އަންހެނުންގެ ތަރައްޤީއަށް މަސައްކަތްކުރާ ކޮމިޓީ (ޑަބްލިއު.ޑީ.ސީ) ގައި ފަސް އަހަރު ދުވަހު ޚިދުމަތް ކުރައްވާފައިވާ މަރްޔަމް ވަފިއްޔާއަކީ ދިއްފުށީގެ އިޖުތިމާއީ މަސައްކަތްތަކުގައި ފާހަގަކޮށްލެވޭ، ހަރަކާތްތެރި ފަރާތެކެވެ. އަމަލީ ގޮތުން ކަންކަމުގައި ބައިވެރިވުމާއި އިޖުތިމާއީ ކަންކަމަށް ބަހައްޓަވާ އަހައްމިއްޔަތަށް މަޝްހޫރުވެފައިވާ ވަފިއްޔާ، ކުރިއަށް އޮތް ޑަބްލިއު.ޑީ.ސީ އިންތިޚާބުގައި ވާދަކުރައްވަނީ އާންމުންގެ ތެރޭގައި ކުރައްވާފައިވާ ގިނަގުނަ މަސައްކަތްތަކުގެ ތަޖުރިބާއާއެކުގައެވެ.
އަންހެނުން ބާރުވެރިކުރުވުމާއި އިޖުތިމާއީ ޚިދުމަތަށް އޮތް ޝައުގުވެރިކަން
ވަފިއްޔާ ވިދާޅުވާ ގޮތުގައި އިޖުތިމާއީ މަސައްކަތުގެ ތެރެއަށް އޭނާ ވެދެވަޑައިގަތީ އަންހެނުންނަށް އެހީތެރިވުމަށް އޮތް ފުން ލޯތްބެއްގެ ސަބަބުންނެވެ. ވޭތުވެދިޔަ އަހަރުތަކުގައި އޭނާ ވަނީ އަންހެނުންގެ ބޭނުންތަކުގައި އެހީތެރިކަން ފޯރުކޮށްދީ، އެމީހުންނަށް ދިމާވާ މައްސަލަތަކުގައި ގާތުން މަސައްކަތް ކުރައްވާފައެވެ. ރަށް ސާފުކުރުމުގެ ކެމްޕޭންތަކުގައި ބައިވެރިވެވަޑައިގަތުމަކީ އާންމު ޚިދުމަތަށް އޭނާގެ ޝައުގުވެރިކަން އުފެދި، މުޖުތަމައުގެ ލާބައަށް މަސައްކަތް ކުރުމަށް ލިބުނު ހިތްވަރެކެވެ.
ރަށުގެ ހަރަކާތްތަކާއި އިޖުތިމާއީ ޕްރޮގްރާމްތަކުގައި އަދާކުރާ ހަރަކާތްތެރި ދައުރު
ޑަބްލިއު.ޑީ.ސީ ގައި ހޭދަކުރެއްވި މުއްދަތުގައި ވަފިއްޔާ ވަނީ މުޖުތަމައުގެ ގިނަ ހަރަކާތްތަކެއް ރޭވުމާއި ހިންގުމުގައި އިސް ދައުރެއް އަދާކުރައްވާފައެވެ. ވަކިން ހާއްސަކޮށް، އިސްރަށްވެހިންގެ ދުވަހުގެ ހަރަކާތްތައް އިންތިޒާމުކޮށް، ދޮށީ އުމުރުގެ މީހުންނަކީ އަގުވަޒަންކުރެވޭ އަދި އަޅާލުން ލިބޭ ބައެއްކަން އިހުސާސްކޮށްދިނުމަށް އޭނާ ކުރެއްވި މަސައްކަތްތައް ފާހަގަކުރައްވައެވެ.
މީގެ އިތުރުން، ރަށް ޒީނަތްތެރިކުރުމުގެ މަސައްކަތްތަކުގައި ޚާއްޞަކޮށް އިއްޒަތްތެރިން ރަށަށް ވަޑައިގަންނަވާ ވަގުތުތަކުގައި އާންމު ތަންތަން ސާފުކުރުމާއި މަގުތައް ޒީނަތްތެރިކުރުމުގައި އޭނާ އަމަލީ ގޮތުން އިސްނަންގަވައެވެ. އަދި އީދު ފަދަ މުނާސަބަތުތަކުގައި ޑަބްލިއު.ޑީ.ސީ އާއި ރަށު ރައްޔިތުން ގުޅިގެން ގިނަ ހަރަކާތްތަކެއް ހިންގުމުގައި ބައިވެރިވެއެވެ. އެގޮތުން ޑަބްލިއު.ޑީ.ސީ އާއި ރައްޔިތުން އިސްނަގައިގެން އިންތިޒާމުކުރާ ހެނދުނުގެ ސަޔާއި މެންދުރުގެ ފަރިއްކޮޅުތަކުގައި ބައިވެރިވެ، ރައްޔިތުންގެ މެދުގައި އޮންނަ ގުޅުން ބަދަހިކުރުމަށް މަސައްކަތް ކުރައްވައެވެ.
ވަފިއްޔާ ގަބޫލުކުރައްވާ ގޮތުގައި މިއަދު ދިއްފުއްޓަށް ކުރިމަތިވެފައިވާ އެންމެ ބޮޑު އެއް މައްސަލައަކީ ކުނި މެނޭޖުކުރާނެ އެކަށީގެންވާ ނިޒާމެއް ނެތުމެވެ. ރަށުގެ ސާފުތާހިރުކަން ދަމަހައްޓައި ތިމާވެށި ހިމާޔަތްކުރުމަށްޓަކައި، ދެމެހެއްޓެނިވި އަދި އިންތިޒާމުވެފައިވާ ކުނި އުކާލުމުގެ ނިޒާމެއް ގާއިމުކުރުމަކީ ކޮންމެހެން ބޭނުންތެރި ކަމެއް ކަމަށް އޭނާ ދެކެވަޑައިގަންނަވައެވެ.
