަފާރިވެރިންގެ ތެރެއިން ކާގޯގެ ޚިދުމަތް ހޯއްދަވާ ބައެއް ފަރާތްތަކުން ވަނީ މިހާރު އެއަރޕޯޓުގައި އެމްއޭސީއެލްއިން މުދާ ކްލައަރ ކުރުމުގައި ބޮޑެތި ގޮންޖެހުންތަކަކާ ކުރިމަތިލާން ޖެހޭކަމަށް ވިދާޅުވެފައެވެ. މިއާއެކު މުދާ އެތެރެކޮށް ގިނަ ވަގުތު ބަހައްޓަން ޖެހުމުން އެއަށް ދައްކަން ޖެހޭ އަގު ނުވަތަ ޑެމަރޭޖް ފީ އިތުރުވެގެންދާކަމަށް ވިޔަފާރިވެރިން ވަނީ ފާހަގަކޮށްފައެވެ.
މި ކަންބޮޑުވުންތައް އަޑުއައްސަވާ ރައީސް ޑރ. މުއިއްޒު ވަނީ މުދާ ކްލިއަރ ކުރުމުގައި ހުރި ގޮންޖެހުންތައް ހައްލުކޮށްދެއްވާނެކަމުގެ ޔަޤީންކަން ދެއްވާފައެވެ. އެގޮތުން އެ ބައްދަލުވުން ކުރިއަށް ދިޔަ ވަގުތު ކުރެވުނު މަޝްވަރާތަކާއެކު، މުދާ ބަހައްޓައިގެން އަގު ދައްކަން ނުޖެހޭ ވަގުތު ނުވަތަ ޑެމަރޭޖް ނާރާ ވަގުތު 80 ގަޑިއިރުން 124 ގަޑިއިރަށް އިތުރުކޮށްދެއްވާ މަސައްކަތުގެ ގަޑި 24 ގަޑިއިރަށް ބަދަލުކޮށްދެއްވާފައެވެ.
އަދި 16 ޑިސެމްބަރުގައި ގަލޮޅު ރައްޔިތުންނާއެކު ބޭއްވި ބައްދަލުކުރެއްވުމުގައި ރައީސް ވަނީ ކުޑަ ދުވަސްކޮޅެއްގެތެރޭ 52 މަސާޖު ޕާލާ ބަންދުކޮށްފައިވާ ކަމަށް ވިދާޅުވެފައެވެ.
ރައީސްގެ މި ބައްދަލުވުންތަކުގައި ހުރިހާ ރައްޔިތުންގެ ކަންބޮޑުވުންތައް ރައީސްވަނީ ގާތުން އަޑުއައްސަވާ ނޯޓްވެސް ކުރައްވާފައެވެ. ހާއްސަކޮށް ނުރުހުމުގެ ބަސްތަކާއި އެކި ކަހަލަ ތުހުމަތުތައްވެސް އެމަނިކުފާނު ކެތްތެރިކަމާއެކު އަޑުއެއްސެވިތަން ފެނިގެންދިޔައެވެ. އަދި ވަގުތުން ޖަވާބުދާރީވާންޖެހޭ ސުވާލުތަކަށް އެމަނިކުފާނު ވަނީ ވަރަށްވެސް ހިކުމަތްތެރިކަމާއެކު ޖަވާބުދާރީވެވަޑައިގެންފައެވެ.
މި ބައްދަލުވުންތަކުގައި ރައީސް ވަނީ މި މަސައްކަތުގެ ބޭނުމަކީވެސް ހުރިހާ ރައްޔިތުންގެ ކަންބޮޑުވުންތަކަށް ވީ އެންމެ ރަނގަޅު ހައްލެއް ގެނެސްދިނުން ކަމަށާއި، ރައްޔިތުން ފާޅުކުރާ ކޮންމެ ޚިޔާލަކީ މަޝްވަރާއަކީ ހަމަ މުހިންމުކަމެއް ކަމަށް ވިދާޅުވެފައެވެ.