ކެއުމަށް ބޭނުންކުރާ އެކި ބާވަތުގެ ހެދިކާ ގަނޑުކޮށްފައި (ފްރީޒްކޮށްފައި) ބެހެއްޓުމަކީ ފަސޭހަ ކަމެއް ނަމަވެސް، މާ ގިނަ ދުވަހު މިގޮތަށް ބެހެއްޓުމަކީ އޭގެ ފެންވަރު ދަށްވެ، ސިއްހީ ގޮތުން ނުރައްކާތަކެއް ކުރިމަތިވެދާނެ ކަމެއް ކަމަށް ތަޖުރިބާކާރުން އަބަދުވެސް ބުނެއެވެ. ރަމަޞާން މަހާއި ދިމާކޮށް މިއީ ރާއްޖޭގައި މިހާރު އާންމު ކަމެއް ނަމަވެސް، ދިގު މުއްދަތަކަށް މިކަން ކުރާނަމަ ސިއްހީގޮތުން ހަށިގަނޑަށް އޭގެ ނޭދެވޭ އަސަރުކުރުމުގެ ފުރުސަތު ބޮޑެވެ. ކާބޯތަކެތި ގަނޑުކުރުމަކީ ތަކެތި ހަލާކުވުން ލަސްކޮށްދޭ ކަމެއް ނަމަވެސް، އެއީ ތަކެތީގެ ތާޒާކަމާއި ރައްކާތެރިކަން އަބަދަށް ދަމަހައްޓައިދޭ ކަމެއް ނޫނެވެ.
ކާބޯތަކެތީގެ ފެންވަރަށް ބަދަލު އައުން
ގިނަ ދުވަހު ގަނޑުކޮށްފައި ބެހެއްޓުމުން ހެދިކާގައި ހިމެނޭ ފިލިންގްސްގެ އަސްލު ރަހަ ގެއްލި، ބައެއް ފަހަރު މުއްދަތު ހަމަވެފައި ހުންނަ ކަހަލަ ރަހައެއް ލާން ފަށައެވެ. މީގެ އިތުރުން، ފުށްގަނޑުގެ މަޑުކަން ގެއްލި، ހޫނުކުރުމުން މާބޮޑަށް ހިކުން ނުވަތަ ދެމޭ ގޮތްވުން ފަދަ ބަދަލުތައް އާދެއެވެ. ރަނގަޅަށް ބަންދުނުކޮށް ބެހެއްޓުމުގެ ސަބަބުން ‘ފްރީޒާ ބާން’ ވެ، އޭގެ ކުލައާއި ރަހައަށް ބޮޑެތި ބަދަލުތަކެއް އާދެއެވެ.
އަނެއްކޮޅުން، ގަނޑުކުރާ ބައިގައި ހުންނަ މަހުގެ ބާވަތްތަކުގެ ވަސް ހެދިކާތަކުގައި ހިފުމަކީ އާންމު ކަމެކެވެ. މީގެ ސަބަބުން ކާއިރު ރަހަ ބަދަލުވުމުގެ ފުރުސަތު އޮވެއެވެ.
ސިއްހީ ގޮތުން ކުރިމަތިވެދާނެ ނުރައްކާތައް
ސިއްހީ މާހިރުން ފާހަގަކުރާ ގޮތުގައި، ގަނޑުކޮށްފައި ހުންނަ ތަކެތި ގަނޑުފިލުވުމަށްފަހު އަލުން ގަނޑުކުރުމަކީ ބެކްޓީރިއާ އުފެދުމަށް މަގުފަހިވާ ކަމެކެވެ. ޚާއްސަކޮށް ކްރީމް ނުވަތަ މަސް އަޅާފައި ހުންނަ ބާވަތްތަކުން ފުޑް ޕޮއިޒަނިންގްގެ މައްސަލަތައް ދިމާވެ، ބަނޑުގައި ރިއްސުމާއި ހޮޑުލުން ފަދަ ކަންކަން މެދުވެރިވެދާނެއެވެ. އަދި އޭގައި ހުންނަ ތެލާއި ބަޓަރު ‘ރެންސިޑް’ ވުމުގެ ސަބަބުން ހަޖަމުކުރުމުގެ ނިޒާމަށް އުނދަގޫވެ، މޭނުބައިކުރުން ފަދަ ކަންކަން ދިމާވެއެވެ.
މީގެ އިތުރުން، ގިނަ ދުވަސްވުމުން އޭގައި ހުންނަ ވިޓަމިންސް އާއި ނިއުޓްރިޝަންގެ މިންވަރު ދަށްވެ، ހަމައެކަނި ހަކުރާއި ފެޓްސް ހަށިގަނޑަށް ލިބޭ ގޮތްވެއެވެ. މީގެ ސަބަބުން ބަރުދަން އިތުރުވުމާއި، ލޭގައި ހަކުރު މަތިވުން އަދި ކޮލެސްޓްރޯލް އިތުރުވުމުގެ ފުރުސަތު ބޮޑުވެއެވެ. ރަނގަޅަށް ރައްކާނުކުރެވި ފިނިހޫނުމިނަށް ބަދަލު އަންނަ ނަމަ، ފަންގަސް ނުވަތަ މޮލްޑް ޖެހުމުގެ ނުރައްކާވެސް އޮވެއެވެ.
ޕޭސްޓްރީ ފަދަ ތަކެތި ފްރީޒްކޮށްގެން ބޭނުންކުރުމަކީ ކުރު މުއްދަތަކަށް އެންމެ ރަނގަޅު ކަމެއް ނަމަވެސް، އެންމެ ރައްކާތެރި އަދި ސިއްހަތަށް ފައިދާހުރި ގޮތަކީ ތާޒާކޮށް ހުންނަ ތަކެތި ބޭނުންކުރުމެވެ.