މިއީ މިހާތަނަށް އެދެވޭ ހައްލެއް ލިބިފައިނުވާ، ގިނަ ދުވަސްވީ ބޭނުމެއްގެ ގޮތުގައި ސިފަކުރައްވަމުން، އިންތިޚާބުވެއްޖެ ނަމަ މިކަމަށް މާނަހުރި ހައްލެއް ހޯދުމަށް މަސައްކަތް ކުރައްވާނެ ކަމަށް އޭނާ ވިދާޅުވިއެވެ.
ސިޔާސީ ތަޖުރިބާއާއި ޕާޓީގެ ހަރަކާތްތައް
ވަފިއްޔާއަކީ ވޭތުވެދިޔަ އަހަރުތަކުގައި ސިޔާސީ ހަރަކާތްތަކުގައި ވެސް އަމަލީ ގޮތުން ބައިވެރިވެވަޑައިގަންނަވާ ބޭފުޅެކެވެ. ކުރިން ޑީ.އާރު.ޕީ އަދި ޕީ.ޕީ.އެމް އާއެކު މަސައްކަތް ކުރެއްވުމަށްފަހު، މިހާރު އޭނާ މަސައްކަތް ކުރައްވަނީ ޕީ.އެން.ސީ އާއެކުގައެވެ. ޕާޓީގެ މަސައްކަތްތަކުގައި ބައިވެރިވުމަކީ އޭނާ އުފާކުރާ ކަމެއް ކަމަށާއި، އެއީ ގައުމީ އަދި އިޖުތިމާއީ ކަންކަމުގައި ހިއްސާވުމަށް ލިބޭ ފުރުސަތެއްގެ ގޮތުގައި އޭނާ ދެކެވަޑައިގަންނަވައެވެ.
މުޖުތަމައުގެ ބަލައިގަތުން
ވަފިއްޔާ ކުރައްވާ ގިނަ މަސައްކަތްތަކުގެ ތެރެއިން، އިސްރަށްވެހިންގެ ދުވަސް ފާހަގަކުރުމަކީ އޭނާ އެންމެ ބޮޑު އުފަލެއް ލިބޭ އެއް ކާމިޔާބީއެވެ. އެފަދަ ހަރަކާތްތަކުގެ ތެރެއިން ދޮށީ އުމުރުގެ މީހުންގެ ފަރާތުން ލިބޭ ލޯތްބާއި އިހުތިރާމަކީ މަސައްކަތުގައި ކުރިއަށް ދިއުމަށް ލިބޭ ވަރަށް ބޮޑު ހިތްވަރެއް ކަމަށް އޭނާ ވިދާޅުވިއެވެ.
އޭނާ ވިދާޅުވާ ގޮތުގައި، އާންމު ރައްޔިތުންގެ ފަރާތުން ލިބޭ އެއްބާރުލުމާއި ހިތްވަރަކީ އިޖުތިމާއީ ލީޑަރެއްގެ ގޮތުގައި މަސައްކަތް ކުރެއްވުމަށް ނިންމެވި ނިންމެވުމުގެ އެންމެ ބޮޑު އެއް ސަބަބެވެ.
ވޯޓުލާ ފަރާތްތަކަށް ދޭ މެސެޖު
ވޯޓުލާ ފަރާތްތަކަށް ވަފިއްޔާ ދޭ މެސެޖުގައި އޭނާ ބާރުއަޅުއްވަނީ، ހަމައެކަނި ވަކި ސިޔާސީ ފިކުރަކަށް ބެލުމުގެ ބަދަލުގައި، ކެންޑިޑޭޓުންގެ މަސައްކަތްތެރިކަމާއި އިސްނެގުމުގެ ގާބިލުކަމަށް ބަލައިގެން މީހުން ހޮވުމުގެ މުހިންމުކަމުގެ މައްޗަށެވެ.
“ތިޔަބޭފުޅުން ކޮންމެ ޕާޓީއަކަށް ތާއީދުކުރެއްވި ކަމުގައިވިޔަސް، އެންމެ ރަނގަޅު ގޮތަކީ މަސައްކަތްތެރި، އިސްނަގައިގެން ކަންކަން ކުރާ ކެންޑިޑޭޓުންނަށް ވޯޓު ދެއްވުން. ހަމައެކަނި މީހަކު ކުރިމަތިލާފައި ހުރީތީ ވޯޓު ނުދެއްވާ. ވޯޓު ދެއްވަންވާނީ ގާބިލު، ކެރޭ މީހުންނަށް.” – ވަފިއްޔާ
އިޖުތިމާއީ މަސައްކަތްތަކާއި ޚިދުމަތުގެ ދާއިރާއިން ލިބިފައިވާ ތަޖުރިބާއާއެކު، މަރިޔަމް ވަފިއްޔާ އުންމީދު ކުރަނީ އަންހެނުންގެ ތަރައްގީއަށް މަސައްކަތްކުރާ ކޮމިޓީ މެދުވެރިކޮށް ދިއްފުށީގެ ތަރައްގީއަށް ހިއްސާވުމަށާއި، އަންހެނުންނާއި، އާއިލާތަކާއި، އަދި ދޮށީ އުމުރުގެ މީހުންނަށް އެހީތެރިކަން ފޯރުކޮށްދޭ ޕްރޮގްރާމްތައް އިތުރަށް ވަރުގަދަކުރުމަށެވެ.